Hosee'i 9 - Kafa Linguistics Project

Israꞌeeleenaꞌo Toommooch Woyemmi Naxo

¹ Israꞌeeleenaꞌote, ittoshi Nuggishoyich gibeneeto tuno ittoshi qajjitoyich, emiriyaahote; bare aageteenaꞌochoommon oogichi emiriyaahote! Maayi buchi xaaꞌoo bulliichaa yahechich qocheebeeti gatiyoon shunnito ittoshine.

² Maayi buchi xaaꞌoo maayoon, woyino hiicheebeeti oppo woyinee uyoon ittoshich imaachemmone. Andire woyinee uyo ittoshich daneyaachemmone.

³ Israꞌeeleenaꞌo Doono Yeerichi showooch beetaachemminaꞌone; Gibits wottemminaꞌone; Asooree showoochaanoo eeꞌe maayoon maayemminaꞌone.

⁴ Woyinee uyee deejjoon Doono Yeerich giddiyaachemminaꞌone. Boonoshi deejjoonoo Doono Yeerin emirikkaachemminaꞌone. Boonoshi maayo eeppi aakkee maayo tunemmone; aroon maammo bulliyoo eeꞌemmone. Ebi maayo boonoshi shaacoyich boonoshi maayemmoani Doono Yeerichi yaafee kexooch giyemmo toonoone.

⁵ Boonoshi nati baarooba, Doono Yeerichi baarooba boonoshi tuniyemmo amooniye?

⁶ Aalloochee muricca boonoshi woci beetaa Gibitseenaꞌo boonoshin kicemminaꞌone. Memifisi katemoo boonoshin duukkemmone. Boonoshi birewee aaxxe qiicoon kubbo bullemmone. Boonoshi duukkaanoochoo angixo collemmone.

⁷ Sheeree aabo waatone; nichoo kichee aaboo shaggitone. Israꞌeeleenaꞌo ebin ariibeete. Ittoshi axaaxoo woddetoyich, taanoo ittoshi shixxitoyich, keemecho tuushoo, ayaanechi ashoo geyecho tuniitaa ciichetone.

⁸ Keemecho, ta Nuggishoochi asheenaꞌo tuneti Efreemich qayechone. Tunebaani bi gommo bulliich ollo olleetone. Bi Nuggishoochi yaafee kexoochaa etto biin quyee beetone.

⁹ Gibaaha boonoshi beehooba bi tunetoommon asheenaꞌo oogichii eeꞌetinaꞌone. Yeeriyoo boonoshi xuꞌoon shalligemmone. Boonoshi axaaxoyichoo boonoshin sheeremmone.

Israꞌeeleenaꞌochi Axaaxee Naboona Waati Iritoo

¹⁰ Doono Yeeri ishichiye: “Israꞌeeleenaꞌon ta dano, barahoochee woyinee aafoon danoommone. Ittoshi qaabbechinaꞌon ta beego, qaabbe balaasee aafoon beegoommone. Tunebaani Baꞌaal Feꞌoori boonoshi waahooba yeelliiti shahalleenaꞌoyich boonoshi qelloon beshiiꞌi immiyeete. Boonoshi shunniti shahalloochoommon ciigiitinaꞌo tuneheete.

¹¹ Efreemi oogo kafoochoommon biiti aallemmone. Ebiyee bekk xifo neexeyaachemmone; gennoo yeqqefeyaachemmone; bushoo shiijjeyaachemmone.

¹² Shiyii boonoshi dichitee ikkoonolla echiyaanoon boonoshi waanee shohemmo taane. Ta aafoon boonoshiyee bara ta wochiyooba boonoshich woowo!” iye.

¹³ Ta beeggemmoochaa, Efreemi bushiisheenaꞌo kecceyoyich beshiitaa ichetinaꞌone. Efreemi bi bushiisheenaꞌon wuxechinaꞌoyich beshiiree immemmone.

¹⁴ Doono Yeero, boonoshich imbe! Boonoshich ne immemmo amooniye? Yiiqqo gaakkiibeeti xifoonaa shuuꞌi xanonon boonoshich imbe!

Doono Yeeri Israꞌeeleenaꞌo Toommooch Nalloo

¹⁵ Doono Yeeri ishichiye: “Galigalaa boonoshi shuuneti gondo bullich, tawoo aroobee aaboochee tiijjaꞌa boonoshin shixxehoye; boonoshi shuuneti axaaxoyich ta kexoochee boonoshin yookkemmo taane. Ebiyee bekk boonoshin shunaachemmo taane. Boonoshi ukkireenaꞌo bulliyoo hukkechinaꞌone.

¹⁶ Efreemi hosheeꞌi bi cammo shuuqqiti, aafoonoo aafeyaani mixoommon tunehe. Bushiishoon boonoshi shiyitaanona aaxxe boonoshi bushiishoon wuxemmo taane” iye.

Israꞌeeleenaꞌochon Keemecho Keemo

¹⁷ Bi getaa waayeyaache boonoshi itoyich ta Nuggishoo boonoshin duppemmone. Aageteenaꞌo daggooch yallyallimii beetinaꞌon tunemminaꞌone.