Hiziqeeli 36 - Kafa Linguistics Project

Israꞌeelin Yeeri Diiroo

¹ Doono Yeeri ishichiye: “Ashi bushoocho, Israꞌeelee guudinaꞌoyich ishichi keemoon keembe: ‘Israꞌeelee guudinaꞌote, Doono Yeerichi qaaroon waayebote:

² Nuggishoo Doono Yeeri ishichiye: Etteenaꞌo ittoshi toommooch “Usha, wonnee guudinaꞌo nooch iristo tunetinaꞌone” itinaꞌone.’

³ Ebich keemoon keembe; ishichishoo gete: ‘Nuggishoo Doono Yeeri ishichiye: Kaatti kaattoona giichiꞌi koyona ittoshin boonoshi buriccitonaa shokkoon echiitonoyich, aageteenaꞌoyich iristoonoo ittoshin boono tuniitoyich, yibbaatechinaꞌo noonoona ittoshi tocheetonaa aageteenaꞌona ittoshi sheexxetonoyich,

⁴ Israꞌeelee guudinaꞌote, Nuggishoo Doono Yeerichi qaaroon waayebote: Nuggishoo Doono Yeeri guudinaꞌonaa geppeenaꞌonoyich, woce aacinaꞌonaa bambeenaꞌonoyich, amolla aalli shokkaache xaaꞌeenaꞌoyich, ittoshi guudoona beeti eche aageteenaꞌo boggii cooneti, shokkaachoo tuneti katemeenaꞌoyichoo ishichii beetone.

⁵ Ebich Nuggishoo Doono Yeeri ishichiye: Hoxoona tiyiꞌi oogeton emiriibee ta showoon bogona boonoshi hajjoon boono tuniitoyich, eche aageteenaꞌo bullinaa Edoomee asheenaꞌo bullinochi toommooch oogeti ta qanaatee qaaqqoon kindiyoona yibbaatemmo taane.’

⁶ Ebich Israꞌeelee showoon ciinnii beetona keemoon keembe; guudinaꞌonaa geppeenaꞌonoyich, woce aacinaꞌonaa bambeenaꞌonoyichoo ishichibe: ‘Nuggishoo Doono Yeeri ishichiye: Aageteenaꞌochi naagoona ittoshi xuuxetoyich ta qanaatee kaaroona yibbaatemmo taane.

⁷ Ebich Nuggishoo Doono Yeeri ta ishichiyoye: Ittoshi guudoona beeti aageteenaꞌo boonoshi qelloona naagee naboona xuuxemminaꞌo boonoshi tunoon wogehoye.

⁸ “ ‘Tunebaani Israꞌeelee guudinaꞌote, atoon atemmo ittoshine; katinoon woyemminaꞌo boonoshi tunetoyich, ta asheenaꞌo tuneti Israꞌeeleenaꞌoyich aafoon aafemmo ittoshine.

⁹ Ittoshi waan katinnemmo taane; ittoshin gaawe aafoona ciinnemmo taane; ittoshi toommooch goyoo goyaa maayo shookkeyemmone.

¹⁰ Tawoo ashoon, Israꞌeelee maccoo bullinoo meeto ta tuniitaa ittoshi toommooch kotemminaꞌone; tiisheti katemeenaꞌo wochi shuuneyemminaꞌone; katemeenaꞌoo ashi beeyi xaaꞌoo tunemminaꞌone.

¹¹ Ashoonaa gijjoonon ittoshi toommooch woddiyemmo taane; boonoshiyoo woddemminaꞌone; aafemminaꞌone; wonnee ittoshi gooroommon arooch ittoshi beeyemmoyich tuniyemmo taane; aafichoyee beshoon gaawe mooyon ittoshich tuniyemmo taane; Doono Yeeri ta tunoon ariyemmo ittoshine.

¹² Ta asheenaꞌo tuneti Israꞌeeleenaꞌo ittoshi toommona shaꞌemmoyich tuniyemmo taane; boonoshiyoo ittoshin hajjemminaꞌone; boonoshich iristo tunemmo ittoshine; ebiyee bekk boonoshin bushaallo tuniyaachemmo ittoshine.

¹³ “ ‘Nuggishoo Doono Yeeri ta ishichiyoye: Asheenaꞌo “Hini showee ashimaayene; bi asheenaꞌon bushaallo tuniitine” itinaꞌone.

¹⁴ Tunebaani ebiyee bekk ashoon maabeeti tuneyaachemmi neene; ne asheenaꞌonoo bushaalleenaꞌo tuniyaachemmi neene. Nuggishoo Doono Yeeri ta ebin getteto taane.

¹⁵ Ebiyee bekk aageteenaꞌochi diigee qaaroon neech waayiyaachemmo taane; aageteenaꞌochi naagoon shaagaachemmi neene. Ebiyee bekk ne asheenaꞌo tepheyemmoyich tuniyaachemmi neene; Nuggishoo Doono Yeeri ta, ebin getteto taane’ gete” iye.

Israꞌeeleenaꞌochi Andire Kasho

¹⁶ Doono Yeeri taach ishichiye:

¹⁷ “Ashi bushoocho, Israꞌeelee asheenaꞌo boonoshi hajjee showooch boonoshi beehooba, boonoshi beemona, boonoshi shuunoonoo showoon eeꞌiiheete; boonoshi shaaddo ta aafooch qechoona beeti maachechi eeꞌoommon shaahiye.

¹⁸ Showee toommooch damoon boonoshi ukkitonaa shahalloona showoon boonoshi eeꞌiitonoyich ta neboon boonoshi toommooch kindiihoye.

¹⁹ Aageteenaꞌooch boonoshin shaccehoye; showeenaꞌoochoo baqeeheete; boonoshi beemoommona, boonoshi shuunoommonoo boonoshi toommooch nalliyoye.

²⁰ Boonoshi hammimmi aageteenaꞌo bulliichaa asheenaꞌo, ‘Eboshi Doono Yeerichi asheenaꞌone; tunebaani bi showoochee kechitinaꞌone’ getona yaafe ta shigoon naakkiiheete.

²¹ Tunebaani ta, Israꞌeelee asheenaꞌo boonoshi hammimmi aageteenaꞌo daggoochaa boonoshi naakkiiti yaafe ta shigoyich qaakkehoye.

²² “Ebich Nuggishoo Doono Yeeri ta gettaa beeton Israꞌeelee yareenaꞌoyich gete: Israꞌeelee yareenaꞌote, ta shuunaabeeto ittoshi hammiti aageteenaꞌo daggoochaa bi naakkemmoyich ittoshi tuniiti yaafe ta shigoyicha iyaꞌanalli ittoshicha iyaꞌa toonoone.

²³ Aageteenaꞌo daggoochaa naakkeeti, boonoshi daggoochaa ittoshi naakkiiti, yaafe ooge ta shigee yaafittinoon bekkiyemmo taane; boonoshi aafoochaa ta yaafittinoon ittoshina ta bekkiihooba aageteenaꞌo Doono Yeeri ta tunoon ariyemminaꞌone; Nuggishoo Doono Yeeri ta, ebin getteto taane.

²⁴ “Aageteenaꞌo daggoochee ittoshin kichemmo taane; showoo bulliichee ittoshin kicemmo taane; ittoshi hajjee showoochoo ittoshin deebemmo taane.

²⁵ Xalle aacon ittoshi toommooch wucemmo taane; ittoshiyoo xallemmo ittoshine; ittoshi eeꞌo bulliichee, ittoshi shahalloocheenoo ittoshin xalliyemmo taane.

²⁶ Andire mulloon ittoshich immemmo taane; andire ayaanoonoo ittoshi kashooch kotiyemmo taane; xaqqee mulloon ittoshi meechi daggoochee kichemmo taane; meechi mulloon ittoshich immemmo taane.

²⁷ Ta Ayaanoon ittoshi kashooch kotiyoona ta qociyoona ittoshi shaaddemmoyich, ta getoonoo manjii ittoshi quyemmoyich, tuniyemmo taane.

²⁸ Ittoshi qaabbechinaꞌoyich ta immeti showooch beeyemmo ittoshine; ta ashoon tunemmo ittoshine; tawoo ittoshi Nuggishoo tunemmo taane.

²⁹ Ittoshi eeꞌo bulliichee ittoshin wodiyemmo taane; maayo ittoshich bi woddemmoyich geto beshiyemmo taane; ebiyee bekk shaacoon ittoshi toommooch deebaachemmo taane.

³⁰ Aageteenaꞌo daggoochaa shaacoona ittoshi cooneyaachemmoyich, ittoshi mixo aafemmonaa ittoshi maayo gaawichi shaggemmonoyich tuniyemmo taane.

³¹ Gonde ittoshi gommonaa gaaweyaani ittoshi shuunoonon gabemmo ittoshine; ittoshi xuꞌoonaa ittoshi eeꞌoonoyich ittoshin wochi ciigemmo ittoshine.

³² Ebin ta tuniyemmo ittoshicha getiree tunee bi qayo ittoshich arichebe. Israꞌeelee asheenaꞌote, ittoshi gommoyich yeelle cooneebote; ebin getteto Nuggishoo Doono Yeeri taane.

³³ “Nuggishoo Doono Yeeri ishichiye: Ittoshi axaaxoo bulliichee ittoshin ta xalliimmi aabooba, katemeenaꞌooch asheenaꞌon kotiyemmo taane; shokkoon echeti katemeenaꞌo wochinnoon shuuneyemminaꞌone.

³⁴ Shokkaache showoo, gomma besho bulli aafoochaa shokkaachoo tuneti showoo gocheyemmone.

³⁵ Asheenaꞌoo ‘Shokkoon echeti showoo Eden bechee xaaꞌoommon tunetone; happeeti, shokkoon echeti, aalleti katemeenaꞌo mishigechi beeyi xaaꞌoon tunetinaꞌone’ gettemminaꞌone.

³⁶ Ittoshi guudooch echeꞌi beeti aageteenaꞌo Doono Yeeri ta, happeeti xaaꞌeenaꞌon ta shuunoon, shokkaache showeenaꞌooch becheenaꞌon wochaa ta bechoon ariyemminaꞌone; Doono Yeeri ta, ebin getteto taane; ebinoo tuniyemmo taane.

³⁷ “Nuggishoo Doono Yeeri ishichiye: Israꞌeelee macceenaꞌo ashoon gaddeexi bagoochoommon ta woddiyemmoyich qollemminaꞌone; tawoo ebin tuniyemmo taane.

³⁸ Maacheti baaree aabooba deejjee bageenaꞌo Yerusaalem ceenoommon, happeeti katemeenaꞌooch asheenaꞌo ceennemminaꞌone; ebina Doono Yeeri ta tunoon ariyemminaꞌone” iye.