Isiyaasi 20 - Kafa Linguistics Project

Gibitsinaa Topphiyoonon Doono Yeeri Naxemmo Tuno

¹ Asooree taatoo Sarigooni wocheti ginee iraashoo, Ashidood waaꞌi Ashidoodin kochii yechiye.

² Arooba Doono Yeeri Amootsi bushoo Isiyaasin, “Dookoon ne qeddoochee shoote; caammoonoo ne baatoochee kichibe” iye. Isiyaasiyoo deꞌa iꞌi shokke qeddoon, shokke baatoonoo shaꞌee beehe.

³ Aroochee Doono Yeeri ishichiye: “Ta guuno Isiyaasi Gibitsinaa Topphiyoonoyich malletoonaa worganikkiti mooyona bi tunemmoyich, keejje naton shokke qeddoonaa shokke baatoona bi shaꞌoommon,

⁴ Asooree taatoo, kecceti Gibitseenaꞌonaa Topphiyeenaꞌonon, gurimaashoonaa geenoonon, shokke qeddoonaa shokke baatoonon tuniiree daammemmone; boonoshi achoon shokko tuniiree, Gibitseenaꞌon yeelliyemmone.

⁵ Topphiyoon gibenetinaꞌo, Gibitsina yebenetinaꞌoo keqqemminaꞌone; yeelleshoo getteminaꞌone.

⁶ Arooba are baharee gashooch beeti asheenaꞌo, ishichemminaꞌone: ‘Asooree taatoo kishoochee noon boonoshi wodiyemmoyich gibenaꞌa, boonoshi waan no giddetinaꞌo, amoon boonoshi tuneto gaata beegote; nowochi aabichireeshiye no muriccemmo?’ gettemminaꞌone” iye.