Hosee'i 7 - Kafa Linguistics Project

¹ “Ta asheenaꞌon kecoochee wochiya ta iyooba, Israꞌeeleenaꞌon wodiiya ta iyooba, Efreemichi axaaxoo, Shamaari katemee asheenaꞌochi gonde shuunoo bekkehe. Boonoshinaa boonoshina kootoon yibbaateheete; kexon tiichii giyiꞌi gaajjiyeete; bokkoo tuneꞌinoo gommoochaa boggiyeete.

² Tunebaani boonoshi gonde shuunoon shalligemmo ta tunoon gabaaneenaꞌone. Boonoshi axaaxoo boonoshin giichitone. Boonoshi shuunoo ta aafoochee aacheeto toonoone” iye.

Taatee Kexoochaa Koceeti Koceyoo

³ Doono Yeeri ishichiye: “Taatoon boonoshi gondoona, ukkireenaꞌonoo boonoshi kootoona emirikkii beetinaꞌone.

⁴ Bulliyona shunimaayeenaꞌone. Kochi quxechi kosho nafimmi wottoon kicoon bi qajjeti, gaamiti qaaqqee gudoomminaꞌone.

⁵ No taatoochi baaree aabooba ukkireenaꞌo woyinee uyoona gaamee biiyeheete. Biyoo bedaani asheenaꞌona tookkii bi kishoon yaggiye.

⁶ Gondee shuunoyich boonoshi mullo maayo kachiibeeti gudoochoommon gaamitone. Boonoshi kaaro xumo bullin cufiye. Haroochoo aaxxeebeeti qaaqqoochoommon cobbcobbimiye.

⁷ “Bulliyona gudoochoommon gaamitinaꞌone. Nallii boonoshin qeejjii beetinaꞌon michitinaꞌone. Boonoshi taateenaꞌo bulliyoo qititinaꞌone. Boonoshi daggoochee ta waan cookito koniyoona aalloone” iye.

Israꞌeeleenaꞌo Aageteenaꞌona Tookkii Bacceyoo

⁸ Doono Yeeri ishichiye: “Efreemi aageteenaꞌona tookkii bacceetone. Gaꞌo wocheyaani koshonoo tunetone.

⁹ Dallaaweenaꞌo bi giidoon maaheete. Biyoo ebin ariyaanoone; bi qelloo bukkehe; tunebaani bi ebin shalligaanoone.

¹⁰ Boonoshi geecoo Israꞌeeleenaꞌo toommooch wochii miixee beetone. Ebi bulli tunetaanoona boonoshi Nuggishoo Doono Yeeri ta waan wotteyaaneenaꞌone; taanoo qaawaaneenaꞌone.

¹¹ Efreemi mullaalli, cikkii dacheebeeti uggeen tunetone. Gaachoo danoyich Gibitseenaꞌon ceeggiyeete; Asooreenaꞌo waanoo gaꞌeheete.

¹² Boonoshi biitigaata ta dabboon boonoshi toommooch yaggemmo taane. Shimaajji gacoochoommon geechi kindiyemmo taane. Boonoshi gonde shuunoyich boonoshin sheeremmo taane.

¹³ “Ta waanee boonoshi wokkitoyich boonoshich woowo! Ta toommooch hukkoon boonoshi tiijjitoyich aallemminaꞌone; ta, boonoshin biisheya qaawiyoye; tunebaani boonoshi ta toommooch kootoon yibbaateheete.

¹⁴ Mulloochee tiijjiꞌi ta waan cookaacheete. Tunebaani boonoshi qeenoochaa eeppiyeete. Boonoshi kiceebeeto maayoonaa woyinee uyoonoyichiye. Ta toommoochoo hukkoon tiijjiyeete.

¹⁵ Boonoshin dojjiyoye; kupphiinoo iyoye. Tunebaani boonoshi ta toommooch koceeheete.

¹⁶ Gonde mooyo waan wotteheete. Muricciti shangoommon tuneheete. Boonoshi ukkireenaꞌo boonoshi heciyoochee kechiti gonde moochi naboona goraadoona qitemminaꞌone. Ebichi naboona Gibitseenaꞌona cooneyemminaꞌone” iye.