Hiziqeeli 33 - Kafa Linguistics Project

Hiziqeeli Qayechon Tuno

¹ Doono Yeeri taach ishichiye:

² “Ashi bushoocho, ne asheenaꞌoyich ishichi gete: ‘Showee toommooch goraadoon ta deebiyooba, are showeexi asheenaꞌo boonoshi daggoochee ikkoon deebiꞌi qayechon boonoshi tuniitaa,

³ biyoo showee toommooch goraado waataa beeggiꞌi shametoon bi hugaa, asheenaꞌonoo bi meeqqeqqiitaa,

⁴ shametee qaaroon waayeti asho bi qelloon quyo bi qayigaata, goraado waaꞌi biin bi wuxigaata, bi damoo bi kishooch tunemmone.

⁵ Shametee qaaroon waayeechi bi qelloon quyo bi qajjitoyich bi damoo bi toommooch tunemmone; bi qelloon bi quyeto gaata bi kashoon wodiyeshone.

⁶ Tunebaani qayecho goraado womon beeggiichii shametoon hugo bi qayigaata, asheenaꞌonoo meeqqeqqiyoo bi qayigaata, goraado waaꞌi ashoon bi wuxigaata, are asho bi axaaxoona qitemmone; tunebaani uroochi damoon are qayecho kishoochee qaawemmo taane’ gete.

⁷ “Ebich ashi bushoocho, neen Israꞌeelee macceenaꞌon qayecho tuniito taane; ebich ta qaaroon waayebe; neech ta gettemmi qaaroona boonoshin meeqqeqqiibe.

⁸ Gonde ashoon ‘Gonde ashoocho, iberoochaa qitemmo neene’ ta getaa, gonde ashoon bi gommoochee wochoyich meeqqeqqiyoo ne qayigaata, gonde asho bi axaaxoona qitemmone; tunebaani bi damoon ne kishoochee qaawemmo taane.

⁹ Tunebaani gonde ashoon bi gommoochee bi wottemmoyich ne meeqqeqqiichaa wottoon bi qayigaata, bi axaaxoona qitemmone; tunebaani ne, ne kasheen wodiyemmo neene” iye.

Gondoochee Wotto Ashich Qaawiyoo

¹⁰ “Ashi bushoocho, Israꞌeelee macceenaꞌoyich ishichibe: ‘No xuꞌoonaa no axaaxoona no toommoochiye; eboshichi naboona maajjeto noone; kashoona no beeyemmo aabichireeshiye?’ ito ittoshine.

¹¹ ‘Ta, beeyechi Nuggishoo Doono Yeeri ta tunoona wogehoye: Axaaxecho bi gommoochee wotteree kashoona bi beeyemmoyichani, bi qitoona emiraache. Israꞌeelee macceenaꞌote, wottebote. Ittoshi gonde gommoochee wottebote. Amoyichiye ittoshi qitemmo?’ itone gete.

¹² “Andoo ashi bushoocho, ne macceenaꞌoyich ishichi gete: ‘Cadiqe asho axaaxooch bi wottegaata, wonnee bi cadiqitino biin wodiyaachemmone; gonde asho bi gondoochee bi wottegaata wonnee bi gondo bi aafooch xugo tuneyaachemmone; cadiqe asho axaaxoon bi shuunegaata wonnee bi cadiqittino biin wodiyoon hakkaache’ gete.

¹³ Ta, cadiqe asho kashoona beeyemmo bi tunoon ta getteechaa, bi cadiqoon gibeneꞌi axaaxoon bi shuunegaata, bi shuuneti axaaxoona qitishalli bi gettemmo bi cadiqe shuunoo biich haddeyaachemmone.

¹⁴ Ta, gonde ashoon ‘Iberoochaa qitemmo neene’ ta getigaata, biyoo bi axaaxoochee wotteꞌi, dayinnetoonaa cadiqe mooyonon bi tuniigaata,

¹⁵ yechiyoo bi deqqiton bi wochigaata, bi boggitonoo bi wochigaata, kashoon daniibeeti geteenaꞌon bi dabbigaata, axaaxoon shuuno bi qayigaata, kashoonalli bi beeyemmo qitaachemmone.

¹⁶ Bi shuuneti axaaxoo bulli ciiroona haddeyaachemmone; dayinnetoonaa cadiqe mooyonon bi tuniitoyich iberoochaa kashoona beeyemmone.

¹⁷ “Tunebaani ne macceenaꞌo: ‘Doonochi gommo kaamoo toonoone’ ii beetinaꞌone; tunebaani kaamoo tuno qajjito boonoshi gommone.

¹⁸ Cadiqe asho bi cadiqee shuunoochee wotteꞌi, axaaxoon bi shuunegaata bi shuuneti axaaxee naboona qitemmone.

¹⁹ Axaaxecho bi axaaxoochee wotteꞌi, dayinnetoonaa cadiqe mooyonon bi tuniigaata, ebichi naboona kashoona beeyemmone.

²⁰ Tunebaani ittoshi, ‘Doonochi gommo kaamoo toonoone’ iyote; Israꞌeelee macceenaꞌote, ittoshi shuuni shuunoommon ittoshi toommooch nallemmo taane” iye.

Yerusaalemi Dihemmi Tuno Getteyoo

²¹ Kecaa no hammeti aaraa guttinnee natooba, aashirinnee agenee uuchinnee qemooba Yerusaalemee muricciti ikke uro ta waan waaꞌi, “Katemoo dihitone” iye.

²² Ebi muricciti asho ta waan shagoyee shiichiꞌi, xumoona Doono Yeerichi giidoo ta toommooch waahe; ebi uro maaddii ta waan bi womoyee aaf, Doono Yeeri ta noonoon qechiye; aroyee hach dudeyaano taane.

²³ Doono Yeeri taach ishichiye:

²⁴ “Ashi bushoocho, Israꞌeelee showooch, happeeti xaaꞌooch koteti asheenaꞌo ishichii beetinaꞌone: ‘Abrahami ikke asho tuneebee showoon woraashiye; tunebaani no meeto no tunetoyich showoo no iristo bi tuno xiisheetone’ ii beetinaꞌone.

²⁵ Ebich Nuggishoo Doono Yeeri ta gettaa beeton ishichi boonoshich gete: ‘Meenon damoona tookkii maahote; ittoshi aafoon shahalleenaꞌo waan wochiyote; damoon ukkiyote; ebi ittoshine showoon woraashemmo?

²⁶ Ittoshi goraadoon gibenehote; ciigiiti mooyon tuniihote; ittoshi ikkikkoona ittoshi nuuchoo mecheen eeꞌiihote; ebi ittoshine showoon woraashemmo?’ gete.

²⁷ “Boonoshich, Nuggishoo Doono Yeeri ishichiye: ‘Beeyecho ta tunoona wogehoye: Happeeti xaaꞌooch beetinaꞌo goraadoona dihemminaꞌone; bakkooch beeton kubbi cooxoyich maayo tuniiree immemmo taane; mishigoonaa gofoonooch beetinaꞌo biiyoona qitemminaꞌone.

²⁸ Showoon shokkaachoonaa amolla aalloonon tuniyemmo taane; bi geeciibeeti bi giidoo niremmone; Israꞌeelee guudinaꞌon shokkoon echiyemmo taane; koniyoona aroona besheyaachemmone.

²⁹ Boonoshi tuniiti ciigiiti mooyoyich showoon shokkaachoonaa amolla aalloonon ta tuniihooba, ta, Doono Yeeri ta tunoon ariyemminaꞌone’ itone gete.

³⁰ “Ashi bushoocho, ne macceenaꞌo uxeree gaꞌoonaa kechi kelloonoochaa neechon yibbaatee beetinaꞌone; boonoshinaa boonoshina: ‘Wobote, Doono Yeer waanee waati qaaro amo gaata waayebone’ ii beetinaꞌone.

³¹ Bulli aaboon boonoshi tunii beetoommon ta macceenaꞌo waaree ne aafooch kotemminaꞌone; ne gettaa beeton waayemminaꞌone; tunebaani tuniyaachemminaꞌone; boonoshi noonoona wodde shunoon bekkiiheete; tunebaani boono mulloona boono gaacoon dabbiyeete.

³² Ne, boonoshich shunee shoddoon gaawichii shoddeebeeti, shoddee qiicoonoo gaawichii kaachiibeeti ashoon shaahito neene; ne getoon waayemminaꞌone; tunebaani tuniyaachemminaꞌone.

³³ Iberoochaa ebi bulli tunemmone; ebi tunehooba, boonoshi daggooch keemecho beemon ariyemminaꞌone” iye.