Isiyaasi 23 - Kafa Linguistics Project

Xiroosin Doono Yeeri Naxemmo Tuno

¹ Xiroosichon Doono Yeer waanee getteeti wocho ebine: Tarisheshi markabeenaꞌote, eefote. Xiroosi tiishetine; bi kexonaa markabo neexee xaaꞌoona tiishee aalletone; Qoophiroosaa ittoshi waayemmi woroo ebine.

² Markabechinaꞌo gaanniiti, buure showooch beetinaꞌote, Sidoonee showeexi giixechinaꞌonote, cikkibote.

³ Shihoori maayo, Abbaayi aachi gashoochee qecheti maayo, wodde aacinaꞌo toommona waaꞌi neech giyii beehe; newoo aageteenaꞌoyich giixee xaaꞌee tunehine.

⁴ Sidoone, baharee mishigeene, yeellebe. Baharo, “Maaxoo manjeyaano taane; bushoonoo shiyaano taane; anaami woyee maache bushiishoon dichaano taane” itone.

⁵ Xiroosichi aallee woroo Gibitseenaꞌo waan shagiyooba, Gibitseenaꞌo maaceremminaꞌone.

⁶ Buure showooch beetinaꞌote, woowo geti eefote; Tarisheshoo kimbote.

⁷ Asheenaꞌo emiroona beebee echeti, wonnee wonnee ittoshi katemee ebine? Bi asheenaꞌo wohi showooch hammiꞌi koteti katemee ebine?

⁸ Gubbichoo ukiibeeti katemee toommooch, giixechi bi asheenaꞌo iraasheenaꞌonaa showee toommooch moogeetinaꞌona tuneti ebi Xiroosi toommooch, ebin tuniiya gabito konine?

⁹ Oogoo taane ii geecoon aalliyoyich, showee toommooch beeti, qelloon yeepphii beetinaꞌon giishiyoyich, ebin gabito Beshe Mawe Doono Yeerine.

¹⁰ Tarisheshi asheenaꞌote, ittoshich bajjemmo aallo bi tunetoyich, Abbaayi aacochoommon ittoshi showooch tahee bullebote.

¹¹ Doono Yeeri baharee toommooch bi kishoon yaggiꞌi, taatittineenaꞌon shuurikkiye; Kanaaneenaꞌochi mishigeenaꞌo happeyemmoyich gettiye.

¹² Ishichiinoo iye: “Xukketi Sidooni asheenaꞌote, ebiyee bekk emiriyaahote; tiyii Qoophiroos ittoshi hammitaanona arooch kashe koteyaachemmo ittoshine” iye.

¹³ Baabloonee showoon ciinote; are showeexi asheenaꞌo aalletinaꞌone; Asooreenaꞌo boonoshi showoon kubbi cooxinaꞌochi kuppee budon tuniitinaꞌone; arooch boonoshi dilaaloon shuuneheete; mishigeenaꞌon happiꞌi showoon xaqqee gutoon tuniiheete.

¹⁴ Tarisheshi markabeenaꞌote, ittoshi mishigo happaa aalletoyich woowo, geti eefebote.

¹⁵ Arooba Xiroosi shabe nati wottoon batteyemmine; ebiyoo ikke taatoochi yemeenoone; shabe natoyee gubb yahechi ureyich shoddeeti shoddo Xiroosi toommooch tunemmone; ebiyoo:

¹⁶ “Batteeti yahechi ureene, ne ximboon yeshe; katemee daggoona guude. Ne shalligeyemmoyich, ne qaaroon gaawichi shoddebe; woddiireeshoo shoddebe” ii beetone.

¹⁷ Shabe natoyee gubb, Doono Yeeri, Xiroosin gawukkaa, biyoo aafi bi shuunooch wotteree showee toommeexi taateenaꞌona tookki giixe yahemmine.

¹⁸ Giixoochee bi danemmi gijjoo bulli Doono Yeerich kechemmone; ebiyoo koteyaachemmone; bi shimo Doono Yeeri aafooch maddee beetinaꞌoyich, beshaa beshe maayoonaa gaawe tahoonooch heechemmone.