Hiziqeeli 48 - Kafa Linguistics Project

Showoon Qoodoo

¹ “Yoodeenaꞌochi shigo ebine: Daani yoodoyich dambi-waanee ikke ixoo tunemmone; ebiyoo Meditiraanee baharoochee tiijjiꞌi Hetiloon waanaa Hamaati beshe kaattooch, Hamaati ciinooch beeti dambi-waani Damaasiqee danooch, Hatsaar Enaan, beddaahaane; ebi Daanichi daaro aabi-keyoochee aabi-gimooch beddaahaa tunemmone.

² “Daanichi daaroochee tiijjii aabi-keyoochee aabi-gimooch beddaahaa Aseerichi qoodoo tunemmone.

³ “Aseeri daaroochee tiijji aabi-keyoochee aabi-gimooch beddaahaa beeto Nifitaalichi qoodoo tunemmone.

⁴ “Nifitaali daaroochee tiijjii aabi-keyoochee aabi-gimooch beddaahaa Minaasichi qoodoo tunemmone.

⁵ “Minaasi daaroochee tiijjii aabi-keyoochee aabi-gimooch beddaahaa Efreemi qoodoo tunemmone.

⁶ “Efreemi daaroochee tiijjii aabi-keyoochee aabi-gimooch beddaahaa Roobeelichi qoodoo tunemmone.

⁷ “Roobeelichi daaroochee tiijjii aabi-keyoochee aabi-gimooch beddaahaa Yihudichi qoodoo tunemmone.

⁸ “Yihudichi daaroochee tiijjii aabi-keyoochee aabi-gimooch beddaahaa beeti xaaꞌoon bariyemmo ittoshine; bi maaco hiyaa uuche hume hiroone; bi gidoo aabi-keyoochee aabi-gimooch beddaahaa bare asheenaꞌochi qoodoona tato tunemmone; yaafee kexo ebi xaaꞌee gutte daggooch tunemmone.

⁹ “Doono Yeerich barii ittoshi kichemmi xaaꞌoo bi gidoo hiyaa uuche hume hiroo, bi maacoo aashire hume hiroo tunemmone.

¹⁰ Qeesheenaꞌoyich tunemmi yaafeeti qoodoo ebine: Ebi qoodoo dambi-waanaa bi gidoo hiyaa uuche hume hiroo, aabi-gimo waanaa bi maaco aashire hume hiroo, aabi-keyo waanaa bi maaco aashire hume hiroo, deshi-waanaa bi gidoo hiyaa uuche hume hiroon tunemmone. Doono Yeerichi yaafee kexoo bi gutte daggooch tunemmone.

¹¹ Ebiyoo Israꞌeeleenaꞌo ta waanee wohiyooba Leweenaꞌo wohoommon wohaani, ta getoonoo quyeti Sadooqi yaroochee yaafeeti qeesheenaꞌoyich tunemmone.

¹² Showoochee bariti qoodoo boonoshich tunemmone; ebiyoo oogichii yaafeeton tunemmone; ebi boonoshi qoodoo Leweenaꞌochi daarooch tunemmone.

¹³ “Qeesheenaꞌochi daaree ciinooch, bi gidoo hiyaa uuche hume hiroo, bi maaco aashire hume hiroo tuneti qoodoo Leweenaꞌocho tunemmone; bulliyona bi gidoo hiyaa uuche hume hiroo, bi maaco hiye hume hiroo tunemmone.

¹⁴ Ebi xaaꞌoo Doono Yeerich yaafeeto bi tunetoyich, boonoshiyoo aroochee kemmaayeete; shaddishoo gettaayeete; ebi showoo bulliyee beshe gaawe showoo bi tunetoyich barooch beshii immaayeete.

¹⁵ “Bi gidoo uuche humoonaa bi maaco hiyaa uuche huma hiroona tuneti echeti xaaꞌoo asheenaꞌo tookki gaachemmi xaaꞌoone; ebiyoo beeyi xaaꞌoonaa miinji gaddoonoyich tunemmone; katemoo bi gutte daggooch tunemmone.

¹⁶ Ebi katemeechi gidoo dambi-waanaa awudde humaa uuche balle hiroo, deshi-waanaa awudde humaa uuche balle hiroo, aabi-keyoochaa awudde humaa uuche balle hiroo, aabi-gimoochaa awudde humaa uuche balle hiroo, tunemmone.

¹⁷ Ebi katemeyichoo bi guudoona miinji gaddo beeyemmone; ebi miinji gaddo dambi-waanaa gutte ballaa aache hiroo, deshi-waanaa gutte ballaa aache hiroo, aabi-keyo waanaa gutte ballaa aache hiroo, aabi-gimo waanaa gutte ballaa aache hiroo, tunemmone.

¹⁸ Echeti, yaafeeti xaaꞌee gaꞌooch beeti showoo bi gidoo aabi-keyo waan aashire hume hiroo, aabi-gimo waan aashire hume hiroo tunemmone; aroochee daneebeeti maayo katemee daggooch shuunee beetinaꞌoyich tunemmone.

¹⁹ Israꞌeelee maccoo bulliichee katemooch shuuneebeeto ebi showoon gochemmone.

²⁰ “Barii ittoshi kichemmi yaafeeti showoo bi awudde naaboo bi ikkikkoona hiyaa uuche hume hiroo tunemmone; ebi yaafeeti showoo katemoo shuuneeton daakkiꞌiniye.

²¹ “Yaafeeti xaaꞌoonaa katemee xaaꞌoonochi okkinaa hachinooch beeti echeti xaaꞌoo iraashoyich tunemmone; ebiyoo hiyaa uuche hume hiroo tuneti yaafeeti xaaꞌee daaroochee tiijjiꞌi aabi-keyo waani showee caappooch beddaahaa, aabi-gimoochaa hiyaa uuche hume hiroochee tiijjiꞌi aabi-gimo waani showee caappooch beddaahaa, Israꞌeelee yoodeenaꞌochi showee gaꞌooch beeti showoo iraashoocho tunemmone; yaafeeti xaaꞌoonaa yaafee kexona gutte daggooch tunemmone.

²² Ebina Leweenaꞌochi iristoonaa katemoo beeti showoona okkinaa hachinooch beeti iraashoochi showee gutte daggooch tunemmone; ebi iraashoochi showoo, dambi-waanaa Yihudi showee daarooch, deshi-waanaanoo Biiniyaami showee daarooch tunemmone.

Bare Yoodeenaꞌoyich Qoodeeti Showoo

²³ “Echeti Israꞌeelee yoodeenaꞌoyich showoo ebiyoommona qoodeyemmone: Biiniyaamichi showoo beeto deshi-waan tuneechii aabi-keyoochee aabi-gimooch bedoone.

²⁴ “Biiniyaami daaroochee tiijji aabi-keyoochee aabi-gimooch beddaahaa Simoonich ikke qoodoo tunemmone.

²⁵ “Simooni daaroochee tiijji aabi-keyoochee aabi-gimooch beddaahaa Yisakoorich ikke qoodoo tunemmone.

²⁶ “Yisakoori daaroochee tiijji aabi-keyoochee aabi-gimooch beddaahaa Zebuloonich ikke qoodoo tunemmone.

²⁷ “Zebulooni daaroochee tiijji aabi-keyoochee aabi-gimooch beddaahaa Gaadich ikke qoodoo tunemmone.

²⁸ “Deshi-waani Gaadichi daaro Tamaari katemee deshi-waanina besheꞌi Meriib Qadeeshi aacooch beddaahaa, aroochee Gibitsee aachi danoona hammiꞌi Meditiraanee baharooch beddaahaa tunemmone.

²⁹ “Iristoon tuniiree Israꞌeelee yoodeenaꞌoyich ittoshi qoodemmi showoo ebine; boonoshi qoodee showeenaꞌoo eboshine” iye Nuggishoo Doono Yeeri.

Yerusaalemi Katemee Kelleenaꞌo

^30-31 “Katemoochee kecheebeeti kelleenaꞌo eboshine: Ebi katemee kelleenaꞌo Israꞌeelee yoodeenaꞌochi shigoona shigemminaꞌone; awudde humaa uuche balle hiroo tuneti dambi-waani gidooch keejje kelleenaꞌo tunemminaꞌone; eboshiyoo ikkoo Roobeelicho, ikkoo Yihudicho, ikkoo Lewichi kello tunemmone.

³² “Awudde humaa uuche balle hiroo tuneti aabi-keyo waani gidoochoo keejje kelleenaꞌo tunemminaꞌone; eboshiyoo ikkoo Yooseeficho, ikkoo Biiniyaamicho, ikkoo Daanichi kello tunemmone.

³³ “Awudde humaa uuche balle hiroo tuneti deshi-waani gidoochoo keejje kelleenaꞌo tunemminaꞌone; eboshiyoo ikkoo Simoonicho, ikkoo Yisakooricho, ikkoo Zebuloonichi kello tunemmone.

³⁴ “Awudde humaa uuche balle hiroo tuneti aabi-gimo waani gidooch keejje kelleenaꞌo tunemminaꞌone; eboshiyoo ikkoo Gaadicho, ikkoo Aseericho, ikkoo Nifitaalichi kello tunemmone.

³⁵ “Bi guude gawo aaraa shimitte hume hiroo tunemmone; are aaboochee tiijji ebi katemee shigo Doono Yeeri Arooch Beeti Katemoo getteyemmone” iye.