Isiyaasi 19 - Kafa Linguistics Project

Gibitsin Doono Yeeri Naxemmo Tuno

¹ Gibitsee showeechon Doono Yeer waanee getteeti wocho ebine: Doono Yeeri quboon yebberee, afaafinoona Gibitsee showooch woyemmone; Gibitseenaꞌochi shahalleenaꞌo bi aafooch qewemminaꞌone. Gibitseenaꞌo mulloo keqqoona muujjemmone.

^2-4 Doono Yeeri ishichiye: “Gibitsee asheenaꞌochi toommooch Gibitsee asheenaꞌo tiyemmoyich tuniyemmo taane; asho bulli, manoo bi manoo toommooch, giyoo bi giyoo toommooch, katemoo katemee toommooch, taatee showoo taatee showee toommooch tiyemmoyich tuniyemmo taane. Gibitseenaꞌo mullo baallemmone; boonoshi yamoonoo duubo tuniyemmo taane; boonoshiyoo boonoshi shahalleenaꞌon, kaayechinaꞌon, qite ashoona yibbaatee beetinaꞌonaa allaameenaꞌonon echemminaꞌone. Gibitseenaꞌon maacmanje doono kishooch beshiiree immemmo taane; hatiibeeti taatoo boonoshin hajjemmone” iye Beshe Mawe Doono Yeeri.

⁵ Abbaayi aacinaꞌo tahemminaꞌone; woce aacoo shappi hami tahemmone.

⁶ Woce aaco shaaqqemmone; Gibitsee showeexi gishiishi aacinaꞌo shappemminaꞌone; tahishoo gettemminaꞌone; kohoonaa duukkoona shoollemmone;

⁷ Abbaayi aachi gashooch beeti becheenaꞌo shuuqqemminaꞌone. Abbaayi gashooch shookketi maayo bulli shuuqqemmone; yongo amoonolla echiyaanoon tiijji daammemmone.

⁸ Haashe yesheenaꞌo ayini eeppemminaꞌone; Abbaayi aachi toommooch qamaaxiroon duppiibeeto bulli eeppemmone; aachi toommooch dabboon duppiibeeto bullichi giidoo qajjemmone.

⁹ Haatteeti muttee tuppoon shippii beetinaꞌo, nacce tahoon shippii beetinaꞌo gibenoon kuxxemminaꞌone.

¹⁰ Qoreddoon shippii beetinaꞌochi mullo tiishemmone; gijjoo qocaa shuunee beetinaꞌoo tuummemminaꞌone.

¹¹ Tsoꞌaan beeti iraasheenaꞌo tuusheenaꞌone; yiiteenaꞌo tuneti Faroonichi mikkirechinaꞌo gaacaalli ciicoon ciicciyeete. Aabichiꞌi Faroonich, “No, wonnee yiiteenaꞌochi bushiishoo noone; wonnee taateenaꞌochi bushiishoo noone” iyeete?

¹² Gibitsee taatoocho, ne yiiteenaꞌo aayeete? Eke, Beshe Mawe Doono Yeeri Gibitsee showee toommooch bi gabiti gaboon neech geti arichiibeete.

¹³ Tsoꞌaani iraasheenaꞌo tuusheenaꞌo tunetinaꞌone; Memifisi iraasheenaꞌo dacheetinaꞌone; yoodi yoodeexi aricheti asheenaꞌo Gibitsin muriciitinaꞌone.

¹⁴ Doono Yeeri xummittinee ayaanoon bi daggooch gedditone; mashecho bi cooyo giinaa bi dadeddoommon, Gibitsinoo bi tuniibeeti mooyo bullina bi dadeddemmoyich tuniiheete.

¹⁵ Gibitsee showooch qello tuneba ceero, yeebbee waamo tuneba koho, amoonolla tuniyoon hakkaache.

¹⁶ Arooba Gibitseenaꞌo maacheen shaahemminaꞌone; Beshe Mawe Doono Yeeri boonoshi toommooch bi mochoon bi tiijjimmona shati qewemminaꞌone.

¹⁷ Yihudee showoo Gibitseenaꞌon keqqichemmone; Beshe Mawe Doono Yeeri Gibitseenaꞌo toommooch tuniiya bi gabitoochee tiyitona Yihudichon waayemmo bulli shattemmone.

¹⁸ Arooba Gibitsee showooch beeti uuche katemeenaꞌo Kanaanee noonoona yibbaatemminaꞌone; Beshe Mawe Doono Yeerichon tunoyich wogoon giyemminaꞌone; ebi katemeenaꞌoochee ikkoo Aabee Katemoo getaa ceekkemmone.

¹⁹ Arooba Gibitsee showee daggooch, Doono Yeerich deejjee gudo shuuneyemmone; bi danoochoo Doono Yeerich malletee giimboo neexemmone.

²⁰ Ebiyoo Gibitsee showooch Beshe Mawe Doono Yeerich malletoonaa miixoona tunemmone; asheenaꞌo boonoshin xuuxii beetinaꞌochi naboona Doono Yeer waan boonoshi cookaa, wodiyechonaa gaachoonon boonoshich deejjemmone; biyoo boonoshin wodiyemmone.

²¹ Doono Yeeri Gibitseenaꞌoyich, koni bi gaata arichiyemmone; boonoshiyoo arooba Doono Yeerin ariyemminaꞌone; deejjoonaa maayi buuroonon giddiyoona biich goyinnemminaꞌone; Doono Yeerich mookkoon mookkemminaꞌone; boonoshi mookketonoo ceechemminaꞌone.

²² Doono Yeeri Gibitsee showoon yexxemmone; yexiichishoo wochi wodiyemmone; boonoshiyoo Doono Yeer waan wottemminaꞌone; biyoo boonoshi qolloon waayeree boonoshin wodiyemmone.

²³ Arooba Gibitsee showoochee Asooree showooch gamini gommo kechemmone; Asooreenaꞌo Gibitsee showooch, Gibitseenaꞌo Asooree showooch hammemminaꞌone; Gibitseenaꞌonaa Asooreenaꞌona ikkotteree goyinnemminaꞌone.

²⁴ Arooba Israꞌeeli, Gibitsee showoonaa Asooree showoona tookki keejjinnee tune haddeyemmine; showoo bullichoo diiroo tunemminaꞌone.

²⁵ Beshe Mawe Doono Yeeriyoo “Ta asheenaꞌo tuneti Gibitseenaꞌo, ta kishee shuuneenaꞌo tuneti Asooreenaꞌo, ta iristeenaꞌo tuneti Israꞌeeleenaꞌo diireebeete” geti diiremmone.