Hosee'i 10 - Kafa Linguistics Project

¹ Israꞌeeleenaꞌo wodde aafoon aafeti, bi aafo shushiti woyinee qomboomminaꞌone. Woddii boonoshi aafemmi haddoona meeti deejjee gudeenaꞌon shuuneheete. Boonoshi showoo gaanneti haddoona goyinnee xaqqee giimbeenaꞌon macecikkiꞌi shuuneheete.

² Dawushechi mullechinaꞌone. Ebich boonoshi xuꞌee gatiyoon deqqemminaꞌone. Doono Yeeri boonoshi deejjee gudeenaꞌon tiichemmone. Boonoshi goyinnee xaqqee giimbeenaꞌon aalliyemmone.

³ Boonoshiyoo “Doono Yeerin shato no qajjetoyich nooch taatoo aalloone; taatoo bi beetaanona nooch amoon halleshone?” iyeete.

⁴ Duube gibenoon gibenikkiyeete; kootoon wogoona wogoon giyiyeete. Ebich taggoo maayi daggooch colleebeeti xuppattechi shuyochoommon collemmone.

⁵ Shamaari katemee asheenaꞌo Beet Aween beeti maanji shahalloon shati qewemminaꞌone. Bi oogo shoottetoyich asheenaꞌo ebi maanji shahalloyich eeppemminaꞌone. Shahalloochi qeesheenaꞌo shooshemminaꞌone.

⁶ Are boonoshi shahalloo Asooree showooch daamaa ooge taatoyich wojjoo tuniitaa ichemmone. Efreemi giishemmone; Israꞌeeliyoo bi koceyoona yeellemmone.

⁷ Shamaaree showoonaa bi taatoona aachi toommooch beeti umboochoommon aallemminaꞌone.

⁸ Israꞌeelich axaaxoo tuneti Aweeni geppee toommeexi goyinnee xaaꞌeenaꞌo happeyemminaꞌone. Angixonaa guccinona keyiree boonoshi deejjee gudeenaꞌon bullemmone. Ebiyooba guudinaꞌon “Noon qeribote,” geppeenaꞌonoo “No toommooch dihibote” gettemminaꞌone.

Doono Yeeri Israꞌeeleenaꞌon Sheeremmo Tuno

⁹ Doono Yeeri ishichiye: “Israꞌeeleenaꞌo Gibaahaa axaaxoon boonoshi shuunetoochee tiijjiꞌi, axaaxoon shuunoona taan ayinikkoochee wotteyaaneenaꞌone. Ebich Gibaahaa gino boonoshi toommooch tiyemmone.

¹⁰ Ta qaawiyooba boonoshin sheeremmo taane. Gutte kishoo tuneti boonoshi axaaxoyich boonoshi sheereehooba aageteenaꞌo kiceeree boonoshi toommooch tiyemminaꞌone.

¹¹ “Efreemi, maayoon busho shunnaabeeti, doyiti gidereyoommone. Tunebaani ta, qaane bi qettooch waanjoon xandemmo taane. Efreemin xandemmo taane. Yihudi gochemmone; Yaaqobiyoo showoon niriyemmone.

¹² Ittoshi qellich cadiqoon shoohote; shoodeyee aafoon qecote; gocheyaani showoon goyote. Ebiyoo ta waaꞌa cadiqoon ittoshi toommooch amiyochoommon ta dichimmi wottoon Doono Yeeri ta waan ittoshi wottemmi aabo bi tunetoyichiye.

¹³ “Tunebaani ittoshi, gondoon shookkiꞌi, bi aafoon qecciyote. Kootee aafoonoo maahote. Ittoshi giidoona, ittoshich beeti koyechinaꞌochi meetonoo gibeneeto ittoshine.

¹⁴ Ebich koyo ittoshi showooch woyemmone. Ittoshi mishigeenaꞌoo happeyemminaꞌone. Shalimaani, Beet Aribeeli katemoon kochiꞌi bi happiyooba, indeenaꞌonoo boonoshi bushiisheenaꞌona tookkii ceqqee bi wuxiyooba tunetoommo tunemmone.

¹⁵ Beeteeli katemee asheenaꞌote, ittoshi axaaxee naboona ittoshi toommooch tunemmo ebine. Koyo tiyiree harooch Israꞌeelee taatoo qitemmone” iye.