Hiziqeeli 44 - Kafa Linguistics Project

Aabi-keyo Waani Kelleechi Gaaco

¹ Aroochee uro aabi-keyo waan wotteti, maach beeti yaafee kechi kellooch taan wochii deebiye; kelloo hichetone.

² Doono Yeeri taach ishichiye: “Hini kello hicheshalli bi beeyemmo ciroona qecheyaachemmone; asho aroona giyaachemmone; ebiyoo Israꞌeelee Nuggishoo Doono Yeeri aroona bi giyitoyichiye; ebichoo hicaa beeyemmone.

³ Iraashoo baach Doono Yeeri aafoochaa koshon mamoyich arooch giyemmone; biyoo beshe boochoona giyiree aroona kechemmone” iye.

Yaafee Kexooch Gimonaa Keyonoyich Icheti Sheeroo

⁴ Uro dambi-waani gommona yaafee kechi kellee aafooch taan deebiye; ciinnaa ta iyaa, ebiyoche, Doono Yeerichi oogee yiiroo yaafee kexooch ceennitone; tawoo baroona showooch guufeho.

⁵ Aroochee Doono Yeeri taach ishichiye: “Ashi bushoocho, Doono Yeerichi yaafee kechi qociyoo bullinaa bi sheeroo bullinochon ta gettaa beeton gaawichi ellebe; ne aafoonoo ciine; shalligishoo gete; yaafee kexooch gimonaa keyonoyich daaggeeti asheenaꞌochon gaawichi ariibe.

⁶ Hukkechi Israꞌeelee macceenaꞌoyich ishichibe: ‘Nuggishoo Doono Yeeri ishichiye: Israꞌeeleenaꞌote, ebi ciigiiti ittoshi mooyon qayote.

⁷ Taach deejjoo tuniiꞌi koshon, awuyonaa damoonon ittoshi giddiihooba boonoshi mulloonoo tuneba boonoshi achoona dokireyaani ashi showee asheenaꞌo ta yaafee kexooch boonoshi giyemmoyich, ta kexonoo boonoshi eeꞌiyemmoyich, tuniito ittoshine; ebin tuniyoona ciigiiti ittoshi moochi toommooch daakkiꞌi ta wogoon happiyote.

⁸ Ittoshich baach icheti yaafeeti ta mooyinaꞌon quyee qeejjoon qajjiichii ashi showee asheenaꞌo quyemmoyich ta yaafee kexooch boonoshin ukkiriihote itone’ gete.

⁹ Ebich Nuggishoo Doono Yeeri ishichiye: Boonoshi mulloona, boonoshi achoonoo dokireyaani ashi showee asheenaꞌo, Israꞌeeleenaꞌo daggooch kotetinaꞌolla tunetaa ta yaafee kexooch giyaayeete.

Shahalloon Dabbiti Leweenaꞌo Mooyo

¹⁰ “Israꞌeeleenaꞌo ta waanee wokkiyooba boonoshi shahalloon dabbiꞌi ta waanee wokkiti Leweenaꞌoo boonoshi axaaxoon shaaggemminaꞌone.

¹¹ Tunetaa boonoshi ta yaafee kechi kelloon quyoona, micciibeeti deejjoonaa asheenaꞌo giddiibeeti deejjoonoyich giddeebeeti gijjeenaꞌon guuroon, wottoo asheenaꞌoyich maddoona yaafee kechi maddechinaꞌon tunemminaꞌone.

¹² Shahalleenaꞌoyich goyinneebeeti asheenaꞌoyich boonoshi maddetoyich, Israꞌeelee yareenaꞌoyichoo axaaxee xugo boonoshi tunetoyich, ‘Boonoshi axaaxoon shaaggemminaꞌone’ iyaꞌa wogeto taane, iye Nuggishoo Doono Yeeri.

¹³ Qeeshoo tuneree taach maddoyich ta waan katinaachemminaꞌone; yaafeeti ta mooyonaa oogichii yaafeeti ta deejjoonooch katinaachemminaꞌone; boonoshi shuuneti ciigiiti mooyinaꞌoyich boonoshi yeelloon shaaggemminaꞌone.

¹⁴ Tunebaani yaafee kechi shuunoo bullin boonoshi shuunemmonaa aroochaa shuunee beeton ciini boonoshi shuuniyemmoyich boonoshin ukkiriyemmo taane” iye.

Qeesheenaꞌochi Maddoo

¹⁵ Nuggishoo Doono Yeeri ishichiye: “Tunebaani Israꞌeelee macceenaꞌo ta waanee boonoshi wokkiyooba, ta yaafee kechi qociyoon quyeti Sadooqichi yareenaꞌo tuneti Lewee qeesheenaꞌo taach maddoyich ta waan katinnemminaꞌone; awuyonaa damoonochi deejjoon taach giddiyoyich ta aafooch neexemminaꞌone.

¹⁶ Ta yaafee kexooch giyiree taach maddoyich ta madee aafooch giddemminaꞌone; ta getoonoo quyemminaꞌone.

¹⁷ “Maaci addibaabee kellooch boonoshi giyiyooba, muttee tuppoochee shippeti tahoon tahebeete; maaci addibaabee kelloonaa kechi maacoonooch boonoshi maddiyooba bagee huushoochee shuuneeti taho amolla boonoshi achooch beeyaaye.

¹⁸ Boonoshi qellooch muttee tuppoochee shippeti caacoon caaceete; muttee tuppoochee shippeti shuroon eddebeete; caajjiibeeti eddoon eddaayeete.

¹⁹ Maachi addibaabooch asheenaꞌo waan boonoshi keyoyee shiichi, taheꞌi boonoshi maddeebeeti taheenaꞌon kichiree yaafeeti kexooch kotiichi baroon tahebeete; ebiyoo boonoshi tahoochee tiyitona asheenaꞌo naxeyaachemmoyichiye.

²⁰ “Qeesheenaꞌo boonoshi qelloon cakkaayeete; boonoshi qelloon qamichi maachebeetani dichaayeete.

²¹ Qeeshoo tuneto koniyoona woyinee uyoon uyiichi maaci addibaabooch giyaaye.

²² Xuumeenaa gawukkeetinon shaaggaayeete; tunebaani Israꞌeelee yaroochee gidiideen woyee bi keno qititi qeeshoo mecheen shaageete.

²³ “Qeesheenaꞌo yaafeetonaa yaafeyaanoonochi daggooch beeti barbarittinoon ta asheenaꞌoyich dojjibeete; xalloonaa xalloo tuneyaanoonon boonoshi bariyemmi gommon bekkiibeete.

²⁴ Asho kaarehooba nallechon tunebeete; ta qociyoommona nallibeete; ta baaroon ciinnii beetona ta geteenaꞌonaa ta qociyoonon quyebeete; ta shambetoonoo yaafibeete.

²⁵ “Qeeshoo dubeno waan katinona eeꞌaaye. Tunebaani qitito bi nihoo, bi indee, bi bushoo, bi bushee, bi manoo woyee shaakkeyaani bi manee tunegaata eeꞌoon hakkiye.

²⁶ Bi eeꞌegaata bi xalletoyee gubb shabaatte qemon yagibe.

²⁷ Yaafee kechi daggoochaa maddoyich maaci addibaabooch bi giyiyooba bi axaaxee deejjoon giddiibe; Nuggishoo Doono Yeeri ta ebin getteto taane.

²⁸ “Ta, qeesheenaꞌoyich iristo ta tunetoyich Israꞌeelee daggooch boonoshich showoon immaahote; ta boonoshich iristo taane.

²⁹ Maayi buuroon, axaaxee deejjoonaa xuꞌee deejjoonon maayemminaꞌone; Israꞌeeleenaꞌo daggoochee bariitaa taach kechiti mooyo bulli boonoshicho tunemmone.

³⁰ Qaabbe maayo bulliichee gaawi gaawe yiillecho bulli bi shaahi shaahoona, taach ittoshi giddiibeeti maayo bulliichee bi shaahi shaahoona qeesheenaꞌoyich tunemmone; ittoshi kexooch diiroo kotemmoyich, ittoshi buddinee maayi cilloon qeesheenaꞌoyich imbote.

³¹ Qeesheenaꞌo bi alla qititi woyee cooxo yechiti kafoon woyee gijjoon maayaayeete.