Hosee'i 11 - Kafa Linguistics Project

Doono Yeeri Israꞌeeleenaꞌon Shuno

¹ Doono Yeeri ishichiye: “Israꞌeelin batt busha bi beetaa shunnehoye; ta bushoonoo Gibitsee ceeggehoye.

² Tunebaani Israꞌeeli woddii ta ceeggemmona, woddiiꞌi ta waanee wokkiye. Ta asheenaꞌoo Baꞌaaloyich deejjoon deejjiyeete; shahalleenaꞌoyichoo ixaanoon shookkiyeete.

³ Efreemin haattaa, bi shaꞌemmoyich tuniito taane; ta sheenooch tiqqeto taane; tunebaani boonoshin wodiito ta tunoon ariyaaneenaꞌone.

⁴ Asho ariqqoommon ariqqaꞌa woderoona, shunee woderoonoo boonoshin ta waan yaabiyoye; boonoshi waanjoon kettiihoye; yittaꞌaanoo boonoshich maanjiyoye.

⁵ “Ta waan wotto boonoshi qajjitoyich Gibits wottemminaꞌone. Asooree taatoo boonoshin hajjemmone.

⁶ Boonoshi katemeenaꞌooch gino woyemmone; katemee kellee tuggeenaꞌonoo aalliyemmone; boonoshi gonde gaboochee tiyitona boonoshin maayemmone.

⁷ Ta asheenaꞌo ta waanee bara wottoon qaawiyeete; gaachee danoyichoo damba cookiyeete; tunebaani boonoshin gaachemmo koniyoona aalloone.

⁸ Efreemo, aabichiree neen duppehote? Israꞌeelo, aabichiree neen beshii immehote? Adiimaa ta tuniitoommon aabichiree ne toommooch tuniyehote? Tseboyimaa ta tuniitoommon aabichiree ne toommooch tuniyehote? Ta mullo ta maacoochaa qewetone; taanoo ariqqichitone.

⁹ Ta kaaree shiixxoon ne toommooch kindiyaachemmo taane. Efreemin wochinnoon aalliyaachemmo taane. Ebiyoo boonoshi daggooch beeti, Yaafe Nuggishoo ta tunetoyich, asho tuno ta qajjetoyichiye. Naxoona ne waan waataachemmo taane.

¹⁰ “Doono Yeeri taan dabbemminaꞌone. Tawoo daaheroochoommon gigemmo taane. Ta gigemmona ta bushiisheenaꞌo aabi-gimo waanee qewebee woyemminaꞌone.

¹¹ Qewebee Gibitsee kafoochoommon, Asooree showoocheenoo uggechoommon, woyemminaꞌone. Tawoo boonoshi kexooch boonoshi beeyemmoyich tuniyemmo taane” iye Doono Yeeri.

Yeeri Israꞌeeleenaꞌonaa Yihudee Asheenaꞌonon Ittibato

¹² Doono Yeeri ishichiye: “Efreemi kootoona, Israꞌeelee yareenaꞌoo maroona taan giichiyeete. Yihudi, Nuggishoyich hajjeyaano, gibeneeti Yaafe Nuggishoon shixxii beetone.