Hiziqeeli 5 - Kafa Linguistics Project

¹ Doono Yeeri ishichiye: “Ashi bushoocho, aci goraadoon daamiree appoona cagoommon ne qelloonaa ne ishaanoonon cage; ebi qelloonoo machoona qociree keejj beera qoodibe.

² Giicheyoo ciiretoyee gubb ikke beeroon ne shichiti katemee daggoochaa qaaqqoona michemmo neene; ikke beeroon katemee guudoochaa goraadoona qeccemmo neene; wotta echeti ikke beeroon yongooch shaccemmo neene; tawoo goraadoona boonoshin yookkemmo taane.

³ Aroochee giishechoon daamiree ne qoreddee caappooch qullemmo neene.

⁴ Andoo aroochee giishechoon daami qaaqqooch ne gedaa mice; aroochee qaaqqoo Israꞌeelee macceenaꞌo bulli waan woyemmone” iye.

⁵ Nuggishoo Doono Yeeri ishichiye: “Ebi Yerusaalemine; showeenaꞌon bi guudoona tuniyaa, aageteenaꞌo daggooch biin kotiito taane.

⁶ Yerusaalemi aageteenaꞌoyee beshoon ta geteenaꞌo toommooch hukkoon tiijjiyan; bi guudoona beetinaꞌoyee beshoon ta qociyoon shaaddahane. Ebiyoo ta geteenaꞌon waayeyaache getonaa ta qociyoona hammi qayonane” iye.

⁷ Ebich Nuggishoo Doono Yeeri ishichiye: “Ittoshi guudoona beeti aageteenaꞌoyee beshe hukkecho tuneto ittoshine; ta qociyoon dabbaano ittoshine; ta getoyichoo deꞌa getaano ittoshine; ittoshi guudoona beeti aageteenaꞌochoommonolla quyeyaano ittoshine” iye.

⁸ Ebich Nuggishoo Doono Yeeri ishichiye: “Ta, ta qelloona ne toommooch tiyeto taane; aageteenaꞌo aafoochaa ne toommooch nallemmo taane.

⁹ Ciigiiti ne mooyo bullichi naboona, ebiyee aaf ciroona ta tuniyaani, ebiyee bekkoo ciroona ta tuniyaachemmi mooyon ne toommooch tuniyemmo taane.

¹⁰ Ebich ittoshi daggoochaa niheenaꞌo boonoshi bushiisheenaꞌon, bushiisheenaꞌo boonoshi niheenaꞌon maayemminaꞌone; eechiree ittoshi toommooch nallemmo taane; ebiichee muriccii echemmon yongee toommooch shaccemmo taane.

¹¹ “Ebich beeyecho ta tunoona wogaꞌa Nuggishoo Doono Yeeri ta ishichiyoye: Ciigiiti ne mooyona, ne eeꞌoonoo ta yaafee kexon ne eeꞌitoyich, neen giishiyemmo taane; neech ayini ariqqeyaachemmo taane.

¹² Ittoshiichee keejj beereexi ikkoo ittoshi daggoochaa biiyoona, shaacoonoo ciiremmone; wotta keejj beereexi ikkoo katemoyee maachaa goraadoona dihemmone; bare keejj beereexi ikkoon yongo bulliich shaccemmo taane; goraadoonoo yookkemmo taane.

¹³ “Ta kaaroon, ta neboonoo boonoshi toommooch kindiichi tooꞌi digaayemmo taane; ta kaaroon boonoshi toommooch ta kindiihooba Doono Yeeri ta, ta qanaatoona getteto ta tunoon ariyemminaꞌone.

¹⁴ “Ebiyeenoo wotta, ittoshin shokko echiyemmo taane; ittoshi guudoona beeti aageteenaꞌonaa aroona beshee beetinaꞌona ittoshi cooneyemmoyich tuniyemmo taane.

¹⁵ Kaaroona, neboona, ooge noggoona ittoshi toommooch ta nalliyooba, ittoshi guudoona beeti aageteenaꞌoyich naago, tochoo, meeqqeqqiyoonaa wuche getteyoonon tunemmo ittoshine; Doono Yeeri ta, ebin getteto taane.

¹⁶ Wuxii aalliyechi shaacee shangoon ittoshi toommooch deejjiree, ittoshin aalliyemmo taane; shaacoon ittoshi toommooch wochi wochi deebemmo taane; ittoshi maayi woretoon kuxxemmo taane.

¹⁷ Shaacoonaa gonde cooxinaꞌonon ittoshi toommooch deejjemmo taane; ittoshi bushiisheenaꞌon aalliyemminaꞌone; biiyo, ashi damee ukkoo ittoshi showoon yexxemmone; ittoshi toommooch ginoon deebemmo taane; Doono Yeeri ta, ebin getteto taane” iye.