Hosee'i 8 - Kafa Linguistics Project

Shahalloyich Goyinnee Naboona Israꞌeeleenaꞌo Sheereyoo

¹ Doono Yeeri ishichiye: “Shametoon huge! Ta asheenaꞌo boonoshina tookkii ta giyeti wogoon boonoshi biichitoyich, ta sheeroon boonoshi shaaddetoyich, etto booyochoommon Doono Yeeri ta yaafee kexooch yoobbii waa beetone.

² Boonoshiyoo ‘No Nuggishoocho, Israꞌeelo no, neen ariito noone’ iibee ta waan cookii beetinaꞌone.

³ Tunebaani Israꞌeeleenaꞌo gaawe mooyon boonoshi hoxetoyich etto boonoshin yookkii beetone.

⁴ “Ta daaggaalloon taateenaꞌon taatiiheete. Taan echeyaanoon ukkireenaꞌon ukkiriiheete. Boonoshi aallemmoyich naboo tunemmi shahalloon, boonoshi birewoonaa aachoonoochee shaahii shuuneheete.

⁵ Shamaaree asheenaꞌochi maanji shahalloon tiyaareto taane. Ta kaaro boonoshi toommooch qaaqqoo aaxxoommon aaxxemmone. Xalleyaanoon boonoshi beeyemmo aati wottooniye?

⁶ Ebiyoo Israꞌeeleenaꞌo daggooch tunehe. Shuunee ariyecho shuuneti ebi maanji shahalloo nuggishoo toonoone. Ebi Shamaari katemeexi maanji shahalloo tiishe buricemmone.

⁷ Boonoshiyoo yongoon shoohiree yuboon qeccemminaꞌone. Shaggiti maayooch yuulloo aalletoyich manjeyemmi maayo aroochee daneyaachemmone. Bi danetaanona maayemminaꞌo dallaaweenaꞌone.

⁸ Israꞌeeleenaꞌo aageteenaꞌo daggooch qoochetinaꞌone; gaacaalli qiicoommonoo tunetinaꞌone.

⁹ Bi ikkeeto yallyallimiibeeti kubbi kuroochoommon Asooree showooch hammitinaꞌone. Efreemi gijjoona xiboon xibehe.

¹⁰ Gijjoona aageteenaꞌona tookkii boonoshi ikkottetaanona and ta, boonoshin kicemmo taane. Taatoonaa ukkireenaꞌona boonoshi toommooch shakkiibeeti iritoochee tiyitona, muuyi muuyi hammemminaꞌone.

¹¹ “Efreemi meeti axaaxee maariyee deejjee gudeenaꞌon shuunetone; tunebaani ebi deejjee gudeenaꞌo axaaxee shuunee deejjee gudeenaꞌo tunetinaꞌone.

¹² Sheerooch beeti wodde mooyon boonoshich kooriyoye; tunebaani boonoshi dallaawe mooyon tuniiꞌi ciinniyeete.

¹³ Deejjoon taach giddii beetinaꞌone; deejjee meenonoo maa beetinaꞌone; tunebaani Doono Yeeri ta, boonoshina emiraano taane. And boonoshi xuꞌoon shalligiree, boonoshin sheeremmo taane; Gibitsoo wottemminaꞌone.

¹⁴ “Israꞌeeleenaꞌo boonoshin Halliton battetinaꞌone; taatee kexinaꞌonoo shuunetinaꞌone. Yihudee asheenaꞌoo meeti manje katemeenaꞌon shuunetinaꞌone. Tunebaani ta, boonoshi manje katemeenaꞌooch qaaqqoon deejjemmo taane. Ebi qaaqqoo boonoshi mishigeenaꞌon michemmone” iye.