Isiyaasi 22 - Kafa Linguistics Project

Yerusaalemin Doono Yeeri Naxemmo Tuno

¹ Yaaꞌee Bambeechon Doono Yeer waanee getteeti wocho ebine: Kechi toommooch ittoshi bulli, ittoshi kechito amoyichiye?

² Hini cangecheebeeti katemee, emiroona xuupphaabeeti katemeene; ne daggoochaa guureetinaꞌo goraadoona guureetinaꞌo woyee koyoochaa qititinaꞌo tooneenaꞌone.

³ Ne iraasheenaꞌo ikke maꞌonona awureyaanoon, wocciibee kecceheete; wohooch beddaahaa boonoshi woccitaanona boonoshi bulli yeshaa cucheheete.

⁴ Ebich tawoo, “Ittoshi qayaa tiitteree eefona; taan goggiiya qiicceyaahote; qititi ta asheenaꞌoyich eefona” iyoye.

⁵ Hini, Beshe Mawe Nuggishoo Doono Yeeri, Yaaꞌee Bamboochaa keqqoon, neecheyoonaa dulloonon bi deebiti aaboone. No katemee xaqqee uxeroo happeeyee aabo, guudo waan cookee aaboone.

⁶ Elaamee ginee naayinaꞌo maꞌoonaa shangoonon yechiꞌi, hareshoonaa gaarinon yebbeꞌi waaheete; Qiiri showee ginee naayinaꞌoo boonoshi gaachoon qanniitinaꞌone.

⁷ Gaawe ne bambeenaꞌooch gaarinaꞌo ceennitinaꞌone. Hareshechinaꞌoo katemee kellooch neexetinaꞌone.

⁸ Yihudee mishigo happaa aalletone. Ebiyooba Shaaree Kexo getteebeeti kexooch kiceeti ginee qiicoon gibenehote.

⁹ Daawiti Katemee xaqqee uxeroo woddii tiishoon beeggiyote; deshi kote aacon kiciyote.

¹⁰ Yerusaalem beeti kexon haddiyote; uxeroo uxereyemmi xaqqoon danoyich kexon happiyote.

¹¹ Wonnee aachi oppoochee ufeebeeti aacon kicoyich gutte uxeree daggooch aachi oppoon qanniihote; tunebaani ebi bullin shiichii yameꞌi tuniiti Yeerin gabaano ittoshine.

¹² Arooba Beshe Mawe Nuggishoo Doono Yeeri, qelloon cakke dookoon taheree, eefi ittoshi cookemmoyich ittoshin ceeggitone.

¹³ Tunebaani emiroo, wucwuco, maaꞌoon guuroo, bagoon bashoo, meenon mamonaa woyinee uyoon uyona tunehe; “Yaach qitemmo no tunetoyich maa uyone” iyote.

¹⁴ Beshe Mawe Doono Yeeri bi qelloona taach ishichiye: “Ebi ittoshi axaaxoo ittoshi qitimmi wottoon ittoshich maareyaachemmone” iye Beshe Mawe Nuggishoo Doono Yeeri.

¹⁵ Beshe Mawe Nuggishoo Doono Yeeri, ishichiye: “Tiyi hamiree taatee kechi ukkiroo Shebinich ishichibe:

¹⁶ ‘Ne koni neene? Hini xaaꞌooch ne qellich oppoon ne qanniyemmoyich, geppe xaaꞌooch oppoon ne shuuniito, ne cahoo qeyemmi sheqqoon xaqqee gogginooch ne gooshiito aalloon koni neech imenane?

¹⁷ Hini beelle uroocho, Doono Yeeri neen kaama tiijjiree, curullii awuremmone.

¹⁸ Neen qodi halluulliiree, haalloochoommon gamini showooch duppemmone; aroochaa qitemmo neene; ne doono kexooch yeelliibeeti ashoon tunemmo neene; ne geecoo tuneti gaarinaꞌo arooch echemminaꞌone.

¹⁹ Ne iraashittinoochee neen yookkemmo taane; ne oogoochee kindemmo neene.

²⁰ “ ‘Arooba ta guuno, Hiliqiyichi bushoo Eliyaqimin ceeggemmo taane;

²¹ ne oogee tahoonoo biich tajjemmo taane; ne buroonoo bi cuyemmoyich tuniyemmo taane; ne iraashittinoon bi kishooch beshiiree immemmo taane; biyoo Yerusaalemi beetinaꞌonaa Yihudee yareenaꞌonoyich nihoo tunemmone.

²² Daawitichi yareenaꞌo qulfoon biich immemmo taane; bi hicciton koniyoona qechaachemmone; bi qechiton koniyoona hicaachemmone.

²³ Gibeneeti xaaꞌooch xuuree kaꞌoochoommon biin xogemmo taane; bi nihoochi kechi asheenaꞌoyich oogee xaaꞌoon tunemmone.

²⁴ “ ‘Bi nihoochi kechi asheenaꞌo, bi bushiisheenaꞌonaa bi bushaa bushiisheenaꞌona biich shaagoon tunemminaꞌone; siinoonaa qondoonooch beddaahaa, qiico bulli kaꞌooch kaqqeyoommon, bi toommooch kaqqeyemminaꞌone’ gete” iye.

²⁵ Beshe Mawe Doono Yeeri ishichiye: “Arooba gibeneeti xaaꞌooch xogeeti xuuree kaꞌo waaxeree hollemmone; arooch kaqqeti qiico bulli holli kawucemmone” iye; ebin gettito Doono Yeerine.