Hosee'i 1 - Kafa Linguistics Project

¹ Yihudee taateenaꞌo, eboshiyoo Uziyaahi, Yotaami, Akaazinaa Hiziqiyaasinochi taatee yemeenooba, wotta Israꞌeelee taatoo, Yehoꞌashi bushoo Yeroboꞌamichi taatee yemeenooba Beerichi bushoo Hoseeꞌich waati Doono Yeerichi qaaro:

Hoseeꞌichi Mecheenaa Bi Bushiisheenaꞌonochi Mooyo

² Doono Yeeri batti batt Hoseeꞌina Israꞌeeleenaꞌoyich bi getiyooba, biich ishichiye: “Ta asheenaꞌo taan qajjiꞌi oogeton yahii beetinaꞌo boonoshi tunetoyich, newoo hamiree yahechi ureen shaage; bi waaneenoo yahaa shiijjeti bushiishoon shibe” iye.

³ Ebich Hoseeꞌi Dibilayimichi bushee Gomeerin shaggiye. Biyoo xifaꞌa anaami bushoon biich shiyahan.

⁴ Aroochee Doono Yeeri Hoseeꞌich ishichiye: “Giisheche aaboyee gubb, Yezireeli katemoochaa Yehi ukkiti damee nichoon bi yareenaꞌo toommooch gaaccemmo taane; Israꞌeelee taatittinoonoo kuxxemmo taane. Ebich bushoochi shigoon Yezireeli geti shigiibe!

⁵ Ebiyooba Yezireeli bamboochaa Israꞌeeleenaꞌochi maꞌoon tiichemmo taane” iye.

⁶ Gomeeri wochinnoon xifaꞌa maache busheen shiyahan. Doono Yeeriyoo Hoseeꞌich ishichiye: “Ebiyee bekk Israꞌeeleenaꞌon ariqqeyaachemmo, ciroonoo maaraachemmo ta tunetoyich bi shigoon Lo Ruhaami geti shigiibe!

⁷ Tunebaani Yihudee asheenaꞌoyich ariqqemmo taane; boonoshi Nuggishoo Doono Yeeri ta, boonoshin wodiyemmo taane. Boonoshin ta wodiyemmo maꞌoona woyee goraadoona woyee koyoona woyee haresheenaꞌona woyee hareshechinaꞌona toonoone” iye.

⁸ Lo Ruhaami xanon kuxxetoyee gubb, Gomeeri xifaꞌa anaami bushoon shiyahan.

⁹ Aroochee Doono Yeeri “Ta asheenaꞌo tuno ittoshi qajjitoyich, tawoo ittoshi Nuggishoo tuno ta qajjetoyich, bushoon Lo Ami geti shigiibe!

Israꞌeeleenaꞌoyich Gibenikkeeti Gibeno

¹⁰ “Israꞌeeleenaꞌo haddaa woyee qeelletaa ciyaani baharee gasheexi qacoochoommon meettemminaꞌone. ‘Ta asho toono ittoshine’ boonoshi getteeti ebi xaaꞌoochaa ‘Beeyechi Nuggishoo Yeerichi bushiisheenaꞌo’ getteyemminaꞌone.

¹¹ Yihudee asheenaꞌonaa Israꞌeeleenaꞌona wochinnoon ikkottemminaꞌone. Boonoshin yaabi qeejjemmi ikke wullonoo kaaccemminaꞌone. Mashaamiti beemon boonoshi showooch beeyemminaꞌone. Ebi aabo, Yezireelich worganikkiti aabo tunemmone.