Isiyaasi 11 - Kafa Linguistics Project

Diggoona Ceenniti Taatittino

¹ Iseyichi xugoochee ato dolli kechemmone; bi xepphoocheenoo ato ateree aafemmone.

² Doono Yeerichi Ayaano, shalligoonaa gabii deꞌonochi Ayaano, ciicoonaa hakkoonochi Ayaano, ariyoonaa Doono Yeerin shatonochi Ayaano, bi toommooch kotemmone.

³ Doono Yeerin bi shatona emiremmone. Bi aafo ciinnitona baach naallaachemmone; bi waamo waayetona baach nalli maacaachemmone;

⁴ tunebaani girechinaꞌoyich cadiqoona nallemmone; gaachaalleenaꞌoyich dayinnetoona nalli maaccemmone; bi kookkoochee kechimmi gumboona showoon xoobbemmone; bi nooneexi hiinnoona gondeenaꞌon wuxemmone.

⁵ Cadiqittinoon bi shimetooch cuyemmone; gibeneeto tuno bi naabee buroon tunemmone.

⁶ Okeroo bagee baaddoona tookki ikkooch beeyemmone; maahoo emmishee bushoona tookki miqqemmone; maamo, more daaheroonaa awuyi gijjoona ikkooch beeyemminaꞌone; giisheche bushoo boonoshin quyemmone.

⁷ Miimonaa diiboona ikkooch maayemminaꞌone; boonoshi bushiisheenaꞌo tookki miqqemminaꞌone; daaheroo gattoochoommon maayi tulloon qaachemmone.

⁸ Nallefoo dingeree oppee toommoochaa kaachemmone; xachi kuxoo xekeree oppooch bi kishoon geddemmone.

⁹ Yaafeeti ta guudo bulliichaa qaaꞌi iritoon, woyee aalloon shakkiyaachemminaꞌone; aacoo baharooch ceenoommon, showoo bulli Doono Yeerin ariyoona ceennemmone.

Keccetinaꞌo Wottemminaꞌo Tuno

¹⁰ Arooba Iseyichi yaroo aageteenaꞌoyich malletoon tuneree neexemmone; aageteenaꞌo biin qaawemminaꞌone; bi beeyemmi xaaꞌoo oogechi xaaꞌoo tunemmone.

¹¹ Arooba Doono wochinnoon bi kishoon yaggiree, curo tunee echeti bi asheenaꞌon Asooree showoochee, Gibitsee showoochee, Phaxiroosee showoochee, Topphiyee showoochee, Elaamee showoochee, Baabloonee showoochee, Hamaatee showoochee, baharee gashoonaa buure showoonoochee kicemmone.

¹² Aageteenaꞌoyich malletoon neechemmone; Israꞌeeleenaꞌoochee duppetinaꞌon kicemmone; Yihudee asheenaꞌoocheenoo shacetinaꞌon showee awudde kelloochee kicemmone.

¹³ Efreemichi qanaato echemmone; Yihudichi etteenaꞌoo aallemminaꞌone; Efreemiyoo Yihudi toommooch qanaateyaachemmone; Yihudiyoo Efreemin shixaachemmone.

¹⁴ Boonoshiyoo ikkotteree, aabi-gimo waan beeti Filsixeemin kochemminaꞌone; aabi-keyo waan beeti asheenaꞌon boggemminaꞌone; Edoominaa Moꞌabinochi toommooch boonoshi mochoon yaggemminaꞌone; Amooneenaꞌoo boonoshich hajjeyemminaꞌone.

¹⁵ Doono Yeeri Gibitsee baharoon shuuꞌiyemmone; bi kishoon yaggi Efiraaxisi aachi toommooch gaame yongoon deebi gishiishi aacon tuniiree, shabaatte xaaꞌoona qoodemmone; ebich asheenaꞌo baatoona kimmemminaꞌone.

¹⁶ Israꞌeeleenaꞌo Gibitsee showoochee boonoshi keyiyooba bi tunetoommon, bi asheenaꞌoochee echeti cureenaꞌo Asooree boonoshi keyi hammemmi gommo qannemmone.