Isiyaasi 16 - Kafa Linguistics Project

¹ Moꞌabee asheenaꞌo, bagee baaddeenaꞌon barahooch beeti Selaahee, Tsiyooni maache bushee guudi toommooch beeti are showee taatoyich daachiyemminaꞌone.

² Moꞌabee maacheenaꞌo Arinooni aachi kimoochaa, boonoshi kexoochee yookkeꞌi cikkii okk hach yoobbiibeeti kafeenaꞌoommon tunemminaꞌone.

³ Moꞌabee wocheyechinaꞌo Yihudee asheenaꞌoyich, “Noon boyebote; no nalloon nallibote. Aabee qellayooch, ittoshi yiiroo xumi manderoochoommon no toommooch yiirebe; yookketi noon aachibote; noon beshiiree immaahote.

⁴ Moꞌabee yookketi no ittoshi waan kotebone; shoobon tuneree, noon aalliyoyich waa beetinaꞌo waanee noon wodiibote” gettemminaꞌone. Neexaa hajjeyoonaa aalloona, baatoona koteyoo showoochee aallemmona,

⁵ aroochee taatee qeeno shoodoona manjemmone; are qeenooch Daawiti yaroochee iberittinoon qaawiibeeti, dayinnetoon tuniyoyich afaafineebeeti, gibeneeti taatoo kotemmone.

⁶ Yihudee asheenaꞌo ishichemminaꞌone: “Moꞌabeenaꞌo am shaahe geecechinaꞌo gaata, boonoshi geecii cunnennoon, boonoshi coodonoo waayeto noone; boonoshi kokkoroo duuboone” gettemminaꞌone.

⁷ Ebich Moꞌabee asheenaꞌo eeppemminaꞌone; Moꞌabee asheenaꞌo bulliyoo eeppemminaꞌone; Qiir Hareseti katemeexi gaawe maayoon gabiichi oogichi ayini eeppemminaꞌone.

⁸ Heshiboni goyoonaa Sibimi woyinee bechoona shoollitone; ebiyee aaf, ebi aroochee qanniti woyinee uyoona aagetee iraasheenaꞌo mashetinaꞌone; bi ato Yazeeri katemooch shaggitone; wotta barahooch beddaahaa, baharooch beddaahaanoo gafgappitone.

⁹ Ebich Yazeerich ta eefoommon, Sibimi woyinoyich eeppehoye; Heshiboninaa Elaleehinoyich acimoona taabbehoye; ebiyoo qecceyemmi maayo aalletaa emiree shoddo echetoyichiye.

¹⁰ Emiroonaa wucwucona aafeebeeti goyee budoochee wokkitone; woyinee budoochaanoo shoddoon shoddoonaa ililoona echetone; woyinee aafoon oppoochaa hiicciibeeto aalloone; boonoshi shoddee qaaroon Yeeri aalliitone.

¹¹ Ebich ta mullo Moꞌabich, ta maacee meenoo Qiir Haresetich ooge ximboon yexxecho yexxiibee shooshoommon shooshee ayinii beetone.

¹² Moꞌabeenaꞌo geppee toommeexi goyinnee xaaꞌooch hamona boonoshi aajjitaa, yaafee kexooch corootiya boonoshi hammitaa, ebi bulli boonoshich amoonolla gaacaachemmone.

¹³ Doono Yeeri ebiyee aaf bi gettiti Moꞌabichi mooyo ebine.

¹⁴ Tunebaani and Doono Yeeri ishichiye: “Shuunooch giyiti asho shuunee aaboon bi haddoommon, Moꞌabich oogoonaa dofee bi ashoona haddeeti keejje nati daggooch giishemmone; giisheche ashoonaa hakka guutoona baach echemmone” iye.