Hosee'i 13 - Kafa Linguistics Project

Israꞌeeleenaꞌo Toommooch Kindemmi Yeerichi Kaaro

¹ Efreemi yoodo yibbaatemmona bare yoodeenaꞌo shattii qewee beeheete. Biyoo Israꞌeelee showooch arichetone. Tunebaani Baꞌaaloyich goyinnoona xuꞌecho tuneꞌi qitiye.

² Andoo axaaxoon woddii woddii shuuneheete. Boonoshi birewoon ukkiꞌi, boonoshi qellich shahalleenaꞌon shuuneheete. Ashi ariyoona shuuneeti, misileenaꞌon shuuneheete. Bulliyona shuunee ariyechochi shuuneenaꞌone. Boonoshiyoo ishichiyeete: “Eboshich deejjoon giddii beetinaꞌo maamochi shahalloon shumbeete” iyeete.

³ Ebich boonoshi, maaddee quboomminaꞌo, harimmona bekkech shokkeebeeti keetoomminaꞌo, maayi buchi xaaꞌoochee yongo tiijjii daammiibeeti maaxxoomminaꞌo, wottoo mallee kelloona kechiibeeti cufoomminaꞌo tunemminaꞌone.

⁴ Doono Yeeri ishichiye: “Tunebaani ta, Gibitsee ittoshin kichiti, ittoshi Nuggishoo Doono Yeeri taane. Tayee besh bare nuggishoo ittoshich aalloone. Tayee besh wodiyecho baroo aalloone.

⁵ Barahoochaa, shuuꞌi showoochaanoo ittoshin shiimehoye.

⁶ Ittoshich ta maanjaa, michiyote; maa michiꞌinoo geeciyote; taanoo battehote.

⁷ Ebich ta ittoshich daaheroommon, gommooch ottii quyeebeeti maahoommonoo tunemmo taane.

⁸ Bi bushiishoo bokketi diibechoommon ittoshin yexxemmo taane; ittoshinoo shiiqqemmo taane. Aroochaanoo daaheroochoommon ittoshin yeshi maayemmo taane; kubbi cooxochoommon ittoshin yangixxemmo taane.

⁹ “Israꞌeeleenaꞌote, ittoshin gaachaabeeti ta toommooch ittoshi tiyitoyich, aallemmo ittoshine.

¹⁰ Taatoonaa iraasheenaꞌona ittoshich ichemmoyich echeto ittoshine. Ishigaata, ittoshin bi wodiyemmoyich, ittoshi taatoo and aaye? Ittoshi katemoo bulliich iraasheenaꞌo aayeete?

¹¹ Kaaroona taatoon ittoshich immehoye; ooge ta kaaroonoo biin aalliihoye.

¹² “Efreemi xuꞌo kooreetone; bi axaaxoo ikkooch guteetone.

¹³ Maaxoo manjeti ureechoommon xuuxo biich woyemmone. Tunebaani bi, ariyoo biich aalli bushoone. Bi shiijjemmi aabo shagiyooba bi indee maacoochee keyon qaawaani bushoommone.

¹⁴ Maash hamoochee boonoshin biishe echiyehote? Qitee giidoochee boonoshin shiwe wodiyehote? Qitoocho, ne naxeenaꞌon yeshi wobe! Maashoocho, ne aalliyoon yeshi wobe! Ebiyee bekk boonoshich ariqqeyaachemmo taane.

¹⁵ Bi maneenaꞌo daggoochaa bi gaannetaanona aabi-keyo waanee yongo barahoochee yongebee Doono Yeeri ta waanee waaree, bi aachi xuuphoon takkemmone; bi aachi oppoonoo shuuꞌiyemmone; bi ginjabeetoochee aaxxe bi qiico bullin tiijji daammemmone.

¹⁶ Shamaaree asheenaꞌo boonoshi xuqqiti xuꞌoyich echeyemminaꞌone. Boonoshi Nuggishoo toommooch boonoshi tiyitoyich goraadoona dihemminaꞌone. Boonoshi nallefeenaꞌo ceqqetaa qitemminaꞌone. Boonoshi maacheenaꞌochi yeqqefoo goheyemmone” iye.