Hiziqeeli 43 - Kafa Linguistics ProjectYaafee Kexooch Yeerichi Oogee Yiiroo Wotto 1 Are uro aroyee gubb aabi-keyo waani kellooch taane daammiye. 2 Aroochee Israꞌeelee Nuggishoo Yeerichi oogee yiiroo aabi-keyo waanee waahe; bi qaaro ooge aacochoommon buugii beehe; bi oogee yiiroochee tiyitona showoo aaxxee bekkehe. 3 Ebi ta beeggeti yaaꞌoo, katemoon aalliiya bi waahooba ta beeggetoommo, Kebaari aacoochaanoo ta beeggetoommone; tawoo baroona showooch guufeho. 4 Doono Yeerichi oogee yiiroo aabi-keyo waani kelloona yaafee kexooch giyiye. 5 Areegaata Ayaano taan tiijjii maaci addibaabooch daammiye; Doono Yeerichi oogee yiiroo yaafee kexooch ceennitone. 6 Uroo ta gaꞌooch neexeꞌi beetaa, Doono Yeeri yaafee kexoochaa taach yibbaatee beetaa waayeho. 7 Biyoo taach ishichiye: “Ashi bushoocho, Israꞌeelee macceenaꞌochi daggooch bulli aabooch ta kotemmi ta taatee qeenonaa ta neexemmi xaaꞌoona hinine; ebiyee bekk Israꞌeelee macceenaꞌonaa boonoshi taateenaꞌona yahoona, wottoo qititi boonoshi taateenaꞌoyich boonoshi tuniibeeti mooyona ta shigoon eeꞌiyaachemminaꞌone. 8 Boonoshi kelloon ta kellee gaꞌooch, boonoshi shaaqqee qoomoon ta shaaqqee qoomee gaꞌooch boonoshi gedditoyich, boonoshichonaa taachonochi daggooch ikke daabbo baachiye beeto; boonoshi shuuneti ciigiiti mooyona yaafe ta shigoon boonoshi eeꞌitoyich ta kaaroona boonoshin aalliihoye. 9 Andoo boonoshi yahoonaa qititi boonoshi taateenaꞌoyich boonoshi tuniibeeti mooyonon ta waanee wokkiibeete; tawoo boonoshi daggooch bulli aaboon beeyemmo taane” iye. 10 Aroochee Doono Yeeri taach daakkiꞌi ishichiye: “Ashi bushoocho, boonoshi axaaxoona boonoshi yeellemmoyich, Israꞌeelee asheenaꞌoyich yaafee kexon, bi malletoonaa bi shuunee yamoonon bekkiibe. 11 Boonoshi shuuneti axaaxoo bullina yeelletinaꞌo boonoshi tunegaata, yaafee kechi yamoon, bi shuunoon, keyi kelloon, gimi kelloon, shuunee yamo bullin, bi qociyoonaa bi sheeroonon boonoshich arichiibe; bi yamoonaa bi sheeroonon boonoshi dabbemmoyich boonoshi aafoochaa kooribe. 12 “Yaafee kechi sheeroo ebine: Guudi toommooch yaafee kechi guudoona beeti xaaꞌoo bulli oogichii yaafeeton tunemmone; yaafee kechi sheeroo ebine” iye. Deejjee Gudo 13 Deejjee gudo yaafee kexo qeelleeti qeelloona qeelleeꞌi ebiyoommone: Guudoona beeti deejjee gudee boꞌoo bi neexo ikke hiroo, bi maaco ikke hiroo tunemmona, ikke ciixi dego bi guudoona beetone. Wotta deejjee gudeechi neexo ebine: 14 Deejjee gudee baata beeti kuxo bi boꞌoochee tiijjii deshi degooch beddaahaa bi neexo gutte hiroo, bi maaco ikke hiroone; deshi degoochee dambee degooch beddaahaa bi neexo awudde hiroo, bi maacoo ikke hiroone. 15 Deejjoo micciibeeti xaaꞌee neexo awudde hiroone; bi toommooch kaama wotteꞌi qaalliti awudde qareenaꞌo beetinaꞌone. 16 Ebi deejjoo micciibeeti xaaꞌoo awudde naabecho tuneechii bi ikkikkoo aaraa gutti aaraa gutte hiroone. 17 Bi degee gidoo aaraa awudde hiroo, maaco aaraa awudde hiroone; bi awudde naaboo tatoone; guudoona beeti bi noonoo qachi hiroone; bi guude hecoo ikke hiroone; deejjee gudeechi daqqeenaꞌo aabi-keyo waan wottetinaꞌone. Deejjee Gudo Yaafeyoo 18 Aroochee Doono Yeeri taach ishichiye: “Ashi bushoocho, Nuggishoo Doono Yeeri ta ishichiyoye: Deejjee gudo shuunetaa qanniyooba micciibeeti deejjoon giddiyee qocoo, aree toommooch damoon wucee qocoo ebine: 19 Taach maddoyich ta waan giddeti Sadooqi yaroochee tuneti Lewee qeesheenaꞌoyich, axaaxee deejjoyich tunemmi gubbenoon immemmo neene, iye Nuggishoo Doono Yeeri. 20 Newoo bi damoochee daamiree deejjee gudee qareenaꞌooch, bi degee awudde shuutooch, guudoona beeti bi noonoochoo wucemmo neene; ebina deejjee gudoon xallii, yaafemmo neene. 21 Ebi axaaxee deejjoyich giddeti gubbenoo daamaa, yaafee kexoyee maachaa, ebich qoceeti xaaꞌoochaa miccemmone. 22 “Bi dechara axaaxee deejjoyich tunemmi, bachaalli emmishee baaddoon deejjoo giddiyemmo neene; deejjee gudoon gubbenoochi damoona ne xalliyoommon bi damoonoo xalliyemmo neene. 23 Xalliyoon ne ciichitoyee gubb, bachaalli gubbenoon, bagee daggoochee ikke bachaalli bagee baaddoonoo giddiyemmo neene. 24 Doono Yeeri aafooch giddiyemmo neene; qeesheenaꞌoo arooch kiihon shishikkemminaꞌone; micciibeeti deejjoon tuniiree Doono Yeerich giddiyemminaꞌone. 25 “Shabaatte qemon, qemi qemona axaaxee deejjoyich tunemmi emmishee baaddoon giddiyemmo neene; gijjeenaꞌo daggoochee bachaalli ikke gubbenoonaa bagee baaddoona giddemmone. 26 Deejjee gudoon xalliyoyich shabaatte qemon yaafiyee qociyoon tuniyemminaꞌone; ebina deejjee gudo yaafeeto tunemmone. 27 Ebi decinaꞌo ciiretoyee gubb, qeesheenaꞌo shimittinnee qemoochee tiijji asheenaꞌochi micciibeeti deejjoonaa ikkittinee deejjoonon, deejjee gudooch deejjemminaꞌone; tawoo boonoshin gaawe aafoona ciinnemmo taane, iye Nuggishoo Doono Yeeri” iye. |
SIM International, 2020.