Hiziqeeli 40 - Kafa Linguistics Project

Gubb Shuuneyemmi Yaafee Kechicho Bekketi Yaaꞌoo

¹ Kecaa no hammeti hiyaa uuchinnee natooba, ikkinnee agenee aashirinnee qemooba, Yerusaalemi katemoon etto yexxiti aaraa awuddinnee natooba, ebi arooba Doono Yeerichi giidoo ta toommooch waahe; taanoo tiijjii Yerusaalemi deebiye.

² Yeerichi yaaꞌoona Israꞌeelee showooch deebiꞌi, ooge guudi toommooch taan kotiihe; aroochoo meeti kexinaꞌo shuuneeti katemoommi mooyon deshi-waanee ciinneho.

³ Arooch taan bi deebimmona ebiyoche gooshoommi malletechi uroo arooch beete; ebi uro bi kishooch muttee tuppoochee yexxeti woderoonaa qeellee yaaboonon yechiꞌi kellooch neexetone.

⁴ Are uro taach “Ashi bushoocho, hiniich ne womi naboo ebin neech ta bekkiyemmoyichiye; ebich ne aafoona ciine; ne waamona waayebe; neech ta bekkii beeton ne mullooch gede; ne beeggemmo bullinoo Israꞌeelee macceenaꞌoyich gete” iye.

⁵ Ebiyoche yaafee kechi guudo bulliich xaqqee duuho beetone; uroochi kishooch shiritte hira bede qeellee yaaboo beetone; uxeroon bi qeelletaa bi taggoo ikke yaaboo, bi neexo ikke yaaboo tunehe.

⁶ Aroochee aabi-keyo waan wotteti kellooch hammiye; daqqelloon kechiꞌi shaaqqee shagoon bi qeelletaa ikke yaaboon tunehe.

⁷ Kellechochi kexo bulli bi gidoo ikke yaaboo, bi maaco ikke yaaboone; kellechinaꞌochi kexinaꞌo uuche hiroon woheeꞌiniye boonoshi beeto. Beshee gaaddaafee gaꞌooch beeti shaaqqee shagoo maac waanaa ikke yaaboone.

⁸ Aroochee maac qanna beeti beshee gaaddaafoon qeellehe.

⁹ Gimi kellee boocho shimitte hiroo, kellooch beeti duukki taggoo gutte hiroo tunehe; are gimi kellee boocho beeto yaafee kechi ciinoochiye.

¹⁰ Aabi-keyo waani kelloon quyechinaꞌochi kexinaꞌo ikke baddaa keeminaꞌo, wotta bare baddaa keeminaꞌo tuneechii bulliyona tateenaꞌone; eboshichi daggooch beeti duuheenaꞌo tateenaꞌone.

¹¹ Gimi kelloon bi hiretaa bi maaco aashire hiroo, bi gidoo aaraa keejje hiroo tunehe.

¹² Kellechinaꞌo kexinaꞌochi ciinooch bi neexoonaa bi taggoona ikkikke hiroo tuneti xaqqee uxeroo beetone; kellechochi kexinaꞌo ikke baddaa shiritte hireenaꞌo wotta bare baddaa shiritte hireenaꞌone.

¹³ Aroochee ikke kellechochi kechi duukki duꞌoochee tiijjii bare kellechochi kechi duukki duꞌooch beddaahee beeti xaaꞌoon bi qeelletaa hiyaa uuche hiroo tunehe; kelloonaa kelloona ciinoone.

¹⁴ Wotta beshe boochoon bi hiretaa hiye hiroo tunehe; kelleexi beshe boochee guudoona addibaaboo beetone.

¹⁵ Gimi kelloochee daaddee kellooch beddaahaa beeti boocho aache hiroone.

¹⁶ Kellechinaꞌochi kexinaꞌonaa duuheenaꞌonochi maaci guudoona mallee kelleenaꞌo beetinaꞌone; wottoo beshe boochee maacaa guudoona mallee kelleenaꞌo beetinaꞌone; duuheenaꞌooch yeebbee michi misilo shicheetone.

¹⁷ Aroochee maachi addibaabooch taan deebiye; ebiyoche addibaabee guudoona kexinaꞌonaa xaqqoona hecceti godoona beetinaꞌone; hecceti godee gaꞌooch shaashe kexinaꞌo beetinaꞌone.

¹⁸ Deshi godo kellooch beddaahaa xaqqo hechetone; maaci godo maachi godoyee kaama hashekkimitone.

¹⁹ Deshi kelloochee tiijjii maaci addibaabee aafooch beddaahaa bi hiretaa maaco aabi-keyo waaninaa dambi-waaninooch balle hiroo tunehe.

²⁰ Aroochee maachi addibaabooch beeti, wottoo dambi-waan wotteti kello beetone; gimi boochoochi gidoonaa bi maacoonon qeellehe.

²¹ Kellechinaꞌochi kexinaꞌo ikke baddaa keeminaꞌo bare baddaanoo keeminaꞌone; daabbee duuheenaꞌonaa beshe boocheenaꞌona aabi-keyo waani boocheenaꞌona tookkii shaaheenaꞌone; gimi boochoochi gidoo aache hiroo bi maaco hiyaa uuche hiroone.

²² Mallee kelleenaꞌo, beshe boocheenaꞌonaa yeebbee michi misileenaꞌona aabi-keyo waani kelloona tookkii shaaheenaꞌone; arooch daammiibeeti shabaatte daqqeenaꞌo beetinaꞌone; maac beshe boocheenaꞌo beeto addibaabee ciinoochiye.

²³ Dambi-waani kellee ciinooch maaci boochooch bechiibeeti kello beetone; ebi kello aabi-keyo waan beeti kelloommi kelloone; ikke kelloochee bare kellooch beddaahaa bi qeelletaa balle hiroo tunehe.

²⁴ Uroo deshi-waan taan daammiye; ebiyoche deshi-waan wotteti kello beete; duuheenaꞌonaa beshe boocheenaꞌonon qeellehe; boonoshiyoo bareenaꞌona tateenaꞌone.

²⁵ Bareenaꞌochoommon gimi kelloonaa beshe boochoonoyich mallee kelleenaꞌo guudoona beetinaꞌone; beshe boocho bi gidoo aache hiroo bi maaco hiyaa uuche hiroone.

²⁶ Arooch daammiibeeti shabaatte daqqeenaꞌo beetinaꞌone; maac beshe boocheenaꞌo beeto addibaabee ciinoochiye; duukki toommooch okkinaa hachinon tuniitaa shicheeti yeebbee michi misileenaꞌo beetinaꞌone.

²⁷ Maaci addibaabooch deshi-waanaa kello beetone; ikke kelloochee bare kellooch beddaahaa beeton bi qeelletaa balle hiroo tunehe.

Maaci Addibaabooch Giijjiibeeti Kelleenaꞌo

²⁸ Deshi-waanaa maaci addibaabooch taan daammiye; deshi-waani kelloon bi qeelletaa bareenaꞌona tato tunehe.

²⁹ Kellechinaꞌochi kexo, duuhoonaa beshe boochoona bareenaꞌona tatoone; gimi kelloonaa beshe boochoonochi guudoona mallee kelleenaꞌo beetinaꞌone; bi gidoo aache hiroo bi maaco hiyaa uuche hiroone.

³⁰ Bi guudoochoo beshe boocheenaꞌo beetinaꞌone; boonoshi gidoo hiyaa uuche hiroo, boonoshi maaco uuche hiroone.

³¹ Beshe boocheenaꞌo maachi addibaabeenaꞌona tookkii ciineenaꞌone; duuhooch yeebbee michi misilo shicheetone; arooch daammiibeeti shimitte daqqeenaꞌo beetinaꞌone.

³² Aroochee maaci addibaabee aabi-keyo waani kellooch taan deebiye; biyoo uxeree kelloon bi qeelletaa bareenaꞌona tatehe.

³³ Ebiyoommon wotta kellechinaꞌochi kexinaꞌon, duuhoonaa beshe boochoonon bi qeelletaa bareenaꞌona tatehe. Gimi kelloonaa beshe boochoonooch guudoona mallee kelleenaꞌo beetinaꞌone; bi gidoo aache hiroo, bi maaco hiyaa uuche hiroone.

³⁴ Bi beshe boocho maachi addibaaboo waan wottetone; duuheenaꞌooch okkinaa hachinoochaa yeebbee michi misilo shicheetone; arooch daammiibeeti shimitte daqqeenaꞌo beetinaꞌone.

³⁵ Dambi-waani kellooch taan deebiye; aroonoo bi qeelletaa bareenaꞌona tatehe.

³⁶ Kellechinaꞌochi kexinaꞌon, duuheenaꞌonaa beshe boocheenaꞌonon bi qeelletaa bareenaꞌona tateheete; bi guudoonoo mallee kelleenaꞌo beetinaꞌone; bi gidoo aache hiroo, bi maacoo hiyaa uuche hiroone.

³⁷ Beshe boocho maachi addibaaboona ciinoone; duuhooch, okkinaa hachinooch yeebbee michi misileenaꞌo shuuneetinaꞌone; arooch daammiibeeti shimitte daqqeenaꞌo beetinaꞌone.

Dambi-waani Kellooch Beeti Kexinaꞌo

³⁸ Gimi kelleexi beshe boochee gaꞌooch, gishiishi kexinaꞌonaa boonoshi shaaqqeenaꞌona beetinaꞌone; ebi aroochaa micciibeeti deejjoo machee beetone.

³⁹ Aroochaa micciibeeti deejjoo, axaaxee deejjoonaa xuꞌee deejjoona guureebeeti gutte madelleenaꞌo kelleexi beshe boochooch beetinaꞌone.

⁴⁰ Dambi-waan beeti kellee gimooch, daqqee gaꞌooch ikke baddaa guttoo wotta bare baddaa guttoo tuneti madelleenaꞌo beetinaꞌone.

⁴¹ Ebina deejjee gijjeenaꞌo guureebeeti shimitte madelleenaꞌo, eboshiyoo awudde madelleenaꞌo kechi maac, wotta awuddeenaꞌo kechi maach beetinaꞌone.

⁴² Micciibeeti deejjoyich, xareeti xaqqoochee shuuneeti awudde madelleenaꞌo beetinaꞌone. Ebi madelleenaꞌo boonoshi gidoo ikke hiraa qato, boonoshi maaco ikke hiraa qato, boonoshi neexo ikke hiroone; eboshi toommooch micciibeeti deejjoonaa bare deejjoonoyich giddeebeeti gijjeenaꞌo guureebeeti qiico kotee beetone.

⁴³ Ebiyoommon ikke ciixi qato tuneti kaꞌeenaꞌo duukki guudoona shuuneetinaꞌone; madelleenaꞌoo deejjee meenon kotiyoyich gaaccii beeheete.

⁴⁴ Aroochee maaci addibaabooch taan daammiye; aroochoo gutte kexinaꞌo beetinaꞌone; areexi ikkoo bi beeto dambi-waani kellee gaꞌooch tuneechii bi kelloon deshi-waan wochiꞌiniye; wotta baroo bi beeto deshi-waani kellee gaꞌooch tuneechii bi kelloon dambi-waan wochiꞌiniye.

⁴⁵ Uroo taach: “Ebi deshi-waan wotteti kexo yaafee kexooch maddeebeeti qeesheenaꞌochone.

⁴⁶ Dambi-waan wotteti kexo wotta deejjee gudooch maddeebeeti qeesheenaꞌochone; eboshi Sadooqichi shiijjereenaꞌone; boonoshiyoo Doono Yeerich boonoshi maddemmoyich daaggeeti Leweenaꞌone” iye.

⁴⁷ Ebi uro addibaaboon awudde guudoona bi hiretaa bi gidoo balle hiroo, bi maaco balle hiroo tunehe; deejjee gudo bi beeto yaafee kechi ciinoochiye.

Yaafee Kexo

⁴⁸ Aroochee yaafee kechi gimi kellooch taan deebiye; gimi kellee duuhoon bi qeelletaa bi taggoo gutte baddicholla uuchi uuche hiroo tunehe; gimi kello aaraa awudde hiroone; gimi kelloochi duukki gidoo kelloochee duꞌooch beddaahaa gutte baddaanolla keejj keejje hiroone.

⁴⁹ Beshe boochee gidoo hiye hiroo, bi maacoo aaraa gutte hiroone; arooch daammiibeeti aashire daqqeenaꞌo beetinaꞌone; hachinaa okkinooch ikkikke giimbeenaꞌo qoomee gaꞌooch beetinaꞌone.