Hiziqeeli 34 - Kafa Linguistics Project

Israꞌeelee Qiddeenaꞌo Mooyo

¹ Doono Yeeri taach ishichiye:

² “Ashi bushoocho, keemoon keembe; Israꞌeelee qiddeenaꞌochi toommooch keemoon keembe; boonoshichoo ishichibe: ‘Nuggishoo Doono Yeeri ishichiye: Bageenaꞌon shiimee yeshon qajjiichii boonoshi qelloon shiimeebeeti qiddeenaꞌoyich woowo! Qiddeenaꞌo bagoon shiim bedaacheete?

³ Awuyon maahote; huushoochee shuuneeti tahoon tahehote; awujjitonoo guuriyote; tunebaani bageenaꞌon shiimeyaachote.

⁴ Nireton kupphiyaano ittoshine; biiyeton attee wodiyaano ittoshine; tiisheton sheppheyaano ittoshine; yallyallimiton wochaano ittoshine; aalleton qaawaano ittoshine; giidoona, mullee manjoonoo neexxii hajjiyote.

⁵ Qiddoo boonoshich bi aalletoyich shaceheete; boonoshi shacoona showee toommeexi cooxinaꞌo bullich maayoon tuneheete.

⁶ Ta bageenaꞌo guudo bullinaa geppoonooch yallyallimitinaꞌone; showoo bulliichoo shacetinaꞌone; boonoshin qaawiibeeto aalloone.

⁷ “ ‘Ebich qiddeenaꞌote, Doono Yeeri ta qaaroon waayebote:

⁸ Nuggishoo Doono Yeeri ta ishichaabeeto taane; beeyecho ta tunoona wogehoye; ta bageenaꞌoyich qiddoo aalletoyich, ta qiddeenaꞌo ta bageenaꞌon qaawoo boonoshi qajjitoyich, qiddeenaꞌo ta bageenaꞌon shiimee yesho qajjiichii boonoshi qelloon boonoshi shiimetoyich, kubbi cooxona kayeetinaꞌone; boonoshichoo maayo tunetinaꞌone.

⁹ Ebich qiddeenaꞌote, Doono Yeeri ta qaaroon waayebote.

¹⁰ Nuggishoo Doono Yeeri ta ishichiyoye: Ebiyoche ta qiddeenaꞌo toommooch tiyeto taane. Ta bageenaꞌon boonoshi kishoochee qaawemmo taane; wochinnoon boonoshi shiimemmoyich tuniyaachemmo taane; qiddeenaꞌo boonoshi qelloon wochi boonoshi shiimeyaachemmoyich tuniyemmo taane; boonoshich maayoon boonoshi tuneyaachemmoyich, ta bageenaꞌon boonoshi kookkoochee wodiyemmo taane.

Gaawe Qiddoo

¹¹ “ ‘Ebich Nuggishoo Doono Yeeri ta ishichiyoye: Ta, ta qelloona ta bageenaꞌon qaawemmo taane; quyemmo taane.

¹² Qiddoo bi bageenaꞌo daggoochee aalletinaꞌon bi qaawoommon ta bageenaꞌon qaawemmo taane; quboobinaa dunne manderoobina boonoshi aalleti xaaꞌoochee boonoshin wodiyemmo taane.

¹³ Aageteenaꞌo daggoochee boonoshin kichemmo taane; boonoshi hajjee showooch boonoshin deebemmo taane; Israꞌeelee guudinaꞌochi toommoochaa, aacinaꞌochi gashoochaa, asheenaꞌo gafiti showee toommo bulliichaa boonoshin quye maanjemmo taane.

¹⁴ Gaawe mocechi gaddooch boonoshin quyemmo taane; boonoshi mocee gaddo Israꞌeeleenaꞌochi guudinaꞌo toommooch tunemmone; ebi gaawe mocechi Israꞌeelee guudinaꞌoochaa maayemminaꞌone; are gaawe gaddooch miqqemminaꞌone.

¹⁵ Ta, ta qelloona ta bageenaꞌon qiddemmo taane; boonoshi miqqe kashemmoyichoo tuniyemmo taane; Nuggishoo Doono Yeeri ta, ebin getteto taane.

¹⁶ Aalletinaꞌon qaawemmo taane; yallyallimitinaꞌon wochemmo taane; tiishetinaꞌon guuccemmo taane; hakka guuteenaꞌon kupphiyemmo taane; awujjitinaꞌonaa giidetinaꞌonon aalliyemmo taane; dayinnetoona bageenaꞌon qiddemmo taane.

¹⁷ “ ‘Nuggishoo Doono Yeeri ta ishichiyoye: Ta bageenaꞌote, bagoonaa bagoonochi daggooch, bagee baaddeenaꞌonaa emmisheenaꞌonochi daggooch nallemmo taane.

¹⁸ Eche ittoshi gaddoon baatoona ittoshi neexxito gaawe gaddoochee mamo ittoshich giishetenane? Eche aacon baatoona ittoshi qudiito gaawe aacon uyo ittoshich giishetenane?

¹⁹ Ta bageenaꞌo baatoona ittoshi neexxiton maaheete; baatoona ittoshi qudiiton uchiyeete.

²⁰ “ ‘Ebich Nuggishoo Doono Yeeri ta boonoshich ishichiyoye: Ta, awujjiti bageenaꞌonaa dalliti bageenaꞌonochi daggooch nallemmo taane.

²¹ Hakka guute bageenaꞌon ittoshi naaboona wottoo ittoshi gogoona ittoshi xuqqii beetoyich, hakka guuteenaꞌon ittoshi qareenaꞌona ittoshi kochii beetoyich, boonoshinoo ittoshi shaccii beetoyich,

²² ta bageenaꞌon wodiyemmo taane; ebiyee bekk bokkeyaachemminaꞌone; bageenaꞌonaa bageenaꞌonochi daggooch nallemmo taane.

²³ Boonoshi toommooch ikke qiddoon tiijjemmo taane; biyoo boonoshin quyemmone; ebi aroo ta guuno Daawitine; biyoo boonoshich qiddoo tuneree boonoshin quye maanjemmone.

²⁴ Doono Yeeri ta, boonoshi Nuggishoo tunemmo taane; ta guuno Daawitiyoo boonoshi daggooch iraashoon tunemmone; Doono Yeeri ta, ebin getteto taane.

²⁵ “ ‘Diggee wogoon boonoshina tookki giyemmo taane; gonde cooxinaꞌon showoochee aalliyemmo taane; ebina boonoshi diggoona barahooch kotemminaꞌone; kuboochoo tokketemminaꞌone.

²⁶ Boonoshinaa ta geppee guudooch beeti xaaꞌeenaꞌonon diiremmo taane; amiyon bi goori gooroona dichemmo taane; ebiyoo diiree amiyon boonoshich tunemmone.

²⁷ Gaddeexi mixinaꞌo aafemminaꞌone; showoo maayi colloon uummiyemmone; boonoshi showooch keqqaalloon diggoona beeyemminaꞌone; boonoshi waanjee kayoon ta tiishiyooba, boonoshin hajjii beetinaꞌo kishoochee boonoshin ta kichiyooba Doono Yeeri ta tunoon ariyemminaꞌone.

²⁸ Ebiyee bekk aageteenaꞌona bokkeyaachemminaꞌone; kubbi cooxinaꞌonoo manjeyaachemminaꞌone; keqqaalloon diggoona kotemminaꞌone; koniyoona boonoshin shatiyaachemmone.

²⁹ Qeemi showoon boonoshich qanniyemmo taane; ebiyee bekk showee toommoochaa shaacoona ciireyaachemminaꞌone; ebiyee bekk aageteenaꞌona naakkeyaachemminaꞌone.

³⁰ Boonoshi Nuggishoo Doono Yeeri ta, boonoshina tookkii ta beemon, Israꞌeelee macceenaꞌo ta asheenaꞌo boonoshi tunoon ariyemminaꞌone.

³¹ Ittoshi ta gaddooch beeti ta bago ittoshine; ittoshi ta asho ittoshine; tawoo ittoshi Nuggishoo taane, iye Nuggishoo Doono Yeeri’ gete” iye.