Isiyaasi 15 - Kafa Linguistics Project

Moꞌabin Doono Yeeri Naxemmo Tuno

¹ Moꞌabichon Doono Yeer waanee getteeti wocho ebine: Moꞌab beeti Ari katemoonaa Qiiri katemoona ikke xumoon aallemminaꞌone.

² Diibooni asheenaꞌo eeppa guudi toommeexi boonoshi yaafee kexooch hammemminaꞌone; Moꞌabee asheenaꞌo boonoshi katemeenaꞌo Neebinaa Medeebinoyich shooshe eeppemminaꞌone. Boonoshi qelloonaa boonoshi ishaanoonon cakkemminaꞌone;

³ dookoon taheree gommooch kechemminaꞌone; kechi toommoochaa, addibaaboochaanoo bulliyona acimoona taabbebee eeppemminaꞌone.

⁴ Heshiboninaa Elaleehinoochee cookoo waayeehe; boonoshi qaaro Yahaats beddaahaa waayeehe; ebich Moꞌabee ginee naayinaꞌo bunneheete; boonoshi mullo qewehe.

⁵ Ta mullo Moꞌabich eeppiye; bi asheenaꞌo Tsoꞌarinaa Egilaat Shelishiyinooch beddaahaa goojjiyeete; eefeebee Luhiiti deshee damboon hammiyeete; boonoshi toommooch shaggiti aalloyich cookiibee Horonayim hammiyeete.

⁶ Nimiriim aacoo tahiye; mocere mooyo aallemmi wottoon, bi gaꞌeexi mocoo shuuqqiye.

⁷ Ebich boonoshi daneti gaannoonaa boonoshi yaaphoonon Akaayee aacoyee beqach daammemminaꞌone.

⁸ Boonoshi cookee qaaro Moꞌabee showee danooch beddaahaa waayeyemmone; bunnee qaaro Egilayiminaa Beer Eliiminooch beddaahaanoo waayeyemmone.

⁹ Diibooni katemeexi aacooch damoo ceenniye; tunebaani Yeeri ebiyee beshe mooyon Diibooni toommooch deebemmone; Moꞌabee goojjitinaꞌonaa arooch beetinaꞌonochi toommooch daaheroon deejjemmone.