Isiyaasi 2 - Kafa Linguistics Project

Bulli Yemeenoon Beeyemmi Diggoo

¹ Amootsi bushoo Isiyaasi Yihudee showeechonaa Yerusaalemichonon bi beeggito ebine:

² Ciiree yemeenooba, Doono Yeerichi yaafee kexo beeti guudo, guudinaꞌo bulliyee beshiree bekkemmone; geppeenaꞌo toommooch qaalli bekkemmone; aageteenaꞌo bulli arooch orihe woyemminaꞌone.

³ Meeti asheenaꞌo waaree ishichemminaꞌone: “Sheeroo Tsiyoonee, Doono Yeerichi qaaroo Yerusaalemee bi kechii beetoyich, ittoshi waataa damba Doono Yeerichi guudooch, Yaaqobichi Nuggishoo yaafee kexooch hambone. Biyoo, bi gommon nooch dojjemmone; nowoo, bi bekkiiti boochoona hammemmo noone” gettemminaꞌone.

⁴ Biyoo aageteenaꞌo daggooch nalliree, meeti asheenaꞌo daggooch beeti kaaroon aalliyemmone; boonoshiyoo, boonoshi goraadoon maaneshooch, boonoshi ginoonoo magaadooch wochiree qiccemminaꞌone. Ikke aagetoo bi goraadoon tiijjiree bare aagetoona koyeyaachemmone; aroyee gubb, ginee koyoon doyaachemminaꞌone.

⁵ Yaaqobichi yareenaꞌote, ittoshi waataa, Doono Yeerichi bekkoona shaꞌebone.

Getaa Giyaaneenaꞌochi Aallo

⁶ Yaaqobi yareenaꞌo tuneti ne asheenaꞌon qajjeto neene; ebiyoo showoo aabi-keyo waani asheenaꞌochi qaaxoona, Filsixeemeenaꞌochi iicoonoo bi ceennitoyichiye; asheenaꞌoo dallaaweenaꞌona tookkii guuphitinaꞌone.

⁷ Boonoshi showoo birewoonaa aachoona ceennitone; boonoshi gaanno haddoyee beshitone; boonoshi showooch hareshoo ceennitone; boonoshi gaariyoo haddoyee damboone.

⁸ Boonoshi showooch shahalleenaꞌo ceennitinaꞌone; boonoshi hajjee kishoona boonoshi shuuneti mooyinaꞌoyich goyinneheete.

⁹ Ebina asho bulli giisheree cooneyemmone. Boonoshin maariyaahine.

¹⁰ Doono Yeerichi shattiyoonaa bi oogee yiiroonoochee tiyitona xaqqee gofooch, showee daggooch aashebote.

¹¹ Cooddiibeeti asho giishemmone; geecechi asheenaꞌoo yittemminaꞌone; arooba Doono Yeeri baach oogemmone.

¹² Beshe Mawe Doono Yeeri, geecechinaꞌo bullinaa cooddii beetinaꞌo bullinon, ciixee beetinaꞌo bullinoo bi cooniyemmi aabo beetone.

¹³ Genjoonaa beshii bekkee beetona tuneti Libanoosee yigee mixinaꞌo bullin, Bashaanee showeexi meelleenaꞌo bullin,

¹⁴ ogooge guudinaꞌo bullin, qaallii bekkeebeeti geppeenaꞌo bullin,

¹⁵ genje dilaaleenaꞌo bullin, manje xaqqee uxereenaꞌo bullin,

¹⁶ Tarisheshi markabeenaꞌo bullinaa mallet gaawe aachi gooneenaꞌo bullinon bi aalliyemmi aabo beetone.

¹⁷ Ashi coodo kindemmone; asheenaꞌochi geecoo giishemmone. Arooba Doono Yeeri baach oogemmone.

¹⁸ Shahalleenaꞌo ciroona aallemminaꞌone.

¹⁹ Doono Yeeri showoon shuurikkiya bi tiyiyooba, bi shattiyoonaa bi oogee yiiroonoochee tiyitona asheenaꞌo xaqqee gogginonaa showee oppoonooch giyemminaꞌone.

²⁰ Arooba asheenaꞌo, goyinneya boonoshi shuuneti birewoonaa aachoonoochee shuuneeti shahalleenaꞌon, ecceenaꞌonaa shakishakeenaꞌonoyich duppemminaꞌone.

²¹ Doono Yeeri showoon shuurikkiya bi tiyiyooba, bi shattiyoonaa bi oogee yiiroonoochee tiyitona asheenaꞌo xaqqee gofoonaa gogginonooch giyemminaꞌone.

²² Bi hiinno muddooch beeti ashoon gibeneyaahote; aroo amoyichona gaacaachemmone.