Hosee'i 6 - Kafa Linguistics Project

Yeeri Israꞌeeleenaꞌon Bi Waan Boonoshi Wottemmoyich Ceego

¹ Asheenaꞌo ishichiyeete: “Ittoshi waataa Doono Yeer waan wottebone. Bi noon tiichitone; bi noon guuci wodiyemmone. Bi noon mayiitone; bi noon wodiyemmone.

² Gutte qemoyee gubb noon wodiyemmone. Bi aafooch kashoona no beeyemmoyich keejjinnee qemooba noon tiijjemmone.

³ Biin ariibone; biin no ariyemmoyichoo Doono Yeerin dabbibone. Iberoochaa maaddee aaboochoommon bekkemmone. Showoon shuxiibeeti naawee amiyochoommon no waan woyemmone” iyeete.

⁴ Aroochee Doono Yeeri ishichiye: “Efreemo, neen aabichibote? Yihudo, neen aabichibote? Ittoshi shoodo maaddee quboommo, harimmona bekkechi shokkeebeeti keetoommone.

⁵ Ebich ta keemechinaꞌochi noonoona ittoshin aalliihoye; ta qaaroonoo ittoshin wuxiyoye. Ebina ta nalloo xeeyoochoommon xeejjiye.

⁶ Ebiyoo deejjoyee shoodoon, micciibeeti deejjoyee Doono Yeeri taan ne ariyoon ta shunnaa beetoyichiye.

⁷ “Tunebaani boonoshi Addaamichoommon wogoon happitinaꞌone. Ebi aroochaa taach gibeneyoon qajjitinaꞌone.

⁸ Gilaadi gonde asheenaꞌochi katemoo tunetone; damoonoo wooretone.

⁹ Bokkeenaꞌo ashoon wuxiya ottii quyoommon, qeesheenaꞌo ebiyoommon tuniiheete; Shekeemi gommoochaa ashoon wuxiyeete. Yeelliibeeti gondoonoo shuuneheete.

¹⁰ Shixxiibeeti mooyon Israꞌeeleenaꞌo daggoochee beeggeto taane. Efreemi yahecho tunetone. Israꞌeeliyoo eeꞌetone.

¹¹ “Yihudee asheenaꞌote! Ittoshi toommooch nallee aabo kuchetone.