Hosee'i 12 - Kafa Linguistics Project

¹ “Efreemi tuniibeeto, heeyo bullin aabi-keyo waanee waabeeti yongoon yecha yookkii dabboommi, gaacaalli mooyone. Kootoonaa hukkoonon woddiihe. Asooreenaꞌona tookkii wogoon giyiye; Gibitsoo zayitoon daachiihe” iye.

² Doono Yeeri Yihudee asheenaꞌo toommooch yaaqqiibeeti taggoo beetone. Yaaqobin bi gommoommona sheeremmone. Bi shuunoommonoo biich qoccemmone.

³ Yaaqobi maacooch beechii bi manoochi shoqqoon yechiye; oogeechiinoo Yeerina tookkii qiiccehe.

⁴ Maraakoona tookkii qiicceꞌinoo beshiye. Diiroon danoyich eeppiꞌi qollehe. Beeteelaa Yeerina danehe. Aroochaanoo Yeeri biinna yibbaatehe.

⁵ Biyoo Beshe Mawe Nuggishoo Doono Yeerine; bi shigo Doono Yeerine.

⁶ Ebich ne Nuggishoo Yeer waan wottebe; shunechonaa dayinnetechonon tunebe! Bulli aaboon ne Nuggishoon gibenebe!

⁷ Doono Yeeri ishichiye: “Israꞌeeleenaꞌo koote machoona qocciibeeti Kanaanee asheenaꞌon shaahitinaꞌone. Tuushiyoonoo shunniyeete.

⁸ Efreemi ‘Gaanneto taane; hajjoonoo daneto taane. Ebi gaanno beetaa koniyoona ta waanee axaaxoon woyee xuꞌoon danoon hakkaachemmone’ iye.

⁹ Gibitsee ittoshin kichito, ittoshi Nuggishoo Doono Yeeri taane. Nati baarooba bi tunetoommon, ittoshi duukkaani duukkaanooch ittoshi kotemmoyich tuniyemmo taane.

¹⁰ “Keemechinaꞌoyich yibbaatehoye; wodde yaaꞌoonoo boonoshich bekkiihoye. Keemechinaꞌona shaahiyoon boonoshich gettoye.

¹¹ Gilaadee showooch axaaxoo beetone. Ebi aroochaa boonoshiyoo duubemminaꞌone. Galigalaa gubbeneenaꞌon deejjoon giddiitinaꞌone. Boonoshi deejjee gudeenaꞌo goyee budooch beeti xaqqee gutoon tunemminaꞌone” iye.

¹² Yaaqobi Sooriyee showooch aallee hammiye; Israꞌeeli mechee danoyich maddehe; mecheen danoyich bagoon qiddehe.

¹³ Doono Yeeri keemechon daachiiꞌi Israꞌeelin Gibitsee kichiye. Keemechona tuneꞌinoo shiimehe.

¹⁴ Tunebaani Efreemi caamii biin ippiihe. Ebich bi Doono damee ukkee xuꞌoon bi toommooch tuniyemmone. Bi shigoon bi giishiitoyich, bi gatiyoon biich qoccemmone.