Hiziqeeli 47 - Kafa Linguistics ProjectYaafee Kechi Dechiichee Xuupphiibeeti Aaco 1 Are uro, yaafee kechi kello waan taan wochii deebiye; aacoo yaafee kechi kelloochee aabi-keyo waan woccii beehe; ebiyoo yaafee kexo aabi-keyo waan wotteto bi tunetoyichiye; ebi aacoo deshi-waan beeti yaafee kechi kellee shagee dechiichee kechiꞌi, deejjee gudoyee deshi-waanina woccii beehe. 2 Aroochee dambi-waani kelloona taan daammiye; aabi-keyo waan wotteti maachi kellooch taan guudiihe; aacoo maachi kellee deshi-waanina woccii beehe. 3 Uro qeellee woderoon geechiꞌi aabi-keyo waan hammiye; hume hiroon hirehe; aachi daggoona taan beshiihe; aacoo baatee qullooch shaggiye. 4 Wottoo hume hiroon hireechi aachi daggoona taan beshiihe; aacoo gutenooch shaggiye; wottoo hume hiroon hirehe; aroochee aachi daggoona taan beshiihe; aacoo shimetooch shaggiye. 5 Wottoo hume hiroon hirehe; aaco beshoyich taach hakkeyaani oogeton ceeno tunehe; ebi aaco baatoona kimo hakkeyaani, waakkoyich bedditi gejjoone. 6 Uroo taach “Ashi bushoocho, ebin beeggetine?” iye. Aroochee taan aachi gaagemooch wochii deebiye. 7 Ta wottehaa ebiyoche aachi gaagemooch, okkinaa hachinooch wodde mixinaꞌo beeteete. 8 Aroochee taach ishichiye: “Ebi aaco aabi-keyo waani showooch, desh Yoordaanoosi bambooch woccemmone; aroochee Kiikki baharooch bi giyaa areexi aaco xallemmone. 9 Aaco hammiibeeti xaaꞌoo bulliich shuuriibeeti kashechi halloo bulli beeyemmone; meeti haasheenaꞌo arooch beeyemminaꞌone; ebi aaco aroona hammitoyich bahareexi aacinaꞌo xallemminaꞌone; ebi aaco hammito bulliich kashechi mooyo beeyemmone. 10 Haashe yesheenaꞌo baharee gashooch neexemminaꞌone; En Geedee tiijji En Egilayim beddaahaa beeti xaaꞌoo haashe yeshe dabbo yaggeyemmi xaaꞌoon tunemmone; arooch beeti haashoo Meditiraanee baharooch beeti haashoochoommon meeti yarecho tunemmone. 11 Tunebaani goca beeti taappoonaa niitoona xalleyaachemmone; kiikki danee xaaꞌoo tuneree beeyemmone. 12 Aachi gashooch, okkinaa hachinooch aafo manjeebeeti mixinaꞌo beeyemminaꞌone; boonoshi waamo shoollaachemmone; boonoshi aafoo ooyaachemmone; yaafee kexoochee kechiti aacon danee beetinaꞌo boonoshi tunetoyich agen agenoona aafoon aafemminaꞌone; boonoshi aafo maayoon, boonoshi waamo attoon tunemmone” iye. Showee Daaro 13 Nuggishoo Doono Yeeri ishichiye: “Aaraa gutte Israꞌeelee yoodeenaꞌoyich iristoon tuniiree ittoshi qoodemmi showee daaro ebine; Yooseefich gutte ixoo tunebe. 14 Ebi showoon tachiree qoodeebote; ittoshi qaabbechinaꞌoyich imma ta wogetoyich, ebi showoo ittoshich iristoon tunemmone. 15 “Showee daaro ebin tunemmone: Dambi-waanaa, Meditiraanee baharoochee tiijjiꞌi, Hetilooni waanaa Hamaati beshe kaattooch, Tsedaad beddaahaa, 16 Damaasiqinaa Hamaatinochi daggooch beeti Beerootahinaa Sibirayiminon yechiꞌi, Hawuraani gashooch beeti Hatser Hatikoon beddaahaanoo tunemmone. 17 Ebi daaro Meditiraanee baharoochee tiijjii dambi-waani Damaasiqi danoon geddiꞌi, Hamaati danoon dambi-waan qajjiꞌi beeti Hatsaar Enaan beddaahaane; dambi-waani daaro ebine. 18 “Aabi-keyo waani daaro, Damaasiqinaa Hawuraanina daggoona beshe, Yoordaanoosin yeshi Gilaadee showoonaa Israꞌeelee showoonochi daggoona hamiree Kiikki baharoonaa Tamaarinooch beddaahaa tunemmone; aabi-keyo waani daaro ebine. 19 “Deshi-waani daaro Tamaaree tiijjii Meriib Qadeeshi aacooch beddaahaa, Gibitsee aachi gashoochee Meditiraanee baharooch beddaahaa tunemmone; deshi-waani daaro ebine. 20 “Aabi-gimo waani daaro deshi-waani daaroochee tiijjii Hamaati beshe kaattee ciinooch beddaahaa beeti Meditiraanee baharo tunemmone; aabi-gimo waani daaro ebine. 21 “Israꞌeelee yoodo ittoshi ebi showoon qoodeyemmo ittoshine. 22 Ittoshinaa ittoshi daggooch koteti, ittoshi daggoochaa bushoon shiyiti ashi showee asheenaꞌona iristoon tuniiree showoon ixoona qoodeyemmo ittoshine; boonoshiyoo showechinaꞌon, Israꞌeelee macceenaꞌonoo tuniitaa ciichebeete; Israꞌeelee yoodeenaꞌochi daggooch ittoshina tookki iristoon qoodeebeete. 23 Ashi showee asho yoodeenaꞌochi daggooch aabiichona bi kotetaa, iristoon biich immemmo ittoshine, iye Nuggishoo Doono Yeeri. |
SIM International, 2020.