Hiziqeeli 35 - Kafa Linguistics Project

Edoomi Toommooch Keemmeti Keemo

¹ Doono Yeeri taach ishichiye:

² “Ashi bushoocho, ne aafoon Seyiri guudo waan wochibe; bi toommoochoo keemoon keembe.

³ Nuggishoo Doono Yeeri ta gettaa beeton ishichi gete: ‘Seyiri guudoocho, ne toommooch tiyeto taane; ta mochoon ne toommooch tiijjemmo taane; shokkaachoonaa amaalloonon neen tuniyemmo taane.

⁴ Ne katemeenaꞌon happemmo taane; newoo shokkoon echemmo neene; ta, Doono Yeeri ta tunoon ariyemmo neene.

⁵ “ ‘Ebiyoo wonnee tiijjiꞌi etto ittoshi tunetoyich, Israꞌeelee macceenaꞌon boonoshi xuuxee aabooba, ciireexi boonoshi sheeree aabooboo goraadoyich beshiiꞌi ittoshi immitoyichiye.

⁶ Ta, Nuggishoo Doono Yeeri beeyecho ta tunoona wogehoye: Ittoshi damoo ufemmoyich ittoshin beshiiree immemmo taane; damee ukkecho ittoshin yookkemmone; damee ukkoon shixo ittoshi qajjitoyich damee ukkecho ittoshin yookkemmone.

⁷ Seyiri guudon amolla aalli shokkaachoon echiyemmo taane; aroona waa beetonaa hammii beetonon bulla aalliyemmo taane.

⁸ Ne guudinaꞌon guureetinaꞌona ceechemmo taane; ne geppeenaꞌochi, ne bambeenaꞌochi, ne aacinaꞌochi toommo bulliich goraadoona wuxeeti asheenaꞌo dihemminaꞌone.

⁹ Bulli aabooch shokkoon neen echiyemmo taane; ne katemeenaꞌo asho beetaachemminaꞌon tunemminaꞌone; aroochee ta, Doono Yeeri ta tunoon ariyemmo ittoshine.

¹⁰ “ ‘Ebiyoo Doono Yeeri ta arooch ta beetaa, “Ebi gutte showeenaꞌo, Israꞌeelinaa Yihudinon, wotta ebi gutte showee asheenaꞌonoo taacho tunemminaꞌone” ne itoyichiye.

¹¹ Ebich Nuggishoo Doono Yeeri ta, beeyecho ta tunetoyich, ne kaaroommona, boonoshin shixxaꞌa ne qanaatetoommona ne toommooch tuniyemmo taane; ne toommooch ta nalliyooba, boonoshi daggooch arichemmo taane.

¹² Ne “Tiishee aalletinaꞌone; maayo tuniitaa nooch ichetinaꞌone” iyaꞌa Israꞌeelee guudinaꞌochi toommooch ne naageto bullin Doono Yeeri ta waayeto ta tunoon ariyemmo neene.

¹³ Ittoshi noonoona ta toommooch ittoshi coodon, ta toommooch woddii ittoshi yibbaatoon waayeto taane.

¹⁴ Ebich Nuggishoo Doono Yeeri ta ishichiyoye: Showoo bulli emiri beetaa neen shokko echiyemmo taane.

¹⁵ Israꞌeelee macceenaꞌochi iristo shokko echetaa ne emiritoyich tawoo ebiyoommon ne toommooch tuniyemmo taane. Seyiri guudoocho, neennaa Edoomina bulla shokkoon echemmo ittoshine; ebina boonoshiyoo Doono Yeeri ta tunoon ariyemminaꞌone’ itone gete” iye.