Hiziqeeli 37 - Kafa Linguistics Project

Shuuꞌi Shaawusheenaꞌo Kiceeti Bamboo

¹ Doono Yeerichi giidoo ta toommooch waahe; bi Ayaano daammiꞌi shaawushoona ceennit bambee daggooch taan kotiihe.

² Boonoshi daggoona taan yaabii guudiihe; ebi shaawusheenaꞌo bambooch oogeti woddeenaꞌone; eboshiyoo oogichii shuuqqitinaꞌone.

³ Biyoo taach: “Ashi bushoocho, ebi shaawusheenaꞌo kashoona beemon hakkeheete?” iye. Tawoo, “Nuggishoo Doono Yeero, ne ariihine” iyo.

⁴ Aroochee taach ishichiye: “Ebi shaawusheenaꞌoyich keemoon ishichi keembe: ‘Hini shuuqqiti shaawusheenaꞌote, Doono Yeerichi qaaroon waayebote.

⁵ Nuggishoo Doono Yeeri ebi shaawusheenaꞌoyich ishichii beetone: Ittoshi kashooch kashee hiinnoon ta giijjaa, wochinnoon kashoona beeyemmo ittoshine.

⁶ Maqqoonaa meenonon ittoshich imiree achee gooqqoona qeremmo taane; ittoshi kashooch kashee hiinnoon giijjemmo taane; kashoonoo beeyemmo ittoshine; ta, Doono Yeeri ta tunoon ariyemmo ittoshine’ gete” iye.

⁷ Ebich taach getteetoommon keemmeho; ta gettemmona kakakkee qaaro waayeehe; shaawusho ikkotteꞌi biinnaa biinna yeshehe.

⁸ Ciinnaa ta iyaa, maqqoonaa meenona boonoshi toommooch beete; eboshiyoo achee gooqqoona boonoshi qereyemmoyich tunehe; tunebaani kashee hiinno boonoshich aalloone.

⁹ Aroochee Yeeri taach ishichiye: “Ashi bushoocho, keemoon keembe; yongoyich keemoon keembe: ‘Nuggishoo Doono Yeeri ishichiye: Yongoocho, awudde kaattoochee wobe; ebi dubeneenaꞌo kashoona beeyemmoyich, eboshi toommooch yongebe’ gete” iye.

¹⁰ Taach bi gettitoommon keemoon keemmeho; kashee hiinno boonoshi maac giyiye; kashechon tuneheete; meeti ginee naayinaꞌon tuneꞌi boonoshi baatoona neexeheete.

¹¹ Biyoo taach ishichiye: “Ashi bushoocho, ebi shaawusheenaꞌo Israꞌeelee macceenaꞌo bulline; boonoshiyoo ‘Ebiyoche, no shaawusho shuuqqitone; gibenoon kuxxeto noone; ciroona aalleto noone’ itinaꞌone.

¹² Ebich ishichi keemoon boonoshich keembe: Nuggishoo Doono Yeeri ishichiye: ‘Ta asheenaꞌote, ittoshi oppoon qechemmo taane; oppoochee ittoshin kichemmo taane; Israꞌeelee showooch ittoshin giijjemmo taane.

¹³ Ta asheenaꞌote, ittoshi oppoon ta qechiyooba, oppoochee ittoshin ta kichiyooba, ta, Doono Yeeri ta tunoon ariyemmo ittoshine.

¹⁴ Ta Ayaanoon ittoshi kashooch kotiyemmo taane; ittoshiyoo kashoona beeyemmo ittoshine; ittoshi hajjee showooch ittoshi beeyemmoyich tuniyemmo taane; ebin getteto, ebinoo tuniito ta tunoon ariyemmo ittoshine; Doono Yeeri ta, ebin getteto taane’ itone gete” iye.

Israꞌeelinaa Yihudina Ikkotto

¹⁵ Doono Yeeri taach ishichiye:

¹⁶ “Ashi bushoocho, ikke gumboon daamiree bi toommooch ‘Yihudinaa biinna tookkii guuphiti Israꞌeelee maccoona’ geti kooribe; bare gumboon daamiree bi toommooch ‘Yooseefichi ebi geto, Efreeminaa biinna tookkii guuphiti Israꞌeelee maccoo bullina’ geti kooribe.

¹⁷ Ne kishoochaa boonoshi ikkottemmoyich ikke gumboon tuniiree ikkooch xaaqqibe.

¹⁸ Ne asheenaꞌo ‘Ebi ne tuniibeeto amo gaata nooch getaachemmo neene?’ iꞌi boonoshi echehooba,

¹⁹ ne, Nuggishoo Doono Yeeri ishichiye: ‘Efreemi kishooch beeti Yooseefichi gumboon, biinna tookkii guuphiti Israꞌeelichi gumboon daamiree Yihudichi gumboona tookki xaaqqemmo taane; boonoshiyoo ta kishoochaa ikke gumboon tunemminaꞌone’ itone gete.

²⁰ “Boonoshi toommooch ne kooriti gumbeenaꞌo boonoshi aafoochaa ne kishooch beebeete;

²¹ boonoshichoo ishichibe: ‘Nuggishoo Doono Yeeri ishichiye: Israꞌeelee asheenaꞌon boonoshi hammiti aageteenaꞌo daggoochee deebemmo taane; bulli kaattoochee boonoshin kicemmo taane; boonoshi hajjee showooch boonoshin deebemmo taane.

²² Showee toommooch, Israꞌeelee guudoochaa boonoshin ikke ashoon tuniyemmo taane; ikke taatoo boonoshi bulli toommooch taatemmone; ebiyee bekk gutte aagetoon tuneyaachemminaꞌone; gutte taatee showoon tune qoodeyaachemminaꞌone.

²³ Ebiyee bekk boonoshi nuggisheenaꞌona, ciigiiti boonoshi mooyona, boonoshi xuꞌoonoo boonoshi qelloon eeꞌiyaachemminaꞌone. Taan qayona boonoshi shuuneti axaaxoochee boonoshin wodiyemmo taane; boonoshin xalliyemmo taane; ta asheenaꞌon tunemminaꞌone; tawoo boonoshi Nuggishoon tunemmo taane.

²⁴ “ ‘Ta guuno Daawiti boonoshi toommooch taatemmone; bullichona ikke qiddoo tunemmone; ta geteenaꞌon dabbemminaꞌone; ta qociyeenaꞌonoo gaawichi quyemminaꞌone.

²⁵ Boonoshi qaabbechinaꞌo beebee echeti, ta guuno Yaaqobich ta immeti showooch kotemminaꞌone; boonoshi, boonoshi bushiisheenaꞌonaa bushaa bushiisheenaꞌona bulli aaboon arooch beeyemminaꞌone; ta guuno Daawiti bulli aaboon boonoshi toommooch taatemmone.

²⁶ Diggee wogoon boonoshina tookki giyemmo taane; ebi wogo bulli aabee wogoon boonoshich tunemmone; boonoshin manjiyemmo taane; meechemmo taane; ta yaafee kexo bulli aaboon boonoshi daggooch bi beeyemmoyich tuniyemmo taane.

²⁷ Ta beeyi xaaꞌoo boonoshina tookki tunemmone; ta boonoshi Nuggishoon tunemmo taane; boonoshiyoo taach ta asheenaꞌon tunemminaꞌone.

²⁸ Ta yaafee kexo boonoshi daggooch bulli aaboon bi tunehooba, ta, Israꞌeeleenaꞌon yaafiibeeti Doono Yeeri ta tunoon aageteenaꞌo ariyemminaꞌone, itone’ gete” iye.