Imbaaqoomi 3 - Kafa Linguistics Project

Imbaqoomi Corootiti Corooto

¹ Shoddoona giddeti keemechi Imbaqoomichi corooto ebine:

² Doono Yeero, worganikkiti ne shuunoon waayaꞌa, oogichii shatteto taane; ebi shuunoon no yemeenooch wochinnoon shuunebe; no yemeenooch bi arichemmoyich tuniibe; ne kaarooba noon maaroon batteyaahine.

³ Yeeri wochinnoon Temaanee showoochee, Yaafe Yeeri, Faraani geppoochee waa beetone. Bi oogee yiiroo shimaayoon kaappitone; biin naadoo showoo bulliich ceennitone.

⁴ Bi waa beegaata, xeeyo phaqqoommon phaqqii beetone; bi giidoo qereeꞌi beeti bi kishoochee, bekko koojjii bekkee beetone.

⁵ Biiyo bi aaf hammemmoyich tuniihe; qitoo bi hillooch katini dabbemmoyich gettiye.

⁶ Bi neexemmona, showoo shuuriye; bi ciinnimmona aagetee asheenaꞌo qeweheete. Wonna tiijjiꞌi bi gommo tuneti, bulli aaboon beeti guudinaꞌo yiikkeeheete; geppeenaꞌo dugilla koonniyeete.

⁷ Topphiyee asheenaꞌo boonoshi duukkaanoochaa oogichii keqqi beetaa, Miidiyameenaꞌoo boonoshi kexoochaa keqqoona qewee beetaa, beeggoye.

⁸ Doono Yeero, ne kaaremmoyich tuniitinaꞌo aacinaꞌone? Ne kaareto aacinaꞌoniye? Ne kaaree shiixxoon ne kindiito bahareenaꞌo toommoochiye? Ne asheenaꞌo wudoon danemmoyich ne tuniihooba, quboon hareshoochoommon, gaarichoommonoo yebbehine.

⁹ Maꞌoon kichaa qanniihine; shangoonoo bi kollooch ceechihine; showoon ne gaahaa aaco xuupphiye.

¹⁰ Guudinaꞌo neen beeggiꞌi, qeweheete; ambamboo showoon machiꞌi beshee hammiye; baharee aacoo goohiye; aachi aayoo kaama tiyiye.

¹¹ Awureebee kindiibeeti ne shangee conjoochee, wacciibeeti ne ginee aaxxoochee tiyitona, aabeenaa ageneena boonoshi beetooch neexee doojjiyeete.

¹² Ippoona showee toommona shaꞌehine; kaaroonoo aagetee asheenaꞌon neexxaa kotehine.

¹³ Ne asheenaꞌon wodiyoyich, ne huutteton wodiyoyich, kechehine. Gonde ashi kexon guummoochaa happihine; gaxxaꞌa bi godoon xalla bekkiihine.

¹⁴ Noon shaci aalliiya yubee yongoochoommon waati, girechon aashoochaa qooxxa iꞌi emiriibeeti, ginechinaꞌochi iraashoon bi shangoona kochehine.

¹⁵ Ne hareshoona baharoon ne neexxemmona, giidechi baharo umbehe.

¹⁶ Tawoo ebi bullin waayaꞌa qewehoye; shatona ta noonoo tippehe. Ta shaawusho shekirehe; ta tingoo qewehe. No etteenaꞌon Doono Yeeri naxemmi aaboon, cikki quye beeyemmo taane.

¹⁷ Balaasee mixo aafemmon bi qajjitaanona woyinee qombooch aafo aalletaanona zayitee mixo bi dobbetaanona budooch maayo shago qajjitaanona bago dogoochee ciiretaanona miimo maggooch aalletaanona

¹⁸ ebi bulli tunetaanoona ta, Doono Yeerina, taan wodiyechi ta Nuggishoona, emiremmo taane.

¹⁹ Nuggishoo Doono Yeeri taach giidoon immii beetone; ta baatoon doollee baatoochoommon kupphiyemmone; guudi toommoochoo wocona ta kechemmoyich tuniyemmone.