Isiyaasi 25 - Kafa Linguistics Project

Galletee Shoddo

¹ Doono Yeero, ne ta Nuggishoo neene; wonna wonna yameeti, worganikkiti mooyinaꞌon, gibeneyoona ne tuniitoyich, neen oogiihoye; ne shigoonoo galletehoye.

² Katemoon xaqqee gutoon tuniito neene; mishigechi katemoo happee aallemmoyich tuniito neene; no etteenaꞌochi taatee kexo ebiyee bekk beetaachemmone; ciroona wochinnoon shuuneyaachemmone.

³ Ebich giidechi asheenaꞌo neen oogiyemminaꞌone; maacmanje aageteenaꞌochi katemeenaꞌo neech shattemminaꞌone.

⁴ Girechoyich deeboon, shiqqoyichoo bi xuuxee aabooba deebon, aachi aayoochee bi wodemmi xaaꞌoon, aaboyich yiiroon, tuneto neene; maacmanjeenaꞌochi kaaree cufoo, kechi duuhoon qicciibeeti aachi aayoommon,

⁵ baraheexi gaamoommon, bi tunetoyichiye. No etteenaꞌochi cookoon haweccaayihine; quboo yiireꞌi gaamoon bi aqqaayoommon, maacmanjeenaꞌochi qaaroon cikkaayihine.

Doono Yeeri Qanniyemmi Gifiroo

⁶ Beshe Mawe Doono Yeeri, hini Tsiyooni guudooch aagetoo bullich oogeti gifiroon qanniyemmone; ebi gifirooch gaaweti, awuyi meenonaa gaawe woyinee uyoonon qanniyemmone.

⁷ Ebi are guudi toommoochaa asho bullin qeriti maccillaatoon, aageteenaꞌo aafoon kaappiti qeroonoo shoottemmone.

⁸ Biyoo qitoon bulli yemeenooch aalliyemmone; Nuggishoo Doono Yeeri, asheenaꞌo bulli aafoochee acimoon hidemmone; bi asheenaꞌo naakkeyoonoo showee toommo bulliichee aalliyemmone; Doono Yeeri ebin gettitone.

⁹ Ebi ceeniyooba, asheenaꞌo bulli, “Ebi no Nuggishoone; biin no gibenetoyich, noon wodiitone; ebi Doono Yeerine; biin gibeneto noone; bi wodiyoona emiribone; emiroonoo wucwucone” gettemminaꞌone.

Doono Yeeri Moꞌabin Naxemmo Tuno

¹⁰ Doono Yeerichi kishoo hini guudi toommooch tunemmone; tunebaani Moꞌabee asheenaꞌo buyo dengooch gedaa koteyoommon koteyemminaꞌone.

¹¹ Aachi waakkecho bi kishoon bi yaggoommon boonoshi kishoon aree daggoochaa yaggemminaꞌone; tunebaani Doono Yeeri boonoshi geecoon boonoshi maroona tookki giishiyemmone.

¹² Moꞌabichi mishigeenaꞌon genje bi uxeroona tookki happemmone; tiishiree buttoon tuniyemmone.