Hosee'i 3 - Kafa Linguistics Project

Hoseeꞌinaa Yahechi Ureenochi Mooyo

¹ Doono Yeeri taach ishichiye: “Israꞌeeleenaꞌo bare nuggisheenaꞌo waan boonoshi wottetaanona, woyinee aafee nuuphon giddiyoon boonoshi shunnitaanona Doono Yeeri ta, andoo boonoshin shunnaabeeto taane. Newoo ebiyoommon bare ashoon shunneti shunimaayee waan hamiree biin shune” iye.

² Tawoo aaraa uuche sheqeelee xure birewoonaa ikke xaanaa yambee sheqoona biin kemehoye.

³ Tawoo biich “Yahaanoon, bare ashoonoo qaawaanoon wodde aaboon taan quye beebe! Tawoo ebiyoommon neech tuniyemmo taane” iyo.

⁴ Ebiyoo Israꞌeeleenaꞌo taataalloon, ukkiraalloon, deejjaalloon, goyinnee xaqqee giimbaalloon, efoodaalloon, shahalleenaꞌochi terafimaalloon, wodde aaboon kotemminaꞌo boonoshi tunetoyichiye.

⁵ Ebiyee gubb, Israꞌeeleenaꞌo wotteree boonoshi Nuggishoo Doono Yeerinaa boonoshi taatoo Daawitinon qaawemminaꞌone. Gubbi yemeenooch Doono Yeerin shatiree bi waan wottemminaꞌone; bi diiroonoo deqqemminaꞌone.