Hiziqeeli 7 - Kafa Linguistics Project

Aallee Aabo Shago

¹ Doono Yeeri taach ishichiye:

² “Hini ashi bushoocho, Nuggishoo Doono Yeeri Israꞌeelee showeechon ishichii beetone: Ciireexi aallo showee toommooch awudde tuggoona shaggitone.

³ Israꞌeele, and ne ciiro shaggitone; ta kaaroon ne toommooch deejjemmo taane; ne gommoommona ne toommooch nallemmo taane; ciigiiti ne qocoo bullich neen naxemmo taane.

⁴ Neech ayini ariqqeyaachemmo taane; tunebaani ne shaaddoonaa ne daggooch beeti ciigiiti mooyonoyich neen naxemmo taane; aroochee Doono Yeeri ta tunoon ariyemmi neene.

⁵ “Nuggishoo Doono Yeeri ishichiye: Xuuxee toommooch xuuxo woyemmone.

⁶ Ciiro waatone! Ciiro shaggitone! Ittoshi toommooch tiyitone; ebiyoche waatone!

⁷ Hini showooch beetinaꞌote, ittoshi aallee aabo shaggitone; aabo shaggitone; deco katinnitone; ebiyoo dullee aaboani guudi toommoochaa ilileecho toonoone.

⁸ And kaateree ta neboon ne toommooch woniyemmo taane; ta kaaroon ne toommooch kindiyemmo taane; ne gommoommona ne toommooch nallemmo taane; ciigiiti ne mooyo bullich neen naxemmo taane.

⁹ Neech ayini ariqqeyaachemmo taane; tunebaani ne shaaddoonaa ne daggooch beeti ciigiiti mooyonoyich neen naxemmo taane; aroochee neen naxaabeeto Doono Yeeri ta tunoon ariyemmi neene.

¹⁰ “Ebiyoche deco! Israꞌeeli aallee aabo shaggitone; xuꞌoonaa hukkoona woddetone; geecoo diccii oogetone.

¹¹ Hukkoo dicciꞌi gondeechi gumbo tunetone; asheenaꞌo beshaa beshe boonoshi hajjoonaa gaannoona muricaachemminaꞌone.

¹² “Aabo waatone; deco katinnitone; nebo meetinaꞌochi toommooch bi waatoyich kemeebeeto emiraaye; kemmiibeetoo ayinaaye.

¹³ Bullin ciinnii beetona getteeti yaaꞌoo gubb kishoo hakkaachemmo bi tunetoyich, kemmitoonaa kemetona kashoona beeree kemmito bi kemmiton wochiyoon hakkaachemmone; xuꞌechi asho bi kashoon wodiyoo hakkaache.

¹⁴ Shameto huggiꞌi bulli mooyon boonoshi qanniitaa, ta kaaro bulli toommooch bi tunetoyich koniyoona ginooch hamaachemmone.

¹⁵ “Maach gino, maac biiyoonaa shaacoona beetone; katemoyee maach beeto ginoona qitemmone; katemooch beeto biiyoona, shaacoonoo qitemmone.

¹⁶ Muriccii woditinaꞌo guudi toommooch beechi bambeexi daabbichoommon boonoshi axaaxoyich shooshemminaꞌone.

¹⁷ Mochoo bulli niremmone; tingo bulliyoo qewemmone.

¹⁸ Dookoon tahemminaꞌone; keqqoo boonoshin yechemmone; bulliyona yeellemmone; boonoshi qelloon cakkemminaꞌone.

¹⁹ Boonoshi birewoon gommooch duppemminaꞌone; boonoshi aachoo eeꞌe mooyooch haddeyemmone; boonoshi birewoonaa aachoona Doono Yeerichi kaaree aabooba boonoshin wodiyaachemmone. Ebi boonoshich xugo bi tunetoyich boonoshi shaacoon wochaachemmone; woyee boonoshi maacoon michiyaachemmone.

²⁰ Gaawe boonoshi aachoonaa birewoona geecitinaꞌone; ebi aroona shixxii ciigiiti shahalloon shuuneheete; ebich ebi shashoon boonoshich eeꞌo tuniito taane.

²¹ Ashi showee asheenaꞌonaa showee toommeexi axaaxechinaꞌona boggemmoyich tuniyemmo taane; boonoshiyoo eeꞌiyemminaꞌone.

²² Ta aafoon badd ta wochiichaa boonoshiyoo aaxxe ta xaaꞌoon eeꞌiyemminaꞌone; boggechinaꞌo giyiree eeꞌiyemminaꞌone.

²³ “Showoo damoon ukkoona, katemoo hukkoona bi ceennitoyich, sansalatoon qanniibe!

²⁴ Aageteenaꞌo daggoochee oogeti gondeenaꞌon deebiree boonoshi kexon bogi boonoshi deqqemmoyich tuniyemmo taane. Giidechinaꞌochi geecoon shoottemmo taane; boonoshi yaafe xaaꞌeenaꞌoo eeꞌemminaꞌone.

²⁵ Xuuxo shagiyooba diggoon qaawemminaꞌone; tunebaani daneyaachemmone.

²⁶ Naxee toommooch naxo woyemmone; woree hilloochoo woroo woyemmone; keemechinaꞌo waanee yaaꞌoon qaawemminaꞌone; tunebaani sheeroo qeesheenaꞌo waanee, ciico geeneenaꞌo waanee aallemmone.

²⁷ Taatoo eeppemmone; woraaferashoo gibenoon kuxxemmone; showee asheenaꞌochi kishoo keqqoona qewemmone; boonoshi gommi gommoommona boonoshi toommooch tuniyemmo taane; boonoshi nallitoommon boonoshi toommooch nallemmo taane; Doono Yeeri ta tunoon ariyemminaꞌone” iye.