Isiyaasi 24 - Kafa Linguistics Project

Showee Toommooch Kindemmi Yeerichi Naxo

¹ Ebiyoche, Doono Yeeri showoon shokko echiyemmone; ciroona aalliyemmone; bi halloon shaddiree arooch beetinaꞌon shaccemmone.

² Asho bullichi ixoo ikke shaahoo tunemmone; asheenaꞌonaa qeesheenaꞌona, guuninaꞌonaa dooninaꞌona, gonneenaꞌonaa genneenaꞌona, kemee beetinaꞌonaa kemmii beetinaꞌona, erettii beetinaꞌonaa erettee beetinaꞌona, hiishechinaꞌonaa hiishee qochiyechinaꞌona, bulliyona ikke shaahoon tunemminaꞌone.

³ Bogaa aalleree showoo shokkoon echemmone; ebiyoo Doono Yeeri gettiti qaaro bi tunetoyich ceennemmone.

⁴ Showoo shuuqqiye; mocee waamo bulliyoo shoolliye; showee toommeexi ogoogeenaꞌo giidoo mucceheete.

⁵ Asheenaꞌo Yeerichi sheeroon boonoshi shaaddetoyich, bi qociyoon boonoshi sheeꞌitoyich, bulli aabee wogoon boonoshi happitoyich, showoon wooriitinaꞌone.

⁶ Ebich ufo showoon aalliyemmone; arooch kotetinaꞌo boonoshi xuꞌee naboona xuuxemminaꞌone; ebich arooch beetinaꞌo miccemminaꞌone; echemminaꞌo giisheche asheenaꞌone.

⁷ Woyinee qomboo shuuqqitone; woyinee uyo aalletone; emiriibee echetinaꞌo bulli tuummitinaꞌone.

⁸ Emiree kambo echetone; kashkuxe emiree cookoo neexetone; emirikkiibeeti ooge ximboo echetone.

⁹ Woyinee uyoon uyibee duubi emiraachemminaꞌone; kashi uyo, uchii beetinaꞌoyich caammemmone.

¹⁰ Happeeti katemee shokkoon echahane; koniyoona giyaachemmoyich, kexo bulli hichehe.

¹¹ Woyinee uyo aalletoyich, asheenaꞌo addibaaboochaa cookemminaꞌone; emiroo bulli aalletone; emiroona wucwucoo showee toommoochee aalletone.

¹² Katemoo tiishetone; bi kelleenaꞌoo tiishee dihitinaꞌone.

¹³ Showee toommeexi aageteenaꞌo bulli toommooch shaggemmo ebiyoommone; zayitee aafo bi mixoochee maceechaa woyee woyinee aafoo bi qomboochee maceechaa arooch giishecho echoommon echemminaꞌone.

¹⁴ Aalloochee muriccii woditinaꞌo emiroona ililemminaꞌone; aabi-gimo waan beetinaꞌo bulli Doono Yeerich oogoon immemminaꞌone.

¹⁵ Ebich, aabi-keyo waanaa Yeerin galletebote; baharee gashoonaa buure showoonoochaa Israꞌeelee Nuggishoo Doono Yeerichi shigoon oogiibote.

¹⁶ “Cadiqo tuneti biich oogo tunebe” immi shoddo showee tuggoochee waayeyemmone. Tunebaani ta, “Dallito taane; dallaa muujjeto taane; taach woowo! Dawushechinaꞌo dawushitinaꞌone; boonoshi dawushoonoo beshii beshii hammitinaꞌone” iyo.

¹⁷ Showee toommooch beetinaꞌote, keqqoo, oppoonaa olloona ittoshin quyee beetone.

¹⁸ Hukkee qaaroochee tiyitona woccimmo, oppooch dihemmone; oppoochee kechimmo, ollooch yecheyemmone; ebiyoo shimaajji mallee kello bi qecheetoyich, showee kotoo bi shuuritoyichiye.

¹⁹ Showoo tiishee gaahehe; showoo qewehe.

²⁰ Showoo masheti ashichoommon dadeddemmone; yongo shuurikkiibeeti bashoon (yambaaroon) shaahemmone; bi axaaxoo biin maggetaa, dihemmone; wochinnoon tiyaachemmone.

²¹ Arooba Doono Yeeri shimaajji halleenaꞌon, showeexi iraasheenaꞌonoo naxemmone.

²² Qoppeenaꞌo oppee maaceexi cuyee kexooch kiceyoommon boonoshiyoo kiceyemminaꞌone; cuyee kexoochoo hichemminaꞌone; meeti aaboyee gubb naxeyemminaꞌone.

²³ Beshe Mawe Doono Yeeri Tsiyooni guudonaa Yerusaaleminoochaa taatemmo bi tunetoyich, agene manderemmine; aabeyoo aaxxeyaachemmine; bi asheenaꞌochi ukkireenaꞌo aafooch bi oogoon bekkiyemmone.