Hiziqeeli 8 - Kafa Linguistics Project

Hiziqeelich Bekketi Guttinnee Yaaꞌoo ( 8:1–10:22 ) Yerusaalemaa Shahalloyich Asheenaꞌo Goyinno

¹ Kecaa no hammeti shirittinnee natooba, shirittinnee agenee uuchinnee qemooba, ta kexooch kotaꞌa ta beetaa, Yihudee geeneenaꞌo ta aafooch koteꞌi boonoshi beetaa Nuggishoo Doono Yeerichi giidoo ta toommooch kindiye.

² Ciinnaa ta iyaa, ebiyoche bi shaahoo qaaqqoommi ashoon beeggeho; bi shimetoyee deshaa qaaqqoommone; bi shimetoyee dambaa bekkoommo, wottoo gaamiti xuuroommone.

³ Biyoo kishoommi mooyon yaggiꞌi ta qelli eexon yechiye; Ayaano showoonaa shimaayoona gutte daggooch kaama taan tiijjiye; aroochee Yerusaalem, qanaatoon tiijjiibeeti shahalloo neexetooch, maaci addibaabooch giyeebeeti dambi-waanee yaafee kechi kellooch Yeerichi yaaꞌoona taan daammiye.

⁴ Ebiyoche yimaane showoochaa yaaꞌoona ta beeggetoommon, Israꞌeelee Nuggishoochi oogee yiiroo arooch beetone.

⁵ Yeeriyoo “Ashi bushoocho, dambi-waan ciine” iye; ebiyoche deejjee gudee kellooch, dambi-waan gimi kellooch ciinnaa ta iyaa, ebi qanaatoon tiijjiibeeti shahalloo beete.

⁶ Biyoo “Ashi bushoocho, boonoshi tunii beeton, ta yaafee kexoochee taan wokkiyoyich Israꞌeelee macceenaꞌo hiniichaa tuniibeeti oogeton ciigiiti mooyon beeggaa beetine? Andoo ebiyee beshi oogeton ciigiiti mooyon beeggemmo neene” iye.

⁷ Biyoo addibaabee kellooch taan deebiye; ciinnaa ta iyaa, ebiyoche xaqqee uxerooch aaho beete.

⁸ Biyoo taach “Ashi bushoocho, xaqqee uxeroon happibe” iye; tawoo happaa arooch ikke kelloon daneho.

⁹ Andoo taach ishichiye: “Giyiree aroochaa boonoshi tuniibeeti shixxii ciigiiti mooyon beege” iye.

¹⁰ Ebich maac giyaꞌa ciinneho; xaqqee uxeree guudo bulliich shicheeti, yuummere halleenaꞌo bullichi misilo, eeꞌe cooxinaꞌochi misiloonaa Israꞌeelee macceenaꞌochi shahalloo bullina arooch beete;

¹¹ eboshi aafooch Israꞌeelee macceenaꞌoochee ogooge shabe doonjeenaꞌo neexeꞌi beeteete; boonoshi daggoochoo Shafaanichi bushoo Yazaniyi neexeꞌi beete; ebi Israꞌeelee ogoogeenaꞌo boonoshi ikkikkoona ixaano shookkeebeeti qiicoon yechitinaꞌone; ebi qiicoochee ixaanee cufoo cufii beehe.

¹² Yeeriyoo taach ishichiye: “Ashi bushoocho, Israꞌeelee maccee qaabbeenaꞌo boonoshi shahalli shahallee kexoochaa manderoochaa boonoshi tunii beeton beeggetine? Boonoshiyoo ‘Doono Yeeri noon beegaanoone; Doono Yeeri hini showoon qajjitone’ itinaꞌone” iye.

¹³ Wottoo taach ishichiye: “Andoo boonoshi tuniibeeti ebiyee beshe oogichii ciigiiti mooyon beeggemmo neene” iye.

¹⁴ Aroochee dambi-waan, Doono Yeerichi yaafee kechi kellooch taan daammiye; ebiyoche Tamuuzi getteebeeti shahalloyich eeppii goppiibeeti maacheenaꞌo arooch beeteete.

¹⁵ Aroochee taach ishichiye: “Ashi bushoocho, ebin beeggaa beetine? Andoo ebiyee beshe oogichii ciigiiti mooyon beeggemmo neene” iye.

¹⁶ Aroochee taan Doono Yeerichi yaafee kechi maaci addibaabooch deebiye; ebiyoche Doono Yeerichi yaafee kechi godooch, gaaddaafoonaa deejjee gudoonochi gutte daggooch hiyaa uucha bede asheenaꞌo beeteete; boonoshi gubboon Doono Yeerichi yaafee kexo waan, boonoshi aafoonoo aabi-keyo waan wochiꞌi aabeyich guufee goyinnee beeteete.

¹⁷ Biyoo taach ishichiye: “Ashi bushoocho, ebin beeggaa beetine? Hiniichaa boonoshi tuniibeeti ebi eeꞌe mooyon tuniyoo Yihudee macceenaꞌoyich ebi kette mooyona? Showoon xuꞌoona ceechoona daakkiꞌi taan ippii beetinaꞌone; ebiyoche boonoshi naagoona taan ippiyoyich boonoshi tuniibeeti mooyo bullin beege.

¹⁸ Ebich ta, kaaroona boonoshi waan woyemmo taane; boonoshich ayini ariqqeyaachemmo taane; qaaroon oogichiꞌi ta waan boonoshi cookitaa waayeyaachemmo taane” iye.