Hiziqeeli 46 - Kafa Linguistics Project

¹ Nuggishoo Doono Yeeri ishichiye: “Maaci addibaabooch giijjiibeeti, aabi-keyo waan wotteti kello, shuunee aabo tuneti shiritte qemo bulliich hicheree beebe; tunebaani shambetoobinaa agenee keyi baaroobina qecheebe.

² Iraashoo maach waan beeti beshe boochoona giyiree kellee qoomee gaꞌooch neexebe; qeesheenaꞌoo micciibeeti bi giddiiti deejjoonaa ikkittinee deejjoonon deejjibeete. Iraashoo kelloochaa goyinnebe; ebiyee gubboo keye; tunebaani kello xumemmi wottoon hichaaye.

³ Showee asheenaꞌoo Doono Yeeri aafoochaa, are kelloochaa, shambetoobinaa agenee keyi baaroobina goyinnebeete.

⁴ Iraashoo Doono Yeerich giddiyemmi micciibeeti deejjoo bachaalli shiritte gishiishi bagee baaddoonaa bachaalli ikke ooge bagee baaddoona tunebe.

⁵ Ooge bagee baaddoona tookki ikke efaahee maayi buuroon giddiibe; wotta gishiishi bagee baaddeenaꞌona tookki bi qaawitoommi maayi buuroon giddiibe; efaahee ikke maayi buuro bi ikkikkooch keejje neetiree zayitoon gede.

⁶ Agenee keyi baarooba, ikke gubbenoon, shiritte gishiishi bagee baaddoonaa ikke ooge bagee baaddoonon giddiibe; eboshi bulliyoo bachaalleenaꞌo tunebeete.

⁷ Gubbenoona tookki ikke efaahee maayi buuroon, ooge bagee baaddoona tookki ikke efaahee maayi buuroon; gishiishi bagee baaddeenaꞌona tookki iraashoo bi qaawitoommi maayi buuroon giddiibe; ikke efaahee maayi buurooch keejje neetiree zayitoon gede.

⁸ Iraashoo bi giyii beegaata beshe boochoona gibe; bi kechii beegaatoo aroona keye.

⁹ “Tunebaani showee asheenaꞌo baarooba Doono Yeeri aafooch boonoshi waahooba, goyinneya dambi-waani kelloona giyimmo, deshi-waani kelloona keye; deshi-waani kelloona giyimmo, dambi-waani kelloona keye; bi ciinooch beeti kelloona keyalli bi giyiti kelloona gubb wotteree kechaaye.

¹⁰ Boonoshi giyii beegaata, iraashoo boonoshina tookki gibe; boonoshi kechii beegaatoo, keye.

¹¹ “Ogooge baaroobinaa gishiishi baaroobina, ikke efaahee maayi buddinoon gubbenoona tookki, ikke efaahee maayi buddinoon ooge bagee baaddoona tookki, bi qaawitoommi maayi buddinoon gishiishi bagee bushiishoona tookki giddiibe; ikke efaahee maayi buurooch keejje neetiree zayito gibe.

¹² Iraashoo bi daaggoona bi giddiibeeti deejjoon, micciibeeti deejjoon woyee bi daaggoona Doono Yeerich bi giddiibeeti ikkittinee deejjoon bi giddii beegaata, aabi-keyo waan wotteti kello biich qecheebe; shambetooba bi tunii beetoommon, micciibeeti deejjoonaa ikkittinee deejjoonon giddiibe; aroochee maach keye; bi kechitoyee gubb, kello hichebe.

¹³ “Qemi qemona micciibeeti deejjoyich, bachaalli ikke nati bagee baaddoo, Doono Yeerich maaddi maaddoona giddebe.

¹⁴ Ebina tookki maayi buuro, efaahee shirittoochee ikke beeree gaawe buddino xiriꞌoyich tunemmi ikke neetiree zayitoo maaddi maaddoona giddebe; ebi maayi buuro Doono Yeerich bulli aabooch qoceeton tunebe.

¹⁵ Bulli aabooch micciibeeti deejjoyich, giishi bagee baaddoo, maayi buuroonaa zayitoona maaddi maaddoona giddebe” iye.

Iraashoochi Showee Mooyo

¹⁶ Nuggishoo Doono Yeeri ishichiye: “Iraashoo, bi bushiisheenaꞌoochee ikkoyich showoon wojjoo tuniiꞌi bi imigaata, ebi showoo bi bushoonaa ebi bushoochi shiijjeroonoyich iristoon tunemmone.

¹⁷ Tunebaani bi iristoochee bi guuninaꞌoochee ikkoyich bi imigaata, yoobeelee nati wottoon biicho tunebe; aroyee gubb bi doonoyich wochibe; iristo iraashoochi bushiishoyich icheti wojjoo baachiye manjemmo.

¹⁸ Iraashoo asheenaꞌon boonoshi iristoochee waaxiichi ashi showoon deqqaaye; bi anaami bushiisheenaꞌoyich bi immemmo bi hajjee showoochee baachiye; ebiyoo ta ashoochee koniyoona bi iristoochee bi waacheyaachemmoyichiye” iye.

Deejjoo Qannemmi Xaaꞌoo

¹⁹ Aroochee are uro taan kellee gaꞌooch beeti, dambi-waan wotteti, qeesheenaꞌocho tuneti yaafeeti kexinaꞌooch deebiye; ebi kexinaꞌoochaa aabi-gimo waan, duꞌooch beeti ikke xaaꞌoon beeggeho.

²⁰ Biyoo taach ishichiye: “Hini xaaꞌoo qeesheenaꞌo xuꞌee deejjoonaa axaaxee deejjoonoyich giddeti meenoochee boonoshi kiijjemmi, maayi buuroocheenoo boonoshi kachiyemmi xaaꞌoone; ebina asheenaꞌo naxeyaachemmoyich ebi yaafeeti maayoochee amolla maachi addibaabooch keyaachemmone” iye.

²¹ Aroochee maachi addibaabooch taan deebiye; are addibaabeechi awudde shuutoona taan guudiihe; are addibaabee awudde shuutoo bulliich bare addibaaboo beetone.

²² Addibaabeechi awudde shuutooch beeti gishiishi addibaabeenaꞌo bulliyona tateenaꞌone; bi ikkikkoochi gidoo aabbe hiroo, bi maaco shaashe hiroone.

²³ Ebi awudde addibaabeenaꞌochi guudoona xaqqee uxeroo beetone; ebi xaqqee uxereenaꞌochi baatooch maayo kachiibeeti xaaꞌeenaꞌo beetinaꞌone.

²⁴ Uroo taach ishichiye: “Eboshi, yaafee kexooch maddee beetinaꞌo aroochaa asheenaꞌochi deejjoon boonoshi kiijjiibeeti xaaꞌeenaꞌone” iye.