Hosee'i 5 - Kafa Linguistics Project

Israꞌeeleenaꞌo Toommooch Getteeti Nalloo

¹ “Qeesheenaꞌote, ebin waayebote! Israꞌeelee yareenaꞌote, shalligibote! Taatee yareenaꞌote, waayebote! Nalloo ittoshi toommooch waatone. Ebiyoo Mitsiphaa olloon, Taabooraa yaggeeti dabboon ittoshi tunetoyichiye.

² Hukkechinaꞌo wuxoon meechitinaꞌone. Ebich bullinolla sheeremmo taane.

³ “Efreemin ariibeeto taane. Israꞌeelichi mooyo taach aacheeto toonoone. Illa and, Efreemo, yahito neene. Israꞌeeliyoo eeꞌetone.

⁴ “Yahee ayaano Israꞌeeleenaꞌo daggooch bi beetoyich, Doono Yeerinoo ariyoo boonoshi qajjitoyich, boonoshi Nuggishoo waan boonoshi wottemmoyich boonoshi shuunoo boonoshin daaggaanoone.

⁵ Israꞌeeleenaꞌochi geecoo boonoshi toommooch miixee beetone. Ebich Israꞌeeleenaꞌonaa Efreemina boonoshi axaaxoona tephee dihemminaꞌone. Yihudee asheenaꞌoo boonoshina tookki tephee dihemminaꞌone.

⁶ Doono Yeer waan wottoyich, boonoshi bageenaꞌonaa miiminaꞌonon gasheree hammemminaꞌone. Tunebaani bi, boonoshiyee bi baritoyich daneyaachemminaꞌone.

⁷ Doono Yeerich gibeneyaano tunetinaꞌone; gaajjiꞌi bushoon shiyitinaꞌone. Ebich hini batti batti agenee keyooch boonoshinaa boonoshi showoona aallemmone.

Yihudee Asheenaꞌonaa Israꞌeeleenaꞌona Koyo

⁸ “Gibaahaa tiroon (waaringoon), Raamaa shametoon hugote! Beet Aweenaa, ‘Biiniyaamo, ne hillooch shaggitinaꞌone’ getibee bunnebote!

⁹ Naxee aabooba Efreemi aallemmone; Israꞌeelee yoodeenaꞌo daggooch ceennemmi kashi mooyon awaajjito taane.

¹⁰ “Yihudee ukkireenaꞌo daaroon happii beetinaꞌoommon tunetinaꞌone. Aacon tiboommon ta kaaroon boonoshi toommooch tibemmo taane.

¹¹ Duube mooyon dabboon bi shunnitoyich, Efreemi neexaa hajjeetonaa nalloo bi toommooch kinditona tunemmone.

¹² Illa ebich Efreemich piloommon, Yihudee yareenaꞌoyichoo qunoommon tuneto taane.

¹³ “Efreemi bi biiyoon, Yihudiyoo bi mayon beeggiꞌi, Efreemi Asoor waan hammiye; gaachoon danoyich ooge taatoo waan wocheyechon daachiihe. Tunebaani bi ittoshin wodiyoon woyee ittoshi mayon wodiyoon hakkaachemmoone.

¹⁴ Ebich Efreemich daaheroon, Yihudee asheenaꞌoyich, more daaheroon tuneree boonoshin tiishiichi beshe hammemmo taane. Bogishoo daammemmo taane. Koniyoona boonoshin wodiyoon hakkaachemmone.

¹⁵ “Boonoshi xuꞌoon boonoshi ariimmi wottoon, taan boonoshi qaawimmi wottoon, ta xaaꞌooch wotte hammemmo taane. Boonoshi iritee aabooba taan kupphii qaawemminaꞌone” iye.