Hiziqeeli 6 - Kafa Linguistics Project

Shahalloyich Goyinnoon Yeeri Shixo

¹ Doono Yeeri taach ishichiye:

² “Ashi bushoocho, ne aafoon Israꞌeelee guudinaꞌo waan wochi ciine. Boonoshi toommoochoo keemoon keembe.

³ Ishichishoo gete: Israꞌeelee guudinaꞌote, Nuggishoo Doono Yeerichi qaaroon waayebote; Nuggishoo Doono Yeeri guudinaꞌonaa geppeenaꞌonoyich, qaaꞌeenaꞌonaa bambeenaꞌonoyich ishichii beetone: ‘Ta, ittoshi toommooch ginoon deebemmo taane; ittoshi goyinnee xaaꞌeenaꞌon aalliyemmo taane.

⁴ Ittoshi deejjee gudo happeyemmone; ittoshi ixaanee deejjee gudeenaꞌo buricemminaꞌone; wuxeeti ittoshi asheenaꞌon ittoshi shahalleenaꞌo aafooch duppemmo taane.

⁵ Israꞌeeleenaꞌochi dubenoon boonoshi shahalleenaꞌo aafooch duppemmo taane; ittoshi shaawusheenaꞌon ittoshi deejjee gudeenaꞌochi guudooch shaccemmo taane.

⁶ Ittoshi beeti katemeenaꞌo bulli happeyemminaꞌone; ittoshi goyinnee xaaꞌeenaꞌo aallemminaꞌone; ittoshi deejjee gudeenaꞌo happeeree aallemminaꞌone; ittoshi shahalleenaꞌo tiishaa aallemminaꞌone; ittoshi ixaanee deejjee gudo buricemmone; ittoshi shuuneenaꞌo hidaa aallemminaꞌone.

⁷ Wuxeetinaꞌo ittoshi daggooch dihemminaꞌone; ittoshiyoo Doono Yeeri ta tunoon ariyemmo ittoshine.

⁸ “ ‘Tunebaani ittoshi daggoochee giishecheenaꞌo murici wodemmoyich tuniyemmo taane; tunetaa boonoshiyoo aagetee showeenaꞌooch shacemmoyich tuniyemmo taane.

⁹ Ebi muriccii woditinaꞌo, tayee wokkiti yahechi boonoshi mulloonaa shahalloo waan wotteti yahechi boonoshi aafoona am shaahoon taan boonoshi ayinikkito gaata aagetee showooch beechi shalligemminaꞌone; boonoshi shuuneti gonde mooyonaa ciigiiti mooyonoochee tiyitona boonoshi qelloon hoxemminaꞌone.

¹⁰ Boonoshiyoo ta, Doono Yeeri ta tunoon, ebi gonde mooyon boonoshi toommooch tuniyemmo taane ta ito duuboon tunee bi qayonoo ariyemminaꞌone, itone’ gete” iye.

¹¹ Nuggishoo Doono Yeeri ishichiye: “Israꞌeelee macceenaꞌo boonoshi tuniiti ciigiiti gonde mooyo bulliichee tiyitona, ginoona, shaacoona, biiyoonoo dihemminaꞌo boonoshi tunetoyich, ne kishoon koppebee, ne baatoonoo showoon qafibee woowo, geti cookibe.

¹² Wohooch beeto biiyoona qitemmone; katinooch beeto ginoona dihemmone; aroochee muriccii wodito shaacoona ciiremmone; ta kaaroona ebiyoommi mooyon boonoshi toommooch tuniyemmo taane.

¹³ Wuxeeti boonoshi asheenaꞌo deejjee gudee guudooch beeti boonoshi shahallee daggooch, genje geppoo bullinaa guudo bullinochi toommooch, waajjechi mixo bullinaa wodde waajjechi meello bullinochi baatooch, shahalloyich shaawi cinnechi deejjoon boonoshi giddiiti xaaꞌoo bulliichoo boonoshi dihoon boonoshi beegiyooba, Doono Yeeri ta tunoon ariyemminaꞌone.

¹⁴ Ta mochoon boonoshi toommooch tiijjiree boonoshi beeyi xaaꞌoon barahoochee tiijji Ribila beddaahaa showoon shokko echiyemmo taane; ebina boonoshiyoo Doono Yeeri ta tunoon ariyemminaꞌone” iye.