Hiziqeeli 41 - Kafa Linguistics Project

¹ Aroochee yaafee kechi dagg beeti Yaafe Xaaꞌooch taan daammiye; arooch daammiibeeti gimi kellee duuhoon bi qeelletaa bi taggoo gutte baddicholla shiritti shiritte hiroo tunehe.

² Gimi kellee maaco aashire hiroone; gimi kelloochi duukki gidoo kelloochee duꞌooch beddaahaa gutte baddaanolla uuchi uuche hiroone; daggi kechi gidoon bi hiretaa aabbe hiroo, bi maaco hiye hiroo tunehe.

³ Aroochee maaci kexooch giyiye; gimi kellee duuhoon bi qeelletaa bi taggoo gutte baddicholla gutti gutte hiroo tunehe; gimi kellee maaco shiritte hiroone; gimi kelloochi duukki gidoo kelloochee duꞌooch beddaahaa gutte baddaanolla shabaatti shabaatte hiroone.

⁴ Maaci kexon bi hiretaa bi gidoo hiye hiroo, bi maaco hiye hiroo tunehe. Aroochee taach: “Ebi Yaafe Xaaꞌeexi Yaafoone” iye.

Yaafee Kechi Guude Gocona Shuuneeti Kexinaꞌo

⁵ Yaafee kechi duuhoon bi qeelletaa bi taggoo shiritte hiroo tunehe; yaafee kechi guudo bullina beeti kexinaꞌo bullichi maaco awudde hiroone.

⁶ Ebi kexinaꞌo ikkoochi toommooch ikkoo tuniitaa keejje yaaroona shuuneetinaꞌone; ikke yaarooch shaashe kexo beetone; kechi toommeexi kexinaꞌochi qojjeenaꞌo arooch kashemmi xaqqee duuho yaafee kechi guudoona beetone; ebich ebi qojjeenaꞌon yaafee kechi duukki toommooch kashiyoo qaawiyaanoone.

⁷ Qojjeenaꞌo kasheti, yaafee kechi guudoona beeti duuheenaꞌoochee tiyitona, desh beeti kexoyee bi tookk beeti kexo beshi gaminoone; kexinaꞌoyich deshi kexoochee toommeexi kexooch daammiibeeti, daggi kexona besheti daqqello beetone.

⁸ Yaafee kechi guudoona hashekkimiti xaqqee duuho beemon beeggeho; ebi duuho gishiishi kexinaꞌochi hecoone; ebiyoo shiritte hiroo tuneti ikke yaaboone.

⁹ Gishiishi kexinaꞌochi maachi duukki taggoo uuche hiroone; shokkaache xaaꞌoo yaafee kexonaa

¹⁰ qeesheenaꞌonochi kexonochi daggooch beetone; ebi xaaꞌoo bi beeto yaafee kechi guudoona tuneechii bi maaco hiye hiroone.

¹¹ Shokkaache xaaꞌee yoochinaa qanninooch beeti kexinaꞌooch daammiibeeti kelleenaꞌo beetinaꞌone; ikke kello beeto dambi-waan, wotta baroo deshi-waaniye; shokkaache xaaꞌee maaco uuche hiroone; ebi xaaꞌoo guude gawoona beetone.

¹² Yaafee kechi addibaabee ciinooch, aabi-gimo waan, bi maaco shabe hiroo tuneti kexo beetone; ebi kechi duukki taggoo uuche hiroo, bi gidoo yixene hiroone.

¹³ Uro yaafee kexon bi hiretaa ikke balle hiroo tunehe; shokkaache xaaꞌoonaa kexo bi duuhoona tookkii balle hiroo tunehe.

¹⁴ Wotta aabi-keyo waanaa yaafee kechi kellinaa shokkaache xaaꞌoonochi maacoon bi hiretaa balle hiroo tunehe.

¹⁵ Aroochee yaafee kechi daaddooch, uxeree maaci ciinooch beeti kexonaa hachinaa okkinooch beeti beshe boocheenaꞌonochi gidoon bi hiretaa balle hiroo tunehe. Yaafee kechi beshe boocho, Yaafe Xaaꞌoo, Yaafe Xaaꞌeexi Yaafoo,

¹⁶ keeminaꞌochi guudoocholla goci degechi mallee kelleenaꞌo beetinaꞌone; yaafee kexoo kello waanaa showoochee tiijjii mallee kelleenaꞌooch beddaahaa mixona kaappetone; mallee kelleenaꞌoochoo qereenaꞌo beetinaꞌone.

¹⁷ Kelleenaꞌochi tookki duuho maacinaa maachina ebiyoommon kaappetone; maacinaa daggoonooch beeti kexinaꞌo bulliich

¹⁸ kiruuboonaa yeebbee michi misiloona shicheetone; yeebbee michi misilo, kiruuboonaa kiruuboonochi daggooch beetone; kiruubo bi ikkikkoona aafoochaa gutti gutte shaahechone.

¹⁹ Ashoon shaahe malletecho ikke badd beeti yeebbee michi misiloon ciinniye; tunebaani more daaheroon shaahe malletecho wotta bare badd beeti yeebbee michi misiloon ciinniye; eboshiyoo yaafee kechi maacooch guudoona shicheetinaꞌone.

²⁰ Godoochee tiijjiꞌi shaaqqoyee tookk beddaahaa daabbooch kiruuboonaa yeebbee mixinaꞌonochi misileenaꞌo shicheetinaꞌone.

²¹ Yaafe Xaaꞌooch giijjiibeeti kellee qoomeenaꞌo shuutawuddeenaꞌone; Yaafe Xaaꞌeexi Yaafee ciinooch beetinaꞌoo ebiyoomminaꞌone.

Mixoochee Shuuneeti Deejjee Gudo

²² Mixoochee shuuneti deejjee gudee neexo keejje hiroo, bi gidoo gutte hiroo, bi maaco gutte hiroone; bi shuutoo, bi baatoonaa bi naaboona mixoochee shuuneetone; biyoo taach “Ebi Doono Yeeri aafooch beeti madelloone” iye.

Kelleenaꞌo

²³ Yaafe Xaaꞌoonaa Yaafe Xaaꞌeexi Yaafoonoyich gutti gutte kelleenaꞌo beetinaꞌone.

²⁴ Kelleenaꞌoyich boonoshi ikkikkoona qoddeebeeti gutti gutte shaaqqeenaꞌo beetinaꞌone; ebi geto ikke kelloyich gutte shaaqqoo, wotta ikke kelloyich gutte shaaqqoo beete getone.

²⁵ Duuhooch shicheetoommi kiruubeenaꞌonaa yeebbee michi misiloona ebi yaafee kechi shaaqqeenaꞌooch shicheetone; maach waan beeti beshe boochee aafooch shaaqqoo tongafeetone.

²⁶ Beshe boochee hachinaa okkinooch beeti duuhooch mallee kelleenaꞌo beetinaꞌone; wotta yeebbee michi misilo arooch shicheetone; okkinaa hachinooch beeti gishiishi kexinaꞌoo ebiyoommon tongafeetinaꞌone.