Isiyaasi 10 - Kafa Linguistics Project

^1-2 Girechon aalloo (gooroo) mucciyoyich, iritechi ta asheenaꞌochi nalloon shappayoyich, xuumeenaꞌonaa nihaalleenaꞌonon bogoyich, dabe dayinnetee sheeroon kichii beetinaꞌoyich, xuꞌoona ceenniti qociyoon kichii beetinaꞌoyich woowo!

³ Naxo ittoshi toommooch kindiyooba, aallo wohoochee waahooba amooniye ittoshi tuniyemmo? Ittoshin gaachemmon danoyichoo koni waaniye ittoshi hammemmo? Ittoshi gaannoonochi amoochiye ittoshi aachemmo?

⁴ Qoppeenaꞌo daggooch gutenoyee, guureetinaꞌo daggooch dihoyee besh, ittoshich echeto amolla aalloone; ebi bulli tunetaanoona Doono Yeeri kaaro besheyaanoone; andoo bi mochoon tiijjiꞌiniye bi beeto.

Asooreenaꞌon Yeeri Naxemmo Tuno

⁵ Doono Yeeri ishichiye: “Ta kaaroon ta bekkiyaabeeti gumbo, ta ippoonoo ta kichaabeeti quddoo tuneti Asoorich woowo!

⁶ Boonoshi gaannoon bi boggemmoyich, kecoon hohi bi daammemmoyich, gommeexi dengoochoommon boonoshin bi neexxemmoyich, Yeerich qeyaani asheenaꞌo toommooch biin daachiito taane; ta kaaremmoyich tuniiti asheenaꞌo toommooch biin wocheto taane.

⁷ “Tunebaani aroo ebin gabaanoone; bi mulloochoo ebi gaboo aalloone; biyoo giishechoon tuneyaanoon meeti aageteenaꞌon aalliyoyich gabiye.

⁸ Ishichiinoo iye: ‘Ta ginee iraasheenaꞌo bulli taateenaꞌone;

⁹ Karikemishin no aalliyoommon Kalinoonin aalliito noone; Arifaadin no aalliyoommon Hamaatin aalliito noone; Damaasiqin no aalliyoommon Shamaarin aalliito noone.

¹⁰ Ebiyee aaf, Yerusaaleminaa Shamaarinooch beeti shahalleenaꞌoyee beshiti shahalleenaꞌo beeti taatee showeenaꞌo toommooch ta mochoon bekkiito taane;

¹¹ Shamaarinaa bi shahalleenaꞌonochi toommooch ta tuniitoommon, ebiyoommon Yerusaaleminaa bi misileenaꞌonochi toommooch tuniyemmo taane’ itone” iye.

¹² Doono, Tsiyooni guudonaa Yerusaaleminochi toommooch tuniiya bi gabito bullin tunii bi ciichitoyee gubb, Asooree taatoon bi mullee geecoonaa cunnennoonoyich naxemmone.

¹³ Asooree taatoo ishichitone: “Ebin ta tuniito, gabecho ta tunetoyich, ta mochee kupphoonaa ta shalligoonane; aageteenaꞌo daggooch beeti showee daaroon happiyoye; boonoshi gaannoonoo boggoye; taateenaꞌon gattoo koyoommon kochaꞌa giishiihoye.

¹⁴ Kishoon daachiiꞌi kafee kexon yeshoommon, aageteenaꞌo gaannooch ta kishoon daachiihoye; gabexoon asho kicoommon, showoo bullin kiciyoye; ebin ta tunii beetaa, qoshoon yexxito, noonoon wochiꞌi cookito koniyoona aalloone” itone.

¹⁵ Qofiyo, biinna qecceebeeti ashi toommooch geecii beete? Magaazo, biinna maacciibeeto toommooch ciixee beete? Ebin tuniyoo, gumbo biin gumbee beeton yeshi shuurikkiya, yaaboo ashoon kaama tiijjiya qiiccoommone.

¹⁶ Ebich Doono, Beshe Mawe Doono Yeeri, xaqqijje bi ginee naayinaꞌo toommooch muujjiibeeti biiyoon deejjemmone; qaaqqoochoommon, bi oogee yiiree dechiichaa aaxxemmone.

¹⁷ Israꞌeeleenaꞌochi bekko tuneti Yeeri boonoshich qaaqqoon tunemmone; Israꞌeelee Yaafoo Yeeri qaaqqee aaxxoon tuneree, ikke areddoon angixonaa guccinonon michi aalliyemmone.

¹⁸ Asho biiyoona maajjiibee qitoommon, gaaweti shaareenaꞌonaa qeemi showeenaꞌona ciroona aallemminaꞌone.

¹⁹ Arooch echemmi mixinaꞌo giishecheenaꞌo boonoshi tunetoyich, giisheche busholla haddoon hakkiye.

Cureenaꞌo Baach Wottemminaꞌo Tuno

²⁰ Aroyee gubb, Israꞌeelee cureenaꞌo, Yaaqobi yaroochee muriccitinaꞌo, boonoshin aalliiti Asooreenaꞌon gibeneyaachemminaꞌone; tunebaani Israꞌeelee Yaafoo Doono Yeerin iberoona gibenemminaꞌone.

²¹ Cureenaꞌo wottemminaꞌone; Yaaqobichi cureenaꞌo Giidechi Nuggishoo waan wottemminaꞌone.

²² Israꞌeeleenaꞌo baharee gasheexi qacoommon boonoshi woddetaanona cureenaꞌo baach wottemminaꞌone. Doono Yeeri boonoshich aalloon maaccitone; boonoshich tun bede kupphe aallo boonoshich qannitone.

²³ Doono, Beshe Mawe Doono Yeeri deeba bi maacciti kupphe aalloon showoo bullich deebemmone.

²⁴ Ebich Doono, Beshe Mawe Doono Yeeri ishichiye: “Tsiyoon beeti ta asheenaꞌote, Gibitseenaꞌo tuniitoommon, Asooreenaꞌo ittoshin yexxa dulloon tiijjitaa, gumboona ittoshin boonoshi mutetaa, boonoshin shattaahote.

²⁵ Ittoshi toommooch ta kaareti kaaro giisheche aaboyee gubb neexemmone; ta kaaro boonoshi waan guudiree, boonoshin aalliyemmone” iye.

²⁶ Beshe Mawe Doono Yeeri Oreebi xaqqoochaa Miidiyameenaꞌon bi yexoommon, yaraafoon tiijjiree Asooreenaꞌon yexxemmone; Gibitsaa bi tuniitoommon, aachi toommooch bi gumboon tiijjemmone.

²⁷ Arooba boonoshi shaago ittoshi gogoochee, boonoshi waanjoo ittoshi qettoochee kindemmone. Ittoshi aangoochee tiyitona bi waanjoo tiishemmone.

Etteenaꞌo Waaꞌi Koyo

²⁸ Etteenaꞌo Ayaatin yechiyeete; Migiroonina besheheete; boonoshi qiicoonoo Mikimaash kotiiheete.

²⁹ Kaattoon kuxxii besheheete; qeyi xaaꞌoon Geeba tuniiheete; Raami keqqiyan; Saaꞌooli katemoo Gibaaha beetinaꞌo goojjiyeete.

³⁰ Galiimi asheenaꞌote, cookibote. Layishi asheenaꞌote, ellebote. Anaatooti asheenaꞌote, eekkebote.

³¹ Madimenaahi woci toommoochiye bi beeto; Gebiimi asheenaꞌo aashee xaaꞌoon qaawiyeete.

³² Hanaach, etto bi beeto Noobi katemoochiye; aroochaa Tsiyooni maache busheechi geppee toommooch, Yerusaalemi katemee toommooch miichoona bi kishoon shuurikkii beetone.

³³ Ebiyoche Doono, Beshe Mawe Doono Yeeri, ooge bi giidoona michi qaakkoon kuxi bajjemmone; neexoon genjeti, kaama qaalliti mixinaꞌon kuxi bayiree giishiyemmone.

³⁴ Manje shaaroon qofiyona qeccemmone; Libanoosiyoo giidechi bi kishoona dihemmone.