Isiyaasi 1 - Kafa Linguistics Project

¹ Yihudee taateenaꞌo, Uziyaahi, Yotaami, Akaazinaa Hiziqiyaasinochi taatee yemeenooba, Yihudinaa Yerusaaleminochon Amootsi bushoo Isiyaasi beeggiti yaaꞌoo.

Yeeri Bi Asheenaꞌon Kaaro

² Shimaayeenaꞌote, waayebote; showeene, ellebe. Doono Yeeri ishichiye: “Bushiishoon shiimaa dichiyoye; tunebaani boonoshi ta toommooch hukkoon tiijjiyeete.

³ Gattoo bi doonon arii beetone; kuroo bi doonochi magedoon arii beetone; tunebaani Israꞌeeleenaꞌo ariyaaneenaꞌone; ta asheenaꞌoo shalligaaneenaꞌone” iye.

⁴ Hini axaaxoona ceenniti aageteenaꞌote, xuꞌoon miꞌeti asheenaꞌote, gonde asheenaꞌochi shiijjereenaꞌote, xummoo tuneti bushiisheenaꞌote, ittoshich woowo! Doono Yeerin qajjito ittoshine; Israꞌeelee Yaafoon qallayito ittoshine; biich gubboon wochito ittoshine.

⁵ Hukkoon andoo daakkii shuunoona, wochinnoon ittoshi sheereebeeto amoyichiye? Ittoshi ikkikkoona ittoshi qello mayetone; ittoshi mulloo baallitone.

⁶ Ittoshi baatee madoochee tiijjii shimbooch beddaahaa iiwoo aalloone; mayo, gubaaboonaa awaawunoona bulletone; ebiyoo gaaheyaanoone; woyee kaappeyaanoone; woyee zayitoon huutaa shuxaanoone.

⁷ Ittoshi showoo ashaallo tunetone; ittoshi katemeenaꞌo qaaqqoona miccitinaꞌone; ittoshi ciini beetaa maachi asheenaꞌo ittoshi showoon boggemminaꞌone; bulli mooyon aalliiree shokko echiyemminaꞌone.

⁸ Tsiyooni maache bushee baach woyinee budooch beeti yambaaroochoommon, buqqee budooch beeti bashoochoommon (yambaaroochoommon), giicheti katemoommonoo shaahaa echetine.

⁹ Beshe Mawe Doono Yeeri curoon nooch bi echiyaan gaata, Sodoomin tunesho noone; Gomoorinoo shaahesho noone.

¹⁰ Sodoomee iraasheenaꞌote, Doono Yeerichi qaaroon waayebote. Gomoori asheenaꞌote, no Nuggishoo dojjiibeeti doyoon ellebote.

¹¹ Doono Yeeri ishichiye: “Ittoshi deejjee woddo taach amoon hallehe? Bagee baaddoochi micciibeeti deejjoonaa awujjiti gijjeenaꞌochi awuyona micheto taane; wurinaꞌochi damoo, bagee baaddeenaꞌochi damoonaa emmishee baaddeenaꞌonochi damoona taan emirikkaache.

¹² Ta aafooch bekkeya ittoshi waa beegaata, eboshi bullin ittoshi waanee qaawito, ta addibaaboon ittoshi neexxemmoyichoo echeto konine?

¹³ Gaacaalli ittoshi buuroon ebiyee bekk deebaahote; ixaanoo taan tiyaarii beetone; batti agenee keyi ittoshi baaroon, ittoshi shambetoon; ittoshi iitoonaa xuꞌoona ceenniti ittoshi kiceyoonon haaꞌiyoon hakkaache.

¹⁴ Agenee keyi ittoshi baarii baaroonaa maacheti baareenaꞌonon shixxeto taane; taach shaagoon boonoshi tunetoyich, shaagon taahito taane.

¹⁵ “Corootiya ittoshi kishoon ittoshi yaggigaata, ta aafoon ittoshi waanee badd wochemmo taane; woddiiꞌi ittoshi corootitaanona waayeyaachemmo taane; ittoshi kishoo damoona wooretone.

¹⁶ Macheree ittoshi qelloon xalliibote; ittoshi gonde shuunoon ta aafoochee wokkiibote; gondoon shuunoon qayote.

¹⁷ Deꞌe mooyon shuunoon doyibote; dayinnetoon qaawibote; xukketon wodiibote; nihaalleenaꞌoyich neexebote; xuumeenaꞌoyichoo taggebote” iye.

¹⁸ Doono Yeeri ishichiye: “Ittoshi waataa ittibateebone. Ittoshi axaaxoo uchilloo ceelloommon bi ceelleteenona, kecho naccoommon naccemmone; damoo celloommon bi ceelleteenona, huuttoo naccoommon naccemmone.

¹⁹ Deꞌa iꞌi ta getoon ittoshi waayegaata, showoochee daneebeeti gaawe maayoon maayemmo ittoshine;

²⁰ tunebaani qajje iꞌi ittoshi hukkegaata goraado ittoshin maayemmone. Ebin Doono Yeeri ta, ta noonoona getteto taane” iye.

Yerusaalem Axaaxoo Ceeno

²¹ Gibeneeti katemee aabichaꞌa yahechiyoommi tunehane! Ebiyee aaf dayinneto ceenniti, cadiqoo beeti katemeene; tunebaani and ashoon wuxechinaꞌochi katemee tunehan.

²² Ne birewoo osheretone; ne woyinee uyo waaretone.

²³ Ne ukkireenaꞌo hukkechinaꞌonaa gaayeenaꞌochi nuucheenaꞌonane; boonoshi bulliyoo xuccoon shunniyeete; aafee ciichiyoonoo oogichii qaawiyeete; nihaalleenaꞌoyich neexeyaacheete; xuume maacheenaꞌo mooyon waayeyaacheete.

²⁴ Ebich Doono, Beshe Mawe Doono Yeeri, Israꞌeeleenaꞌo goyinneebeeti Giidechi Nuggishoo ishichiye: “Ta etto tuneti ittoshi toommooch kupphe ta kaaroon kindiiree ta shixechi ittoshi toommooch nichoon kichemmo taane.

²⁵ Ta mochoon ne toommooch tiijjemmo taane; ne osheroonoo gaawichi machemmo taane; ne gondo bullinoo wokkiyemmo taane.

²⁶ Ne woraaferasheenaꞌon wonneechooch, ne mikkirechinaꞌonoo aafichooch wochemmo taane; aroochee Cadiqee Katemee, Gibeneeti Katemee getaa ceekkemmi neene” iye.

²⁷ Doono Yeeri dayinnetecho bi tunetoyich, Tsiyoonin biishemmone; gondoochee wotteti bi daggeexinaꞌonoo biishemmone.

²⁸ Tunebaani hukkechinaꞌonaa axaaxechinaꞌona ikkittinoona buricemminaꞌone; Doono Yeerinoo qajjii beetinaꞌoo aallemminaꞌone.

²⁹ Ittoshi shunniibee echeti goree naboona, ittoshi kaacciti bechee mixinaꞌochi naboonoo yeellemmo ittoshine.

³⁰ Bi waamo shoolliti meelloon shaahemmo ittoshine; aacon mucceti bechee xaaꞌoommon tunemmo ittoshine.

³¹ Kupphe asho galloommon, bi shuunoo qaaqqee xeeroommon tunemmone; guttiyona tookki miccemminaꞌone; qaaqqoonoo takkemmo aalloone.