Hosee'i 2 - Kafa Linguistics Project

¹ “Ebich, anaami ittoshi maneenaꞌon ‘Ami’ maache ittoshi maneenaꞌon ‘Ruhaami’ getote!

Yeerich Gibeneyee Qayona Israꞌeeleenaꞌo Naxeyoo

² “Ciicote, ittoshi indeen ciicote. Are ta mechee tuno bi qajjetoyich, tawoo bi keno toono taane. Shunee mamonaa yahoonon bi waanee wokkiibuye.

³ Ebi tuno qayigaata, biin shooti shokkoon echiiree, bi shiijjehoobiyoommon tuniyemmo taane. Biin barahoommon, shuuꞌi showoommonoo tuniyemmo taane. Shachewoonoo wuxemmo taane.

⁴ Yahaa bi shiyeti bushiisheenaꞌo boonoshi tunetoyich, bi bushiisheenaꞌoyich ariqqeyaachemmo taane.

⁵ Boonoshin xifaa shiyeti boonoshi indee yeellaalli shunimaayeene. Areyoo ‘Koshonaa aaconon, bagee eexoochee shuuneeti tahoon, muttee tuppoochee shippeti tahoon, zayitoonaa uyoonon taach immiti ta shunechinaꞌon dabbi hammemmi taane’ iyane.

⁶ “Ebich bi gommon angixona kaccemmo taane; kechaa kelloon mucciiree xaqqoona uxeremmo taane.

⁷ Bi shunechinaꞌon dabbi hammemmine; tunebaani yeshaachemmine; boonoshin qaawemmine; tunebaani daneyaachemmine. Aroochee biyoo ‘Aafi ta keno waan wottehoye; halla aafi ta beemo andichoyee beshiye’ gettemmine.

⁸ Aree, maayoon, woyinee uyoonaa zayitoonon biich immeto, Baꞌaaloyich bi kichiibeeti aachoonaa birewoonon biich woddiito ta tunoon ariyaaneene.

⁹ “Ebich, maayi qecci goorooch ta maayoonaa ta uyoonon wochi daammemmo taane. Bi achoon bi qeremmoyich biich ta immeti, bagee eexoochee shuuneeti tahoonaa muttee tuppoochee shippeti tahoonon wochi deqqemmo taane.

¹⁰ Bi shunechinaꞌo aafoochaa shokkoon biin echiyemmo taane. Ta kishoochee biin wodiyemmo koniyoona aalloone.

¹¹ Bi emiree baareenaꞌon, nati baareenaꞌon, agenee keyi baareenaꞌon, shambeteenaꞌon, maacheti bi baareenaꞌo bullin echiyemmo taane.

¹² ‘Ta shunechinaꞌo waanee ta daneti gatiyoone’ bi ii beeti, woyinee qomboonaa balaasee mixinaꞌonon aalliyemmo taane. Eboshinoo kubboon tuniyemmo taane. Kubbi cooxinaꞌoo maayemminaꞌone.

¹³ Taan battaachaa bi shashoon shashaꞌa bi shunechinaꞌon bi dabbitoyich, wotta Baꞌaaleenaꞌoyich ixaanoon bi shookketi baaree aabeenaꞌoyich, biin naxemmo taane” iye Doono Yeeri.

Doono Yeeri Bi Asheenaꞌon Shunniibeeti Shuno

¹⁴ “Ebich areen dachiree barahooch daammemmo taane; maanjoona biin yibbaatiyemmo taane.

¹⁵ Aroochee bi woyinee goyoon biich immemmo taane; Akoori bamboonoo gibenee kello biich tuniyemmo taane. Aroochaanoo, Gibitsee bi keyiyooba, bi bushittinee aabooba, bi tuniitoommon, taach eekkemmine.

^16-17 “Arooba taan bi ceeggemmo ‘Ta keno’ getireeshalli ‘Ta Baꞌaalo’ getiree toonoone. Baꞌaaloochi shigoon bi noonoochee wokkiyemmo taane. Ebiyee damba bi shigo tiyaachemmone” iye Doono Yeeri.

¹⁸ “Arooba, boonoshicha geti kubbi cooxona tookki, shimaajji kafoonaa yuummere halleenaꞌona tookki wogoon giyemmo taane. Bulliyona diggoona boonoshi beeyemmoyich, koyee qiico bullin, maꞌoonaa goraadoonon showee toommoochee aalliyemmo taane.

¹⁹ “Bulli yemeenoon taach ne tunemmoyich, neen tippemmo taane; cadiqoonaa dayinnetoona, shoodoonaa ariqqoona, neen tippemmo taane.

²⁰ Gibeneeto tunoona neen tippemmo taane; newoo Doono Yeeri taan ariyemmi neene.

^21-23 Arooba ta, shimaayoyich wochemmo taane; shimaayoo showoyich wochemmone; showoo maayoyich, woyinee uyoonaa zayitoonoyich wochemmone; boonoshiyoo Yezireelich wochemminaꞌone. Ta asheenaꞌon showee toommooch bechemmo taane; ‘Ariqqeeyaaneenaꞌo’ getteetinaꞌon ariqqemmo taane; ‘Ta asheenaꞌo toono ittoshine’ getteetinaꞌon, ‘Ta asheenaꞌote’ gettemmo taane. Boonoshiyoo ‘Ne, no Nuggishoo neene’ getteminaꞌone” iye Doono Yeeri.