Hiziqeeli 4 - Kafa Linguistics Project

Yerusaalemi Ettoona Giicheyoon Hiziqeeli Shaahiyoona Bekkiyoo

¹ Doono Yeeri ishichiye: “Ashi bushoocho, ikke xuuboon daamiree ne aafooch kotiibe; bi toommoochoo Yerusaalemi katemee shichoon shichebe.

² Ebi xuuboon, katemoon giishoommon guudi giishe; mishigoon shuunebe; showoonoo gutibe; kaambeenaꞌon shuunebe; uxeroon happemmi qiicoonoo bi guudoona kotiibe.

³ Xuuree midaadoon daamiree neennaa katemoonochi daggooch xuuree uxeroon tuniiree neechibe; ne aafoon aroo waan wochibe; giicheetin tunemmine; newoo biin giichemmo neene; ebiyoo Israꞌeelee macceenaꞌoyich malletoon tunemmone.

⁴ “Aroochee ne yooche naaboona tokketeree Israꞌeelee macceenaꞌochi axaaxoon ne toommooch shaage; naaboona ne qeyemmi qemi haddoona boonoshi axaaxoon shaaggemmo neene.

⁵ Axaaxoon boonoshi shuuneti natinaꞌochi haddoona keejje ballaa yixene qemon neech qociito taane; ebina Israꞌeelee macceenaꞌochi axaaxoon shaaggemmo neene.

⁶ “Ebin ne ceechitoyee gubb wotta ne qanne naaboona tokketeree Yihudee macceenaꞌochi axaaxoon shaaggemmo neene; ikke natoyich ikke qemon tuniyoona aabbe qemon neech qociito taane.

⁷ Ne mochoon hullaachoo tunii, ne aafoon ebi Yerusaalemi giichee malletoo waan wochiichi keemoon keemmemmo neene.

⁸ Giichi aabo ceennimmi wottoon ikke naaboochee bare naabooch ne wotteyaachemmoyich woderoona neen cuchemmo taane.

⁹ “Newoo teepphoonaa sheqoonon, aatoonaa michiyoonon, yangoonaa gomberoonon daambe; ikke qiicooch gedi koshon kachiibe; ikke naaboona ne qeyemmi keejje ballaa yixene qemon ebin maayemmo neene.

¹⁰ Ne maayemmi maayo qemi qemooch hiye sheqeelo tunebe. Heeyooch ikke wottoon maacheti saatooch ebin maayemmo neene.

¹¹ Ne uchemmi aaco qeelleebe; gutte kobbaayon heeyooch ikke wottoon, maacheti saatooch uchemmo neene.

¹² Boonoshi aafoochaa shuuqqiti ashi qashoon daami shoohi ne maayoon kachiyemmo neene; sheqee koshochoommonoo maayemmo neene” iye.

¹³ Doono Yeeri ishichiye: “Israꞌeelee asheenaꞌo boonoshin ta yookkemmi aageteenaꞌo daggoochaa ebiyoommon eeꞌe koshon maayemminaꞌone” iye.

¹⁴ Aroochee tawoo ishichiyo: “Nuggishoo Doono Yeero, ebi tunaaye; ciroona eeꞌaa ariyaano taane; ta bushittinoochee tiijjaꞌa ebiich beddaahaa bi aalla qititon woyee cooxo yechiton ciroona maataano taane; eeꞌe maayo ta noonooch shaggii ariyaanoone” iyo.

¹⁵ Biyoo taach ishichiye: “Gaawiye; ishigaata ashi qashee keroon shuuqqiti iboona ne maayoon ne kachiyemmoyich daaggito taane” iye.

¹⁶ Daakkiꞌinoo taach ishichiye: “Ashi bushoocho, Yerusaalemichi maayi woretoon kuxxemmo taane; asheenaꞌoo koshon machoona qocaa shatona maayemminaꞌone; aaconoo qeelletaa xuuxoona uchemminaꞌone.

¹⁷ Koshonaa aacona boonoshich guutemmo bi tunetoyich boonoshinaa boonoshina keqqoona ciineyemminaꞌone; boonoshi axaaxee naboona maajjemminaꞌone” iye.