Hiziqeeli 38 - Kafa Linguistics Project

Googi Yeerichi Ginee Qiico Tuno

¹ Doono Yeeri taach ishichiye:

² “Ashi bushoocho, ne aafoon Magoogi showooch beeti Mesheekinaa Tubaalinochi iraashoo Goog waan wochiichi bi toommooch keemoon keembe;

³ biich ishichibe: ‘Nuggishoo Doono Yeeri ishichiye: Mesheekinaa Tubaalinochi iraashoo Googo, ne toommooch tiyeto taane.

⁴ Ne gammooch qamaaxiroon gediree neen, ne ginee naayinaꞌon, ne haresheenaꞌonaa ne hareshechinaꞌonon, koyooba taheebeeti tahoon tahetinaꞌo bullin, ooge gaachoonaa giishi gaachoonon yechiton, goraadoonoo yechito bullin gubb wochemmo taane.

⁵ Faariisi, Topphiyoonaa Fuuxinochi asheenaꞌona, gaachoon kalletinaꞌonaa xuuree ukoon uketinaꞌo bulli boonoshina tookki tunemminaꞌone;

⁶ Gomeerinaa bi ginee naayinaꞌo bullina, dambi-waan wohooch beeti Beet Togariminaa bi ginee naayinaꞌo bullina, wottoo meeti asheenaꞌo neenna tookkii beetinaꞌone.

⁷ “ ‘Neennaa ne guudoona kiceetinaꞌona qannibote; newoo boonoshi ukkiroon tunebe.

⁸ Meeti yemeenoyee gubb ceekkemmo neene; gubbi natinaꞌooch koyoona tiisheechii batt qaalliibeeti Israꞌeelee showoon kochemmo neene. Ebi showoo, bi asheenaꞌo meeti aageteenaꞌo daggoochee kicaa waa, meeti yemeenoon shokko echeti Israꞌeelee guudinaꞌooch koteti showoone; boonoshiyoo aageteenaꞌo daggoochee waaꞌi, and bulliyona diggoona arooch kotetinaꞌone.

⁹ Newoo yubee yongoochoommon waaree kochemmo neene; neennaa ne ginee naayinaꞌo bullina, neenna tookkii beeti meeti asheenaꞌoo showoon quboochoommon guuppemmo ittoshine.

¹⁰ “ ‘Nuggishoo Doono Yeeri Googich ishichii beetone: Ebiyooba mooyon gabooch giyemmo neene; gonde yamoonoo yamemmo neene;

¹¹ newoo ishichemmo neene: “Gayaalli gafeenaꞌooch damba kechemmo taane; uxeraalli, kelloonaa tuggoona aalli katemeenaꞌooch keqqaalloon diggoona beetinaꞌochi toommooch dihemmo taane.

¹² Keccemmo taane; boggemmo taane; aageteenaꞌo daggoochee waati, and asho koteti shokkaache showeexinaꞌochi toommooch, gijjeenaꞌonaa qiiceenaꞌona boonoshich beeti, showee gutte daggooch koteti asheenaꞌochi toommooch ta kishoon yaggemmo taane” gettemmo neene.

¹³ Sheebinaa Dedaanina, Tarisheshee giixechinaꞌonaa bi gafeenaꞌo bullina neech ishichemminaꞌone: “Kecoon daamma waanne? Bogoon ne boggemmoyich, birewoonaa aachoonon daamoyich, gaare gijjoonaa qiicoonon wodde kecoon daamoyich, meeti ne asheenaꞌon kicinne?” gettemminaꞌone, itone’ gete.

¹⁴ “Ebich ashi bushoocho, Googi toommooch ishichi keemoon keembe; Nuggishoo Doono Yeeri ishichiye: ‘Ta asheenaꞌo tuneti Israꞌeeleenaꞌo diggoona boonoshi beehooba, ne tiyemmo neene.

¹⁵ Dambi-waan wokkiꞌi beeti xaaꞌoochee, neenna tookkii beeti, boonoshi bulliyona hareshoon yebbeti, beelloo tuneti, meeti asheenaꞌona tookki woyemmo neene.

¹⁶ Showoon guuppiibeeti quboochoommon ta asheenaꞌo tuneti Israꞌeeleenaꞌochi toommooch woyemmo neene; Googo, gubbi yemeenooch ta showoon ne kochemmoyich neen deebemmo taane; ebiyoo neenna ta yaafittinoon boonoshi aafoochaa ta bekkiihooba, aageteenaꞌo taan ariyemmoyichiye.

¹⁷ “ ‘Nuggishoo Doono Yeeri ishichiye: Boonoshin kocha neen deebemmo ta tunoon wonnee yemeenooch ta guuninaꞌo tuneti Israꞌeelee keemechinaꞌo wodde naton keemmiti asho ne toono neene?’ itone gete” iye.

Googi Toommooch Yeeri Deebemmi Naxo

¹⁸ Nuggishoo Doono Yeeri ishichiye: “Googi Israꞌeelee showoon bi koyiyooba, ta kaaro cufemmone;

¹⁹ ebiyooba Israꞌeelee showooch, oogeti showee qewo tunemmo bi tunoon ta qanaatoona, ta neboonoo getteto taane.

²⁰ Bahareexi haasheenaꞌo, shimaajji kafeenaꞌo, kubbi cooxinaꞌo, yuummere halleenaꞌo, showee toommooch beeti asheenaꞌo bulli ta aafoochaa qewemminaꞌone; guudinaꞌo guufemminaꞌone; qaaꞌeenaꞌo shekiremminaꞌone; xaqqee uxereenaꞌo dihemminaꞌone.

²¹ Ta guudinaꞌo bulliichee Googi toommooch goraadoo kaacheyemmoyich tuniyemmo taane, iye Nuggishoo Doono Yeeri. Asho bullichi goraado bi nuuchoon maayemmone.

²² Biiyoona, bi damoon ukkoonoo bi toommooch nallemmo taane; yattoon, xaqqoommi baderoon, qaaqqoonaa waageroonon, biinnaa bi ginee naayinaꞌonochi, wottoo biinna tookkii beeti meeti asheenaꞌochi toommooch kindiyemmo taane.

²³ Ebina ta oogoonaa ta yaafittinoonon bekkiyemmo taane; meeti aageteenaꞌoyichoo taan arichiyemmo taane; aroochee ta, Doono Yeeri ta tunoon ariyemminaꞌone.