Isiyaasi 14 - Kafa Linguistics Project

Israꞌeeleenaꞌo Kecoochee Wotto

¹ Doono Yeeri Yaaqobich ariqqemmone; Israꞌeelinoo wochinnoon kaaccemmone; boonoshi hajjee showooch boonoshi beeyemmoyich tuniyemmone. Shiqqeenaꞌo boonoshi waan waaree, Yaaqobichi yareenaꞌona tookki ikkottemminaꞌone.

² Meeti aageteenaꞌo Israꞌeeleenaꞌon boonoshi showooch deeni daammemminaꞌone; Israꞌeelee yareenaꞌo aageteenaꞌon Doono Yeerichi showoochaa guunonaa gonneenon tuniiree hajjemminaꞌone; boonoshin keccitinaꞌon keccemminaꞌone; neexxii hajjitinaꞌon hajjemminaꞌone.

Baabloonee Taatoo Maash Hamo

³ Doono Yeeri shooddoochee, xuuxoonaa ne beeti qaaꞌi guuchittinonoochee neen bi kashiihooba,

⁴ Baabloonee taatoo toommooch ishichibee coonemmo neene: “Neexxii hajjito aabichiꞌi kashehe! Ebiyee gubb koninolla hajjaachemmone.

^5-6 Doono Yeeri, aageteenaꞌon naxoona, kuxeyaani kaaroona yexxiti, xuuxiiꞌi kaaroona hajjiti, gondeenaꞌochi gumboon, iraasheenaꞌochi yaaboonoo tiichitone.

⁷ Showoo bulliyoo kashee, tooqqitone; emiroona shoddee beetone.

⁸ Yigee mixinaꞌonaa Libanoosee ciideenaꞌona, ‘Ne dihitoyich, mixon kuxxecho no waan waataachemmone’ getibee emiremminaꞌone.

⁹ “Ne waataa, neenna daneya maasho shuuriye; showee iraasheenaꞌo tuneebee echetinaꞌo bulli neenna daneya shuuriyeete; aagetee taateenaꞌo tuneebee echetinaꞌo bulliyoo boonoshi taatee qeenoochee tiyiyeete.

¹⁰ Boonoshi bulliyoo neech ishichemminaꞌone: ‘Newoo noochoommon hakka guutoo tunaa noon shaahinne!

¹¹ Ne oogoonaa ne ximbee qaaroona maash kinditone; ne qeyi beeroo pilo, ne tahoo hipperoo tunemmone’ getteminaꞌone.

¹² “Haree xojjeno, gaargaaree bushoocho, aabichaꞌa shimaayoochee hollinne! Ebiyee aaf aageteenaꞌon cooniitocho, aabichaꞌa showooch duppenne!

¹³ Ne mulloona ishichihine: ‘Shimaajj kechemmo taane; ta taatee qeenonoo Yeerichi xojjeneenaꞌoyee tookk tuniyemmo taane; wohooch, dambi-waan beeti, nuggisheenaꞌochi iitee xaaꞌooch kotemmo taane;

¹⁴ qubeenaꞌoyee tookk kechemmo taane; Beshoo Yeerin shaahemmo taane’ iyine.

¹⁵ Tunebaani and Siꞌoolooch, maash kindito neene.

¹⁶ “Neen beeggimminaꞌo manjii ciiniichi ishichemminaꞌone: ‘Showoon shuurikkiti, taateenaꞌon qewiiti,

¹⁷ showoon barahoo tuniiti, katemeenaꞌon happiti, qoppeenaꞌonoo boonoshi kexooch wochaani uro hinine?’ gettemminaꞌone.

¹⁸ “Aageteenaꞌochi taateenaꞌo bulli boonoshi oogoona boonoshi maash maashooch kashetinaꞌone.

¹⁹ Tunebaani ne, duppeti michi atoochoommon ne oppoyee maach duppeto neene; ne dubeno ginoochaa qititinaꞌochi dubenoona qereetone; xaqqechi oppooch dufaa neechetone.

²⁰ Ne showoon ne aalliitoyich, ne asheenaꞌonoo ne wuxitoyich, bare taateenaꞌochoommon duukkeyaachemmo neene. Gondeenaꞌochi yaroo ciroona dooggemmone.

²¹ Boonoshi qaabbechinaꞌochi gondoyich, bi anaami bushiisheenaꞌo guureyemmi xaaꞌoon qanniibote. Ebiyoo tiyi showoon woraashiree, meeti katemoon boonoshi shuuneyaachemmoyichiye” gettemmo neene.

²² “Boonoshi toommooch tiyemmo taane” iye Beshe Mawe Doono Yeeri. “Bi shigoonaa bi curoonon, bi yaroonaa bi shiijjeroonon Baabloonee kuxxemmo taane” iye Doono Yeeri.

²³ “Baabloonin caayo beeyi xaaꞌoon, aachi taappoon tuniyemmo taane; hidii aalliibeeti kawoona hidi aalliyemmo taane” iye Beshe Mawe Doono Yeeri.

Asoorin Doono Yeeri Naxemmo Tuno

²⁴ Beshe Mawe Doono Yeeri ishichii wogetone: “Ta gabitoommon tunemmone; ta maaccetoommonoo shuunooch heechemmone.

²⁵ Asoorin ta showee toommoochaa aalliyemmo taane; ta guudi toommoochaanoo neexi kotemmo taane; bi waanjoo ta asheenaꞌo toommoochee tiyemmone; bi shaagoo boonoshi gogoochee kindemmone” iye.

²⁶ Showoo bulliich gabeeti gaboo ebine; aageteenaꞌo bulli toommoochoo tiyiti mochoo hinine.

²⁷ Beshe Mawe Doono Yeeri ishichii gabitone; konine bajjemmo? Bi mochoonoo tiijjitone; konine wochemmo?

Filsixeemin Doono Yeeri Naxemmo Tuno

²⁸ Taatoo Akaazi qititi natooba, getteeti wocho ebine:

²⁹ “Filsixeemeenaꞌote, ittoshin yexxiti gumbo tiishetoyich ittoshi bulli emiriyaahote; dingeree xepphoochee xekeree kechemmine; bi gabexoochee awureebeeti dingero qoppeyemmone.

³⁰ Amolla aalli girechinaꞌo maayemminaꞌone; gichechinaꞌo carete qeyemminaꞌone; tunebaani Filsixeemo tuneti ittoshi yaroon shaacoona wuxemmo taane; ittoshi curoonoo aalliyemmo taane” iye.

³¹ Kelleenaꞌoochaa woowo getote! Katemeenaꞌoochaa cookibote! Filsixeemeenaꞌote, ittoshi bulli shatona muuyote! Dambi-waanee cufoo ittoshi toommooch cufitone; bi ginee naayoochee gubb echeebeeto ikkolla aalloone.

³² Aageteenaꞌo waanee waabeeti wocheyechinaꞌoyich ama getiree wochibona? Doono Yeeri Tsiyoonin wochinnoon bi shuunoon, iriteeti bi asheenaꞌoo shoobon arooch boonoshi danoon gettemmo noone.