Hiziqeeli 45 - Kafa Linguistics Project

Iristee Qoodeyoo

¹ “Showoon iristo tuniiꞌi ixoona ittoshi qoodii beegaata, yaafeeti ikke ixee showoon Doono Yeerich kichibote; bi gidoo hiyaa uuche hume hiroo, bi maaco hiye hume hiroo tunebe; bi guudo bulli yaafeeton tunemmone.

² Ebi aroochee bi gidoo uuche balle hiroo, bi maaco uuche balle hiroo tuneti shuutawudde xaaꞌoo yaafee kexoyich tunemmone; bi guudoona aache hire shokkaache xaaꞌoo beeyemmone.

³ Yaafeeti xaaꞌoochee bi gidoo hiyaa uuche humo, bi maaco aashire humo tuneti xaaꞌoon hiremmo neene; ebi arooch bulliyee beshoon yaafoo tuneti yaafee kexo tunemmone.

⁴ Showoo bulliyee beshoon yaafeeton tunemmone; ebiyoo yaafee kexooch maddeebeeti, Doono Yeerich maddoyich waabeeti qeesheenaꞌoyich tunemmone; ebi xaaꞌoo qeesheenaꞌochi kechi xaaꞌoonaa yaafee kexoyich kechiti xaaꞌoonon tunemmone.

⁵ Bi gidoo hiyaa uuche hume hiroo, bi maaco aashire hume hiroo tuneti bare xaaꞌoo yaafee kexooch maddeebeeti Leweenaꞌoyich arooch boonoshi beeyemmi iristee katemoon tunemmone.

⁶ “Yaafeeti xaaꞌee gaꞌooch, bi maaco uuche hume hiroo, bi gidoo hiyaa uuche hume hiroo Israꞌeelee maccoo bullichi katemee xaaꞌoon tunemmone.

Iraashoochi Iristee Qoodoo

⁷ “Iraashoochi ixee qoodoo yaafeeti xaaꞌoonaa katemee xaaꞌoonochi gaꞌooch okkinaa hachinooch tunemmone; yaafeeti xaaꞌoonaa katemee xaaꞌoonochi aabi-gimo waanaa showee daarooch beddaahaa, aabi-keyo waanaanoo showee daarooch beddaahaa shagoone; bi gidoo ikke yoodoochi showee gidoommon tuneechi, aabi gimi danoochee aabi keyi danooch shago tunemmone.

⁸ Ebi xaaꞌoo Israꞌeeleenaꞌo daggooch bi iristoon tunemmone. Iraasheenaꞌo Israꞌeelee macceenaꞌoyich showoon boonoshi yoodi yoodoommona qoodemminaꞌone; tunebaani ta asheenaꞌon ebiyee bekk xuuxiyaachemminaꞌone” iye.

Iraashoo Dabbemmi Qociyoo

⁹ Nuggishoo Doono Yeeri ishichiye: “Israꞌeelee iraasheenaꞌote, illa beddiye. Xuꞌoonaa neexxii hajjoonon neechibote; tatoonaa kaamoona tuneti mooyon tuniibote; ta asheenaꞌon boonoshi iristoochee yooho ebiyee bekk beddiye. Ebin Nuggishoo Doono Yeeri ta getteto taane.

¹⁰ Ibere machoo, ibere tachee qiicoonaa ibere qeellee qiicoona ittoshich tunebe.

¹¹ Efaahoonaa batoona tato tunebe; bato homeereechi aashire kishoochee ikkoone; efaahoo homeereechi aashire kishoochee ikkoone; qeelleenaꞌoo homeeroona tacheebeete.

¹² Sheqeelo hiye geeroo tunebe; hiye sheqeelee toommooch hiyaa uuche sheqeeloonaa aaraa uuche sheqeeloonon daakkigaata ikke miinaanoon tunemmone.

¹³ “Ittoshi giddiyemmi deejjoo ebine: Ikke homeeree teepphoochee efaahee shiritte kisheexi ikkoo, ikke homeeree sheqoochee efaahee shiritte kisheexi ikkoone.

¹⁴ Zayiteechi qociyoo, homeero bulliichee bateechi aashire kishoochee ikkoone. (Ikke homeero aashire batoone).

¹⁵ Mocechi Israꞌeelee gaddoochee gutte balle bagoochee ikke bagoon immemmo ittoshine; eboshiyoo ittoshi axaaxoon maariyoyich, maayi buuroyich, micciibeeti deejjoonaa ikkittinee deejjoonoyich tunemminaꞌone, iye Nuggishoo Doono Yeeri.

¹⁶ Showee asho bulli Israꞌeelee iraashoyich ebi deejjoon immemmone.

¹⁷ Baari baaroona, agenee keyi baaroona, shambetoona, maacheeti Israꞌeelee baaroo bullina micciibeeti deejjoon, maayi buuroon, uyee buuroonoo qanniyoo iraashoochone. Iraashoo Israꞌeeleenaꞌochi axaaxoon maariyoyich, axaaxee deejjoonaa maayi buuroonon, micciibeeti deejjoonaa ikkittinee deejjoonon giddiyemmone” iye.

Baaree Baaroo

¹⁸ Nuggishoo Doono Yeeri ishichiye: “Ikkinnee agenee batti batti qemooba bachaalli ikke gubbenoon deebe; yaafee kexonoo xalliibe.

¹⁹ Qeeshoo axaaxee deejjee damoochee daamiree yaafee kechi qoomeenaꞌooch, deejjee gudee degee awudde shuutoonaa maaci addibaabee kellee qoomeenaꞌonooch huute.

²⁰ Gabaanoon woyee ariyaanoon axaaxoon shuunemmi ashich ebi agenee shabaattinnee qemooba ebiyoommon tuniibe; ebina yaafee kexo yaafeyemmoyich tuniyemmo neene.

²¹ “Batti batti agenee aaraa awuddinnee qemooba Beshee Baaroon baaremmo ittoshine; shabaatte qemi wottoon shittoo giyaani koshon maayemmo ittoshine.

²² Ebiyooba, iraashoo biinnaa showee asho bullinoyich, axaaxee deejjoyich tunemmi gubbenoon giddiibe.

²³ Baaroo baareebeeti shabaatte qemooch, qemi qemona, bachaalli shabaatte gubbenoonaa shabaatte bagee baaddoonon micciibeeti deejjoyich Doono Yeerich giddiibe; axaaxee deejjoyichoo qemi qemona ikkikke emmishee baaddoon giddiibe.

²⁴ Ikkikke gubbenoonaa bagee baaddoonon bi giddii beegaata, ikke efaahee maayi buuroonaa keejje neetiree zayitoonon tookki giddiibe.

²⁵ “Shabaattinnee agenee aaraa uuchinnee qemoobee tiijjiꞌi shabaatte qemon baareebeeti baarooba, axaaxee deejjoyich, micciibeeti deejjoyich, zayitoonaa maayi buuroonoyichoo ebiyoommon giddiibe” iye.