Isiyaasi 18 - Kafa Linguistics Project

Topphiyoon Doono Yeeri Naxemmo Tuno

¹ Topphiyee aacinaꞌoyee beqach beeti, bi qoshoo yexo waayeebeeti showoyich woowo!

² Bi wocheyechinaꞌon kohoochee shuuneeti aachi goonoona, Abbaayi aachi toommona daachii beetone. Hini afaafinechi wocheyechinaꞌote, neexi genjeenaꞌonaa naalle qeddechinaꞌona tuneti, woheexonaa katineexona shattiibeeti, hakkechinaꞌonaa giidechinaꞌona tuneti, boonoshi showoo aacona qoodeeti, ittoshi asheenaꞌo waan wotteree hambote.

³ Showee toommo bulliich beeti asheenaꞌote, malletoo guudi toommoochaa bekkoon, ciinote; shameto hukkoonoo waayebote.

⁴ Doono Yeeri taach ishichitone; “Turaarooch nibboona aaxxaabeeti aabeechoommon, maayi qecci goorooch kindiibeeti doshoochoommon (caagibanoochoommon) shimaajji ta kexoochaa nibboona dugilla ciinnaabeeto taane” itone.

⁵ Woyinee aafo macee gooroyee shiichiꞌi woyinee bungoo ooyaa, aafoo kashiyooba, woyinee ateenaꞌo aci shikkoona kuxaa boonoshi duppoommon, Doono Yeeri are showeexi asheenaꞌon aalliyemmone.

⁶ Boonoshi bulliyoo guudi toommeexi gaceenaꞌonaa kubbi cooxinaꞌonoyich tunemminaꞌone; qaawoona gaceenaꞌo yooyona kubbi cooxinaꞌo boonoshin maayemminaꞌone.

⁷ Arooba Beshe Mawe Doono Yeerich, neexi genjeenaꞌonaa naalle qeddechinaꞌona tuneti, woheexonaa katineexona shattiibeeti, hakkechinaꞌonaa giidechinaꞌona tuneti, boonoshi showoo aacona qoodeeti, aageteenaꞌo waanee wojjoo woyemmone; boonoshiyoo Beshe Mawe Doono Yeerich goyinneebeeti Tsiyooni guudooch deebemminaꞌone.