Isiyaasi 13 - Kafa Linguistics Project

Baabloonin Doono Yeeri Naxemmo Tuno

¹ Amootsi bushoo Isiyaasi Doono Yeer waanee beeggiꞌi Baabloonichon bi gettiti wocho ebine:

² Shokkaachoo tuneti geppee toommoochaa malletoon tiijjibote; qaaroon oogichiree cookibote; ogoogeenaꞌochi kelloonoo boonoshi giyemmoyich, kishoona malletebote.

³ Ta kaaroon boonoshi ceechemmoyich, taacho tuneti yaafeetinaꞌon wocheto taane; wudoon ta dano boonoshin emirikkiibeeti ta ginee naayinaꞌon ceeggeto taane.

⁴ Guudinaꞌo toommooch dofee aageteenaꞌo qaaro waayee beeton ellebote; taatee showeenaꞌoochee kiceeti, caageebeeti asheenaꞌochi qaaroon waayebote. Beshe Mawe Doono Yeeri ginechinaꞌon ginee koyooch qannii beetone.

⁵ Boonoshiyoo showee tuggooch beddaahaa beeti, wohi showoochee waa beetinaꞌone; Doono Yeeri boonoshin, bi kaaroon bi bekkiyemmi ginee qiiceenaꞌo tuniiꞌi, showoo bullin aalliyoyich waa beetone.

⁶ Doono Yeerichi aabo katinnitoyich, eefebote; Beshe Hakkechi Yeer waanee aallo woyemmone.

⁷ Ebich mochoo bulli niremmone; asho bullichi mullo muujjemmone.

⁸ Keqqemminaꞌone; maaxoo manjeti ureechoommon shoodde qaakkemminaꞌone; boonoshinaa boonoshina keqqoona ciineyemminaꞌone; yeelloona boonoshi baroo qaaqqoon shaahemmone.

⁹ Showoon shokko echiyoyich, axaaxechinaꞌon bi daggoochee aalliyoyich, maacmanjoon tuneꞌi, naxoona, kupphe kaaroona ceenniꞌi ebiyoche Doono Yeerichi aabo waa beetone.

¹⁰ Shimaajji xojjeneenaꞌonaa guuphi xojjeneenaꞌona aaxxeyaachemminaꞌone; batt kechaabeeti aabe manderemmine; ageneyoo aaxxe bekkeyaachemmine.

¹¹ Doono Yeeri ishichiye: “Alemoon bi gondoyich, gondeenaꞌonoo boonoshi axaaxoyich, naxemmo taane; geecechinaꞌochi geecoon kindiyemmo taane; maacmanjeenaꞌochi geecoonoo giishiyemmo taane.

¹² Ashoon aalliiree, gaawe aachoyee, Ofiiree aachoyenoo beshe aaxxoon tuniyemmo taane.

¹³ Ebich Beshe Mawe Doono Yeeri ta kaaro aaxxehooba shimaayeenaꞌon qewiyemmo taane; showeenoo bi xaaꞌoochee shuurikkemmo taane.

¹⁴ “Asho yookkiibeeti xiixxechoommon, qiddaalli bagoochoommon, asho bulli bi ashi asho waan wottemmone; asho bulliyoo bi showi showa wocemmone;

¹⁵ danemmo bulli koyaa qitemmone; yechemmo bulliyoo goraadoona dihemmone.

¹⁶ Boonoshi ciini beetaa, boonoshi nallefeenaꞌo ceqqetaa qitemminaꞌone; boonoshi kexinaꞌo bosheyemminaꞌone; boonoshi mecheenaꞌoo qeyeyemminaꞌone.

¹⁷ “Ebiyoche, birewoon aaxxiyaani, aachoonoo emiraani Meedeenaꞌo boonoshi toommooch tiyemmoyich tuniyemmo taane.

¹⁸ Boonoshi maꞌeenaꞌo gurimaasheenaꞌon wuxemminaꞌone; nallefeenaꞌonoo maaraachemminaꞌone; bushiishoyichoo ariqqaalli aafechinaꞌone.

¹⁹ Taatittineenaꞌochi ooge, Kalideenaꞌochi geecee tuneti Baabloonin, Doono Yeeri ta, Sodoominaa Gomoorinochoommon guuppemmo taane.

²⁰ Shiijjeroochee shiijjerooch beddaahaa arooch kotemmo ciroona beetaachemmone; Araboo bi duukkaanoon arooch xogaachemmone; qiddeenaꞌo arooch boonoshi bageenaꞌon quyeyaachemminaꞌone.

²¹ Barahee cooxinaꞌo arooch miqqemminaꞌone; yuyeenaꞌo boonoshi kexooch ceennemminaꞌone; shaakkeenaꞌo arooch beeyemminaꞌone; barahee emmisheenaꞌo aroochaa capphemminaꞌone.

²² Boonoshi dilaaleenaꞌoochaa qaccemmoo qaaddemmone; gaawe boonoshi goddemeenaꞌoochaa boqqello uukkemmone; bi aallee aabo shaggitone; bi yemeeno ciiretone” iye.