Imbaaqoomi 2 - Kafa Linguistics Project

¹ Dilaalee toommooch kechehoye; arooch keyiichi Doono Yeeri taach gettimmon, ta cookoyichoo bi wochemmi wochoon waayoyich quya beeyehoye.

Guttinnoon Yeeri Wochiti Wochoo

² Doono Yeeriyoo taach ishichiye: “Ebi neech ta bekkiiya ii beeti yaaꞌoon shemmoyich bi iritiyaachemmoyich tuniiree, yalle xaqqooch kooribe;

³ kooriree ne kotiyemmo, yaaꞌoo ceennemmo and tuno bi qajjitoyichiye; tunebaani ebi yaaꞌoo ceennemmi aabo afaafinoona waa beetone; ebi iberoone. Yagemmo bi shaahitaanona haaꞌiiree quyebe. Iberoon ceennemmone; ciroona yagaachemmone.

⁴ Ne kooremmo ebiniye: ‘Gonde asheenaꞌo yagaachemminaꞌone; tunebaani cadiqeenaꞌo, ta toommooch mulloon boonoshi tooꞌitoyich, kashoona beeyemminaꞌone’ ii beetoniye” iye.

Gonde Asheenaꞌon Yeeri Naxemmo Tuno

⁵ Gaanno ashoon dawushii beetone. Woddelleenaꞌo geecechinaꞌonaa kotee kasheyaaneenaꞌonane. Boonoshiyoo maashoommi woddelleenaꞌone; qitoochoommon beddiye geton ariyaaneenaꞌone. Aagetee asheenaꞌo bullin boonoshi waan kiciyeete; asheenaꞌo bullinoo keccii daammiyeete.

⁶ Boonoshi kochii yechiti asheenaꞌo ebi asheenaꞌon cooqqiri, hoxe qallayibee ishichemminaꞌone: “Ittoshicho tuneyaanoon gutiibeeti ittoshich, woowo! Yechiyoo icheti qiicoona ittoshi gaanne beeyemmo, aati wottooniye?” gettemminaꞌone.

⁷ Gijjoon ittoshi erettiiti asheenaꞌo ittoshi toommooch tiyiree, shatona ittoshi qewemmoyich tuniyemminaꞌone. Ittoshi gijjoonoo bogi daammemminaꞌone.

⁸ Meeti aageteenaꞌo gijjoon ittoshi boggitoyich, boonoshi daggoochee curo tuneꞌi echetinaꞌo ittoshi gijjoon boggemminaꞌone. Ebiyoo meeti ashi damoon ittoshi ukkitoyich, wotta maaco manjiꞌi showee toommonaa katemoonooch beeti asheenaꞌo toommooch ittoshi tuniiti mooyoyichiye.

⁹ Boggii ittoshi deqqiti mooyona ittoshi kexon gaanniiti, gonde mooyo ittoshi toommooch bi shagaachemmoyich, manje kexinaꞌon haggiti, ittoshich woowo!

¹⁰ Ittoshi maroo ittoshi toommooch yeelloon deebitone; meeti asheenaꞌon wuxii aalliyoona ittoshi toommooch aalloon deebito ittoshine.

¹¹ Ittoshi kexo shuuneeti xaqqeenaꞌo ittoshi gondoyich cookemminaꞌone; michi wogaagireenaꞌoo boonoshich wochemminaꞌone.

¹² Ashoon xuꞌonaa damoon ukkoona katemoon shuuneebeeti ittoshich woowo!

¹³ Ittoshi kochii yechiti aageteenaꞌo haggito bullin qaaqqoo maa aalliyemmoyich, boonoshi aajjito bulliyoo gaacaallo bi tunemmoyich tuniito, Beshe Mawe Doono Yeeri toone?

¹⁴ Tunebaani aaco baharooch ceenoommon showoo Doono Yeerichi oogee yiiroon ariyoona ceennemmone.

¹⁵ Boonoshi achoon beegoyich, ittoshi giyeenaꞌo kaaree shiixxee xoofoochee woyinee uyoon uyiree mashemmoyich tuniibeeti ittoshich woowo!

¹⁶ Ittoshiyoo oogoochee kindiree giishemmo ittoshine; uyi ittoshi mashetaa, ittoshi achoo bekkemmone. Doono Yeeri bi qanne kishooch beeti naxee xoofoon ittoshich bi deejjaa uchemmo ittoshine. Ittoshi oogo giishemmone.

¹⁷ Libanoosi mixon qeccee ittoshi aalliyoommon qeccetaa aallemmo ittoshine. Arooch beeti cooxinaꞌon wuxii ittoshi aalliitoyich keqqemmo ittoshine. Ebiyoo meeti ashi damoon ittoshi ukkitoyich, wotta maaco manjiꞌi showee toommonaa katemoonooch beeti asheenaꞌo toommooch ittoshi tuniiti mooyoyichiye.

¹⁸ Shahallee gaaco amoone? Ashi kishoona shuuneeti mooyo toone? Kootoyee besh bi waanee amolla daneyaache. Biin shuuneti asho, ebi noona miime mooyon bi gibeneebeeto amoyichiye?

¹⁹ Mixoochee shuuneeti mooyon tibe, miime xaqqoonoo kaamebe, ii beeti ittoshich woowo! Ebi aroo ittoshich yaaꞌoon bekkiyoon hakkehe? Bi achoo aachoonaa birewoona dikkeeto bi tunetaanoona, kashaalli mooyone.

²⁰ Tunebaani Doono Yeeri yaafoo tuneti bi yaafee kexooch beetone; showee toommooch beeti asho bulli bi aafooch minnakanna gettaaye.