Hiziqeeli 42 - Kafa Linguistics Project

Yaafee Kechi Gaꞌooch Shuuneeti Gutte Kexinaꞌo

¹ Aroochee uro damba beeti addibaabooch taan daammiye; maachi addibaaboona, dambi-waani yaafee kechi addibaabee ciinoonaa dambi-waan beeti kechi ciinoonooch beeti kexinaꞌooch taan deebiye.

² Dambi-waan beeti kechi gidoo balle hiroone; bi maaco aache hiroone.

³ Maachi addibaabee godee ciinooch, maaci addibaaboochaa hiye hiroon wokkiꞌi beeti keejje kuxona shuuneeti kechi toommeexi kexinaꞌoyich, ciiniitaa shuuneeti gaaddaafeenaꞌo beetinaꞌone.

⁴ Kexinaꞌochi aafooch, bi maaco aashire hiroo bi gidoo balle hiroo tuneti beshe kaattoo beetone; shaaqqeenaꞌoo beeto dambi-waaniye.

⁵ Toomma beeti kexinaꞌo daggi kexinaꞌonaa showeexi kexinaꞌonoyee beshe xebbeenaꞌone; ebiyoo gaaddaafeenaꞌo gaminnitoyichiye.

⁶ Maachi addibaabeexi kexinaꞌo giimbechinaꞌone; tunebaani hinoshi giimbaalleenaꞌone; ebiyoo keejje kuxona kechi toommooch kexo tuniitaa boonoshi hakketoyichiye; ebich tookk beeti kexinaꞌo daggeexinaꞌonaa dech beetinaꞌonoyee beshe xebbeenaꞌone.

⁷ Kexinaꞌonaa maachi addibaaboonochi ciinooch xaqqee uxeroo beetone; ebi uxeroo bi beeto kexinaꞌochi aafoochiye; bi gidoo aache hiroone.

⁸ Maachi addibaaboo waan beeti kexinaꞌochi gidoo aache hiroone; tunebaani yaafee kechi ciinooch beeti kexinaꞌochi gidoo balle hiroone.

⁹ Ebi kexinaꞌoyee dech aabi-keyo waanaa maachi addibaaboochee beshe kaattoo beetone.

¹⁰ Deshi-waanaa maachi addibaabee xaqqee uxeree gaꞌooch, shokkaache xaaꞌoonaa kexonochi ciinooch, bare kexinaꞌo beetinaꞌone.

¹¹ Ebi kexinaꞌochi aafooch beshe kaattoo beetone; dambi-waan beeti kexinaꞌochoommon, boonoshi gidoo, maaco, kecheebeeti kello, shaaqqoonaa bulli mooyona hajjaa shaahoone.

¹² Ebi deshi-waani kexinaꞌochi dechiich, aabi-keyo waan, xaqqee uxeree gaꞌooch, beshe kaattooch, kello beetone.

¹³ Uro aroochee taach ishichiye: “Shokkaache xaaꞌee ciinooch dambi-waaninaa deshi-waaninooch beeti kexinaꞌo, Doono Yeer waan giddeebeeti qeesheenaꞌo oogichii yaafeeti deejjee maayoon boonoshi maabeeti kexinaꞌone. Are xaaꞌoo yaafeeto bi tunetoyich, oogichii yaafeeti mooyinaꞌon, eboshiyoo maayi buuroon, axaaxee deejjoonaa xuꞌee deejjoonon arooch kotiyemminaꞌone.

¹⁴ Qeesheenaꞌo yaafee kexooch giyii boonoshi maddetoyee gubb, boonoshi maddee tahoon shaddiꞌi arooch kotiyaanoon maachi addibaabooch keyaachemminaꞌone; ebiyoo taho yaafeeto bi tunetoyichiye; bare tahoon taheree asheenaꞌo beetooch hammemminaꞌone” iye.

Yaafee Kexo Shuuneeti Xaaꞌoo Qeelleyoo

¹⁵ Uro yaafee kechi maaci xaaꞌoon hiree bi ciichitoyee gubb, aabi-keyo waani kelloona maach taan kichiye; aroochee yaafee kechi guudoon hirehe.

¹⁶ Qeellee yaaboona aabi-keyo waanin bi hiretaa uuche balle hiroo tunehe.

¹⁷ Dambi-waanin bi hiretaa uuche balle hiroo tunehe.

¹⁸ Deshi-waanin bi hiretaa uuche balle hiroo tunehe.

¹⁹ Aabi-gimo waanin bi hiretaa uuche balle hiroo tunehe.

²⁰ Awudde guudoon hirehe; yaafeetonaa yaafeyaanoonon bariibeeti daabbo yaafee kechi guudoona beetone; ebi duukki gidoo uuche balle hiroo, bi maacoo uuche balle hiroone.