Isiyaasi 21 - Kafa Linguistics Project

Baabloonin Doono Yeeri Naxemmo Tuno

¹ Baharee gashooch beeti baraheechon Doono Yeer waanee getteeti wocho ebine: Negeebi barahoochee tiyiibeeti yuboochoommon, barahoochee, shattiibeeti showoochee aallo woyemmone.

² Shattiibeeti yaaꞌoo taach bekkehe; ebiyoo beshii imonaa aalloonane. Elaamee ginee naayinaꞌote, tibote. Meedoonee ginee naayinaꞌote, katemoon giishote. Baabloonichi naboona shaggiti xuuxo bullin Yeeri aalliyemmone.

³ Ebich ta shimetoo kuxehe; maaxoo maanjaabeeti ureen shaahiyo; ta waayeti mooyoyich keqqiyo; ta beeggeti mooyoyichoo ta aafo shaawiye.

⁴ Ta mullo duubbiye; shato taan qewiihe; showoo xumemmoyich qaatiyo; tunebaani keqqoyee besh, amoonolla taach deebaanoone.

⁵ Ebi yaaꞌoona, gifiroon qannii boonoshi beetaa, kotee xaaꞌoonoo qannii boonoshi beetaa beeggeho; asheenaꞌoo maa uchii beetaa, “Ginee iraasheenaꞌote, tibote; ittoshi gaachoon zayitoona huutote” getteehe.

⁶ Doono taach ishichiye; “Hamiree qayechon neechibe; biyoo bi beeggii beeggiton gete.

⁷ Gutti gutteꞌi gaarinaꞌon gasheebeeti hareshechinaꞌon, kureenaꞌon yebbetinaꞌon, gaaleenaꞌon yebbetinaꞌonoo bi beegigaata, manjii ciine; gaawichi manjii ciine” iye.

⁸ Qayechoo ishichii cookiye “Ta doonocho, areddoo bullin dilaalooch neexaabeeto taane; xumo bullinoo ta quyee xaaꞌooch beeto taane.

⁹ Ebiyoche, gutti gutteꞌi gaarinaꞌon gasheebeeti hareshechinaꞌo waa beetinaꞌone” iye; biyoo wochiꞌi, “Baablooni dihitane; dihitane. Bi shahalleenaꞌo bulliyoo tiishee buriceꞌi showooch dihiteete” iye.

¹⁰ Maayi buchi xaaꞌoochaa bucheti ta asheenaꞌote, Israꞌeelee Nuggishoo, Beshe Mawe Doono Yeer waanee ta waayeton ittoshich getteto taane.

Edoomin Doono Yeeri Naxemmo Tuno

¹¹ Edoomee showeechon Doono Yeer waanee getteeti wocho ebine: Ikke uro Seyir waanaa, taan ceeggiꞌi, “Qayechocho, showoo aatane bi haremmo? Qayechocho, showoo aatane bi haremmo?” iye.

¹² Tawoo wochaꞌa, “Haroon, hariya ii beetone; tunebaani wochi xumemmone; echoon ittoshi qaawigaata, echebote; wochinnoon wotteree wobote” iyo.

Arabin Doono Yeeri Naxemmo Tuno

¹³ Arabee showeechon Doono Yeer waanee getteeti wocho ebine: Arabee baraheexi tushooch qeyiibeeti, Dedaani baraheexi asheenaꞌote,

¹⁴ shacheweꞌi ittoshi waan waa beetinaꞌoyich aacon imbote. Teemi showooch beetinaꞌote, yookketinaꞌoyich maayoon imbote.

¹⁵ Ebiyoo goraadoochee, kaacheti goraadoochee, qojjeeti maꞌoochee, gaamiti koyoochee muriccitinaꞌo boonoshi tunetoyichiye.

¹⁶ Ebich Doono Yeeri taach ishichiye: “Shuunooch giyiti asho shuunee aaboon bi haddoommon, Qedaarichi oogo ikke nati daggooch ciyemmone;

¹⁷ Qedaari yaroochee shangoon awureebeeti ginee anaamo echemmo giishechoone; Israꞌeelee Nuggishoo Doono Yeeri ta, ebin getteto taane” iye.